Ye Ah SAC ralkap Kahdohnak Ruang Ah Mipi 3 Leng An Thi
==========
Mon ram, Ye khua chaklei ah a um mi Hnitkayin khua ah June 25 chun ah SAC ralkap nih Helicopter in an kah ruang ah mipi 3 nak tlawm lo an thi tiah Ye PDF nih cathanh an chuah.
Ye khua chaklei hrambunh PDF pawl nih chun sml 12:00pm ah Hnitkayin khua ah a um mi palek sakhaan an kah hna i sml cheu leng kahdohnak a chuah hnu ah Mawkanin hrambunh SAC No. 317 hriamngan ralkap nih hriamngan in kahdoh an rak bawmh hna bantuk in Helicopter zong in a rak kah hna caah PDF pawl an kir ášhan tiah an thanh.
Cubantuk in SAC Helicopter nih kahdohnak a rak tuah ruang le hriamngan an kah ruang ah mipi 4 hrawng an nunnak a liam i 20 hrawng an i hliam i khuami tamoi zong himnak hmun ah an zaam tiah theih a si.
Hpasawng Ah BGF Sakhaan 3 An Kah Hna, SAC ralkap le BGF 20 Hrawng An Thi; Thai-Myanmar ramri, Karenni ram, Hpasawng peng ah a um mi SAC kuttang Border Guard Force (BGF) sakhaan 3 an kah hna tiah theih a si.
A luancia 21 thawk in Hpasawng peng, Kuatthit tlang cung ah hram a bunh mi SAC Infantry 134, 135 le Hpasawng hrambunh BGF Battalion Byu-ha hna cu KA, KNDF, PDF thazang 300 leng nih an kah hna.
Cu SAC le BGF sakhaan pawl ah SAC chungtel thazang 50 cio hrawng an um tiah theih a si.kahdohnak chung ah SAC nih vanlawng bawm in kahdohnak a tuah caah mipi hriamtlai phufonh lei in hliam a tuar mi zong an um tiah theih a si. Crd; The Chinland Post