KIA nih SAC Ralkap Sakhaan 20 Leng a Laak Khawh Cang.KIA nih Kachin ramkulh chung i SAC ralkap sakhaan pawl a dohnak ni 5 a hun tling cang i, cu caan chung ah cun SAC ralkap sakhaan 20 leng a laak khawh cang, tiah theih a si.
KIA nih a laak mi SAC ralkap sakhaan 20 leng lak ah hin Hkaya Bum, Naura Zinghkang, Hpun Pyen Bum, Ntap Bum, Mali Myen Dap le Masen Bumsakhaan tibantuk sakhaan ngan pahra hrawng an i tel.Nizan March 11 ah a cang mi Winemaw peng chung kahdohnak ah SAC ralkap helicopter (Mi35) zong KIA nih an kah tiah thawngpang a chuak.
Cu kong he pehtlai cun KIA chimnak nawlngei Colonel Naw Bu nih, “Helicopter kan kah mi cu a fiang ko. Asinain, kan kah lecangka in a tla lo, Myitkyinal lei ah a vung zuang i zeidah a can ti mi kan fehter kho lo,” tiah BBC ah a chim.
KIA nih an kah mi SAC ralkap helicoter hi a tumnak hmun a phak lai ah a kaang tiah thawngpang a chuak nain atu tiang ah cun an fehter kho ngaingai rih lo. March 7 thawk in khan Kachin ramkulh chung i SAC ralkap sakhaan pawl cu KIA nih dohnak hram a thawk i, nihin March 12 tiang zong ah Winemaw le Laiza karlak ah kahdohnak pehzul in a um, tiah theih a si.
Up Date : Kalay Peng Kahdohnak ah SAC Ralkap 3 an Thi, Meithal Zun 24 an Laak.Kaley peng, Kantharyar khua kahdohnak ah SAC ralkap 3 an thi i, meithal zun 24 cu mipi ralkap nih an laak, tiah NUG nih theihternak a tuah.
March 10 ah Kalay peng Kantharyar khua ah a rak ra mi SAC ralkap le Pyusawhtee 80 hrawng cu mipi ralkap bu fonh nih an doh hna i SAC ralkap ruak 3, meithal zun 24, kuan 1,200 hrawng le a dangdang thilri pawl cu mizapi ralkap nih an laak. Cu kahdohnak ah cun RKDF၊ HNB၊ S2UG၊ EFDF၊ TCDF le GRF telh in mizapi ralkap bu 10 hrawng an i tel.
Kantharyar khua hi Pyusawhtee khua a si i, kan hnu February thla ah khan mipi ralkap nih an rak laak mi a si. SAC ralkap le Pyisawhti nih laak than ding in an hun rat hnawh caah atu bantukin kahdohnak a chuah hi a si, tiah thawngthanhnak ah an langhter.Credit : The Hakha Post