Bago Yoma Ni 4 Chung Kahdohnak Ah SAC Lei 80 Leng An Thi.Bago ramṭhen, Thayarwaddy pengkomh, Minhla peng, Bago Yoma chung um Acre 1000 hrawng thlor thing dum pawng le Hai-yu lamton ah March 7 thawk in March 10 tiang ni 4 chung kahdohnak a chuak i SAC lei 80 leng an thi tiah Thayarwaddy pengkomh PDF B3802, C05 nih thawng an thanh.
A luancia March 7 ah thlor thing dum umnak Kyungpauk pawng ah ralkap 120 hrawng an lak lut i dothlennak phufonh pawl nih thawng an rak theih cia caah an bawh hna i sml 2 chung an kah hna i SAC lei 20 hrawng an thi, mipi hriamtlai lei 1 aa hliam tiah theih a si.
Kahdohnak ah a sung mi SAC ralkap pawl bawmh ding in a rak phan mi SAC ralkap pawl cu Myochaung-Singkanlan lam cung ah a um mi Haiyu lamton ah Thayarwaddy pengkomh PDF B3802, C05 le C03 nih hriamngan le meithal in sml 3 hrawng an kah hna hnu ah SAC ralkap 1 a thi, tampi hliam an tuar tiah theih a si.
Cun March 8 zaanlei sml 5:00pm hrawng zong ah thlor thing dum umnak Kyungpauk pawng cu SAC ralkap pawl nih hriamngan an kah hnu ah an rak lut i Thayarwaddy pengkomh PDF B3802, C05 le Dagon Column nih an kah hna caah sml 4 leng an rau.
Kahdohnak chung ah SAC lei 40 an thi i MA3 zuun 1, kuanbawm 4, 60MM kuan 1, bomrap 1, solar 1 le adang thilri pawl an lak khawh tiah an thanh.Cun March 9 zinglei sml 6:00am hrawng ah SAC ralkap a thi mi ruak pawl hmanthlak ding an kal lio ah kahdohnak a chuak ṭhan i sml 3 hrawng a rauh hnu ah SAC lei 20 an thi, dothlennak phu lei hriamtlai 2 fak ngai in an i hliam tiah theih a si.
March 10, zaanlei sml 2:00pm hrawng ah Tuluk thlor thing dum in a rak chuak mi SAC ralkap pawl cu Bama thlaan pawng ah Thayarwaddy pengkomh PDF B3802, C05 le Dagon Column nih an kah ṭhan hna caah sml 1 le cheu hrawng kahdohnak a rau i SAC lei hriamngan a tlai mi 2 an thah khawh chap hna.
A luancia March 7-10 tiang ni 4 chung ah SAC ralkap he kahdohnak voi 6 a chuak i cu kahdohnak chung ah SAC lei 83 an thi, MA3 zuun 1, kuanbawm 4, 60MM zuun 1, 60MM kuan 1, bomrap 1 le adang kahdohnak thilri pawl zong an lak khawh i dothlennak phu lei 3 an i hliam tiah theih a si.
Rakrel Chih :SAC Kuttang BGF 200 Hrawng Bangladesh Ah An Zaam. SAC kuttang BGF chungtel 200 hrawng cu Bangladesh ah March 11 ah an rak zaam tiah Bangladesh ram nawl ngeitu pawl nih BenarNews ah an chim.
AA le SAC ralkap kahdohnak ruang ah atu bantuk in a tomtom in an zaam hi a si.Bangladesh-Myanmar ramri, Myanmar lei hrap ah atutiang kahdohnak a fak i kahdohnak pawl kha Bangladesh lei nih an ngiat ko tiah Bangladesh lei nawl ngeitu pawl nih an chim.
Kahdohnak chung in an kah mi hriam kuan pakhat zong nizaan ah Bangladesh lei ah a tla tiah an chim.SAC kuttang BGF pawl cu AA he kahdohnak chung ah ral an sung i an zaam hi a si.A luancia February zong ah SAC chungtel 300 leng hrawng Bangladesh ram lei ah an rak zaam cang i Bangladesh nih Myanmar ram lei ah a kuat cang hna.Credit : The Chinland Post