SAC Ralkap Nih Hakha Khuapi Kiangkap Ah Bomb An Hmanh, Tiah Hakha City Council Nih An Thanh
========
Hakha City Council nih cun, Hakha khuapi kiangkap hmun tampi ah SAC ralkap nih ke lamhmi bomb an hmanh, tiah an thanh i, mizapi umkal i ralrin ding ah thawng an thanh hna. Hakha City Council nih cun Hakha khuapi kiangkap ah i chawkvak lo ding in nawlnak an tuah pinah dohthlen lio caan chung paoh cu, Hakha khua kiangkap cu ralram hmun a si ruangah tiva kal lo ding, ngahring dawi lo ding, sarap chiah lo ding, ramvaih le ramriah rih lo ding, tiah an thanh.
Ralrin peknak cathanh chuahmi nawl a ngai lomi paoh cu phung ning tein dantat an si lai i nihin January 18 thawk in Hakha kiangkap ah tlunkal khawh ṭhannak kong cathanh kan chuah hlan chung paoh cu ralrin peknak cathanh kan chuahmi a hmun lai, tiah Hakha City Council nih cun an langhter.
A luancia 2023, May 24 ah Hakha khuasa Pu Chan Kian cu ministers umnak lei ah Meheh rawl a rak kawlnak ah bomb aa lamhsual i, a nunnak a rak liam. Amah kawl ding in a kalmi minung panga zong bomb lamhsual ruangah hliam an rak pu ve. Cu bantuk ṭhiamin tukum 2024 January 6 ah kum 19 tluk tlangval pakhat nih Hakha thar, view point 2 ah bomb aa lamhsual i hliam fak ngai a rak pu.
Hakha Khuapi Kiangkap Ah SAC Nih Bomb An Hmanh Dih Tiah Hakha City Council Nih An Thanh. Chinram khualipi, Hakha khuapi kiangkap hmun tampi ah SAC ralhrang nih ke lamhmi bomb an hmanh dih caah mizapi nih luhchuah le nuamhnak tuah, tlunkal rih lo ding in Hakha City Council nih cathanh an chuah.
2024, January 18 thok in cathanh chuah ṭhan hlan tiang mizeihmanh tiva kal, ngahring dawi, sarap chiah, ramvaih le ramriah lo ding in thawng an thanh. A cunglei langhter mi nawl a ngai lo mi paoh cu kan phung ningte in dantat le zarhkhatnak tam lo thongthlak khawh a si lai, tiah Hakha City Council nih cathanh an chuahmi ah an langhter chih.
Taingen Sakhan Kahdohnak Ah CDF-KKG Ralkap 5 An Nunnak Liam. Chinram, Tedim peng, Kalay-Hakha lampi cung ah a um mi Taingen sakhan kahdohnak ah CDF-KKG ralkap 5 nih ram le miphun ca ah an nunnak an pek i, CDF-KKG nih ngaihchiatnak cathanh an chuah. A luancia January 12 ni ah rak thawk mi Taingen sakhan kahdohnak ah CDF-KKG ralkap 5 an nunnak a liam, tiah an CDF-KKG nih a langhter.
Ram le mi miphun ca ah nunnak a petu CDF-KKG pasalṭha hna cu Battalion 4 Company Commander Langh Pum Khai, Battalion 6 chungtel Si Thu Aung, Battalion 1 sii-ai lei ṭuanvo ngei Can Cin Mawi le Battalion 1 lam hruaitu Van Lal Ro Char hna an si i Battalion 1 in Nang Thian Khai cu January 11 ni ah a nunnak a liam.
Pau dohthlennak ah ram le miphun ca i nunnak a petu CDF-KKG pasalṭha hna nan i peknak cung ah upatnak sang bik kan in pek hna i kaltak mi chungkhar hna an ngaihchiatnak kan i hrawm, tiah Chinland Defense Force – Kalay Kabaw Gangaw nih cathanh an chuah mi ah an langhter.
Taingen Sakhan kahdohnak ah hin SAC leiin ralkap 30 an thi i, hriamnam tamlak zong Chin ralkap ṭangṭi phu nih an laak khawh. Chin ralkap leiin ralkap 8 nih ram le miphun ca ah nunnak an pek ve i, nunnak a petu Chin ralkap 8 lak ah CDF-KKG chungtel 5 nih nunnak an pek.
Kalaymyo Pholamin Changreu Dawr Pakhat Ah SAC Ralkap Nih Minung 15 An Tlaih Hna. Sagaing ramṭhen, Kalaymyo Panglong sang Pholamin changreu dawr cu a luancia January 15 ni ah SAC ralkap pawl nih luhhnawh in dawr ngeitu telh in rianṭuantu hna le changreu a caw liomi, an zate minung 15 an tlaih hna i chungkhar lei nih nihin tiang an pehtlai kho hna lo, tiah Kalaymyo tualchung mi nih an chim.
Pholamin changreu dawr ngeitu Daw Htay Sein telh in minung 15 an tlaih mi hna cu Kalaymyo Dah-Kah-Sah ah thong an thlak hna i, nihin January 18 tiang ah chungkhar nih an pehtlai kho hna lo. Kalaymyo SAC ralkap nih khuachung ah tualchung mi atu le tu an check hna i hramhram in tangka zong an hal hna, tiah tualchung mi nih an chim.
Ramkhel thongtla zohkhenhtu phu AAPP nih nizan January 17 ni an langhter ning ah SAC ralkap nih hramhram in nawlngeihnak an laak hnu in Myanmar ram hmunkip ah tlaih a tong mi 25,830 an si i, cu chung ah minung 19,930 cu an thlah rih hna lo.