Arakan Army (AA) Nih Ramree Khuapi Cu A Ningpi In An LaakRakhine ramkulh, Ramree khuapi cu .Rakhine ralkap AA nih a ningpi in an laak i khuapi 8 an laak cang, tiah AA nih an thanh.
Nizan March 11, chunhnu suimilam 1:15 ah Ramree khuapi chung ah a um mi SAC ralkap pawl pakhat hmanh taang lo in an fimhlawm dih hna caah Ramree khuapi cu a ningpi in an kut chung ah a um cangnak kong AA nih cun an chim.
AA nih Paletwa peng, Kyauktaw, Mrauk-U, Minbya, Pauktaw, Ponnagyun, Myaypone peng le nizan March 11 ah Ramree khuapi tiin khuapi 8 an laak cang.Ramree khuapi cu Ramree tikulh cung ah a um mi khuapi pakhat a si i, Paletwa Operation kalpi a si thla khat hnu, a liamcia 2023 December 18, zinglei suimilam 8:13 ah rak kah thawk a si, thla 3 chung tluk kaphnih kar kahdohnak a fak i SAC ralkap nih tilawng le vanlawng in nifatin in kahdohnak an tuah nain AA nih khuapi cu a ningpi an laak khawh ṭhiam, tiah theih a si.
Ramree khuapi chung tualchung mi pawl cu AA nih khuachung ah lut colh lo ding in an nawl hna i thla 3 tluk chung i kahdohnak hmun a si caah SAC ralkap nih an rak hmanh ta mi bomb pawl thianhfelnak tuah hmasa an i timh kong AA nih cun an chim.
Tha Tuk :CDF-Hakha President Nih SAC Naihniam In A Um Mi, Thawngpetu Cheukhat Le Non CDM Pawl Ralrin A Pek Hna.Chinram, Hakha khuapi chung ah SAC ralkap le palik hna he naihniam ngai in a um i thawng a pe tawntu nungak no tete le SAC kuttang ah rian a ṭuan rih mi Non CDM vialte a rannak in mizapi sin ah i fonh dih ding in Chinland Defense Force-Hakha President nih March 9 Online biaruahnak ah atu bantukin ralrin peknak bia a chim.
Online biaruahnak ah cun Chinland Defense Force-Hakha President nih, “Hakha khuapi chung nungak cheukhat SAC ralkap le palik pawl he naihniam ngaiin a um mi nan um i kan thawngpang anmah sin ah nan pek hna zong kan theih dih, tualchung mi nan si caah kan in ti rih hna lo, nan zia nan ṭhinh duh hlei lo ahcun a caan a phan te lai, cucu a donghnak bik ralrin pek si seh,” tiah SAC lei ṭang tualchung mi cu ralrin a pek hna.
“Chin mphun cu zatlang nun biapi ah a ruat mi kan si caah nihin tiang dantatnak kan tuah rih lonak a si, mah le mah nan i zuar a si pin ah miphun nan zuar zong a si. Cun, CDM a tuah duh lo i mah miaknak lawng a ruat mi vialte zong rak i ralring u,” tiah a chim chap.
Hakha khuapi chung SAC zung kip ah rian a ṭuan mi tam deuh hna cu Hakha hmunram chung mi si lo in Tedim, Falam le Mara lei in a ra mi an si hna i SAC kuttang ah rianṭuan ti lo in a rannak in mizapi sin ah i fonh dih ding in Defense Force-Hakha President Salai Hram Lian nih ralrin a pek hna.Credit :The Chin Post