AA Tlaih Mi SAC Ralkap Chungkhar Nu le Ngakchia Ṭha tein an Zohkhenh Hna.Rakhine ramkulh chung kahdohnak ah AA hriamtlai nih an tlaih mi SAC ralkap chungkhar nu le ngakchia pawl cu ṭha tein kan zohkhenh hna, tiah AA nih nihin March 4 ah an langhter.
Hliamhma a pu mi nu, ngakchia le SAC ralkap pawl thlopbulnak an tuah hna lio zong hmantlak ah an langhter. “SAC ralkap nih tilawng, vanlawng le hriampi hmang in a kan kah lengmang caah harnak tampi a um. Asinain, cu bantuk harnak lak ah cun kan tlaih mi hna cu ṭha tein kan zohkhenh ko hna,” tiah AA nih a chim.
Hmanthlak an langhter mi hna cu SAC ralkap tilawng pathum pil lak in AA nih an kah lio ah an tlaih mi nu le ngakhcia hna le raalram kahdohnak ah tlaih mi SAC ralkap pawl an si, tiah an langhter.
Update : Rak Rel Chih :Hakha palek pakhat CDF-Hakha sin ah hriamnam he CDM a tuah.March 2 ah Hakha khua chung um palek pakhat cu CDF-Hakha sin ah hriamnam tling he CDM a tuah tiah CDF-Hakha nih a thanh.
“Hramhram in uknak a la mi SAC ralkap rianṭuannak ka duh lo, Mizapi dohthlennak (Pau Dohthlennak) ah ka tel ve lai,” ti in CDF-Hakha sin ah CDM a tuah, tiah an langhter.Chinland Defense Force-Hakha sinah CDM in dohthlennak a hun tuah mi cu lunglawm tein kan cohlan i tangka Kyats sing 50 kan pek lengah a himnak hmun a phak tiang ṭuanvo kan laak, tiah an ṭial.
“SAC ralkap rianṭuannak doh in, mizapi dohthlennak (Pau dohthlennak) ah CDM in tel a duh mi paoh cu, Chinland Defense Force-Hakha sinah pehtlaih khawh peng kan si, a humhimnak nan phak tiang ṭuanvo kan in laak hna lai” ti zong thawngthanhnak ah an telhchih.Credit : The Hakha Post