Kantbalu Peng Ponnargyi Khua Ah Tualchung Minung 8 SAC Ralhrang Nih Tlai In An Hrem hna Caah 1 Nunnak Liam
=========
Sagaing ramṭhen, Kantbalu peng Ponnargyi khua tualchungmi (Pa) 8 cu SAC ralhrang nih tlai in an hrem hna caah minung 1 nunnak a liam a ruak hi chungkhar sin ah anpe duh loh tiah Kotaungbo Revolution – KTB-R in ṭuanvo ngeitu pakhat nih Yangon Khit Thit ah a chim.
October 21, zing suimilam 6:00 tluk khan Kantbalu peng thlanglei Chaapthinsanpia khua ah umhmun khuar in a ummi SAC ralhrang nih Ponnargyi khua chungah lut in mipi thilri an fir hnu ah tualchung mipi 8 tlai in an sakhan ah an kalpi hna tiah theih asi.
“Chaapthin khua le Ponnargyi khua hi meng 3 tluk lawng aa hlat, Ko Kyaw pakhat lawng an thah i a tangmi 7 cu an thlah ṭhan hna an nih zong hliamhma fak tuar in an rak kir mipi hriamtlaiphu nih va chanh chuah dingin Chaapthin khua tiang kan zulh dawi hn asihmanhsehlaw ralhrang thazaang an tam caah kan chanh kho hna lo” tiah Kotaungbo Revolution – KTB-R chingin ṭuanvo ngeitu pakhat nih a chim.
Yaw Le Chinram Thlanglei Panh In SAC Ralkap Motor Run A Rak Kai Mi Puak Peng Ah Thlakhat Hlei Kham Mi Cu A Tu An Rak Kai. Magwe ramṭhen, Pakokku hrambumh LIB 101 in a hnulei a um mi, Yaw le Chinramkulh, thlanglei riakcaw phor mi motor 70 hrawng cu Pakokkku –Pauk peng ah thlakhat hlei kham an rak si nain atu cu an rak kai kho cang tiah theih a si.
SAC ralkap 300 hrawng le riakcaw a phortu motor cu September 28 in Pakokku in an rak i thawh hi a si. Lampi ah kham an ton caah zarhkhat tiang cu Pauk peng ah a tang rih. Magwe hrambumh mipi ralkap he kahdohnak a chuak. SAC ralkap nih Pakokku-Pauk- Kyaukhtu- Mindat lampi hmang in Chinramkulh thlanglei ah ralkap thazang a chap ṭhan lengmang.
2023 June 21 ni ah Pakokku in a rak chuak mi SAC ralkap mawṭaw 9 cu ralkap 100 hrawng nih himnak an lakpiak i Mindat-Kyaukhtu lei an panh caah cuka lamcung mipi hna nih ṭha tein ralrinnak ngei uh tiah CDF-Mindat nih an rak thanh.
June 21 ah cu SAC ralkap pawl cu phu 3 ṭhen in Kyaukhtu hmunhma chung ah an lut i lam kehlei le orhlei ah hriamngan an thlah thlorh, meithal an puah thlorh i hmai an fong thluahmah caah CDF phu hna nih cuka hmunhma khuami hna kha umkalnak tuah rih lo ding in ralrinnak an rak pek hna. May 2022 thla ah Mindat- Matupi ah hriamnan, meithal, kuan, zen le riakcaw phor tu motor runpi he an rak kai lio ah atu Ongtaw hlei cu bom in an hrawh bal cang tiah The Mindat Post in theih a si.
Kanpetlet Khuachung SAC Ralkap Hmunhma 4 Ah Mipi Ralkap Nih An Kah. Kanpetlet khuachung, GAD-peng uknak zung, Siangsangruun High School , Yan Aung Sedi le Fimcawnnak zung hmun 4 ah um hmun a la mi SAC ralkap cu October 21 zing 6:00am ah CDF-Kanpetlet nih a va kah hna tiah theih a si.
CDF-Kanpetlet nih hmun 5 ṭhen in hmakhat te ah kahdohnak an tuah i SAC ralkap 2 an thi, hliamtuar mi zong an um tiah Kanpetlet Voice nih a langhter. September 27, Kanpetlet khuachung ah GAD zung le fimcawnnak zung ah umhmun a khuar mi SAC ralkap cu CDF Kanpetlet nih an kah i SAC ralkap 3 an thi tiah CDF Kanpetlet sin in theih a rak si. Nihin Kanpetlet khuachung ah kaphnih karlak kahdohnak a chuah kho peng mi a si caah mipi lei nih SAC sakhaan pawngkam um lo ding le umkal tuk lo ding in mipi ralkap lei nih cathanh an chuah.