Ni 2 Chung Ah SAC Hriamngan Kahnak In Kalaymyo Um Tualchung Mi 5 Nunnak A Liam.Kalaymyo khuapi ah nizan February 22 chun ah SAC ralkap nih hriamngan an kah ruangah nu pahnih nunnak a liam i pa pakhat zong an thah, February 21 zong ah tualchung mi 3 nunnak a rak liam cang.
February 22 zinglei in SAC ralkap nih hriamngan pehtlai in an kah i chun suimilam 12:00 hrawngah Kalaymyo nitlaklei Hmunlai le Kyutungpin sang um mi Chin nu pahnih cu hriamngan kuan nih a tlak hna ruangah an nunnak a liam, tiah tualchung mi hna nih an chim.
Nunnak a liam mi hna hi kum 29 tluk Nu Cing Khawl Kim le kum 48 tluk Nu Cing Khawm Vung an si. February 22 zing suimilam 9:00 hrawng zong ah Tahan sang ah kum 40 tluk pa pakhat cu SAC ralkap nih an kah i a thi, tiah tualchung mi hna sin in theih a si.
February 21 zong ah SAC ralkap nih hriamngan an rak kah ruangah nu pahnih le pa pakhat nunnak a rak liam i Kalaymyo khuapi ah hin ni hnih chung ah tualchung mi 5 an nunnak a liam.
Thawngpang Dang Rak Rek Chih :Ram Mi Ralkap Tlakternak Upadi Nunter Hnu Ah Thailand Visa A Soktu Minung 7,000 Leng An Phan Cang.SAC nih ram mi ralkap tlakternak upadi an nunter hnu ah Yangon khuapi um Thailand Emabassy ah visa a soktu minung 7,000 leng an phan cang, tiah Bangkok Post nih a ṭial.Thailand Emabassy nih visa a soktu ca ah token lethnih in an pek cang hna i ni khat ah minung 800 an pek hna kong Thailand cozah ṭuanvo ngei Kanchan Patarachoke nih a chim.
“Token kan pek mi hna hi 2024 March 1 tiang an khat cang i hi nakin visa a soktu an karh lai ti kan zumh,” tiah nizan February 22 ah a chim. ASEAN biahren ning ah Myanmar ram mi hna cu Thailand ram ah visa loin kal khawhnak nawl onh an si ko nain visa lo cun ni 14 chung ca lawng a nguh.SAC nih ram mi ralkap tlakternak upadi an nunter hnu ah mino tampi ramdang ah a kal mi an um bantuk in ramdang kalnak an tuah cuahmah.
SAC nih uapdi an ser mi ah pa kum 18-35 le nu kum 18-27 tiang an auh hna lai i a tlawm bik kum 2 chung ralkap tlak ding, tiah nawl an chuah. Zaw Min Tun nih cu ralkap a tla kho ding minung nuai 13 hrawng an um i kum khat ah minung 50,000 kan auh hna lai, tiah a chim.Credit : The Chin Post