Hpakanh Peng SAC Ralkap Sakhaan Laaknak ah SAC Ralkap 70 Hrawng an Thi.Kachin ramkulh, Hpakanh peng, Tamahkhan khuate ah a um mi SAC ralkap sakhaan laak kahdohnak ah SAC ralkap 70 hrawng an thi i, a dang ralkap 20 cu KIA nih an nung in an tlaih hna, tiah theih a si.
“Tamakhan SAC ralkap sakhaan ah ralkap 20 hrawng cu KIA nih an nung in an tlaih hna. A dang SAC ralkap cheukhat nih KIA ralkap pawl an nawl tuk hna caah sakhaan in chuahnak nawl an pek mi hna. Sakhaan in a chuak mi pawl cu Kathaingtaung SAC ralkap sakhaan ah an vung i fonh cang. Tamakhan sakhaan tu cu KIA nih an laak dih cang,” tiah ralram ah a um mi KIA ralkap pakhat nih KNG thawngzamhnak ah a chim.
Tamakhan SAC ralkap sakhaan cu February 26 thawk in khan KIA nih doh hram a rak thawk i a ni 14nak March 10 ah tlamtling te in an laak khawh hi a si. SAC ralkap 70 leng an thi, a dang 20 an nung in an tlaih hna pin ah ralhriam phuntling 50 hrawng le meithal kuan tampi an laak.March 7 thawk khan Kachin ramkulh chung ah a um mi SAC ralkap sakhaan tampi cu KIA nih voi khat te ah doh hram a thawk hna i nihin March 11 tiang ah SAC ralkap sakhaan 20 leng an laak cang, tiah theih a si.
Up Date : Good News : Chinland Council nih Senthang Central Council cu Lunglawm te in a Cohlan.Senthang mizapi khuakhaannak nih a hrin mi Senthang Central Council/Senthang Revolution Forces cu Chinland Council chungtel si ding in lunglawm te in kan cohlan, tiah Chinland Council nih March 9 ah theihternak a tuah.
“A voi 2nak Chinland Council biachahnak No. 3 ning in Senthang Central Council/Senthang Revolution Forces cu Chinland Council ah chungtel si ding in kan cohlan,” tiah Chinland Council nih a langhter.February 16-17 ah Senthang mizapi tonpumhnak an ngei i, CDF-Senthang le CDF-Hakha Brigade (2) cu bu khat ah an ser hnu ah Senthang mizapi a huaptu Senthang Central Council/Senthang Revolution Forces cu dirh a rak si.
Bu hnih in a rak um mi Senthang hriamtlai pahnih kha bu khat ah an ser i, Senthang Central Council/Senthang Revolution Forces ti mi tlamtling te in an dirh khawh mi kong he pehtlai in CDF-Hakha Central Council le ZZLMS zong nih lawmhpinak ca an rak chuah.Credit : The Hakha Post