CNF lawnglawng Chinland huap in policy a ngeimi dohthlennak ramkhel buu kan ngeihmi a si!
============
CNF nih an aupi pengmi Nation Building cu Myone hi siloin Myonuesuh (Phunteng) hram a bunhmi Nation Building hi a si. Hrimtlai in an dir pek dirlo pek ah Chinmi hna i ka sining taktak zong a si. Myone tu hi Chinmi kan sining ah dirhmun a ngei lomi a si. Khakha uknak kong deuh a focas mi ramkhel hmuitinh cu a si fom cuh.
Cun CNO le CDF-Mindat pawl kalpi mi khi myone base a silomi CDF te pawl va hloh lawng khi siloin Nation Building tikah atu i micheukhat nih ifian set tung loin pengtlang tiah an auhmi hna Zophei, Lautu, Dai le Hualngo tbk pawl min hrim khi va tlau te seh ti an duh caah a si. A takah cun atu i CDF vialte hi an base mi raktak le an pennak taktak cu pengtlang viar an si.
Ramkhel ah a ngan le hme an um hlei lo. An itluk dih. Phundang cun Chinmi sinak ah an itluk dih. Hriamhrei tu ahcun a thawng deuh le der deuh zong an um ko lai. Cucaah kan pupa chan in ka sining kha hrambunh in CNF nih Chin Nation Building ser an timhnak chan cu a si. Cucaah cun pei CNF lawnglawng Chinland huap in policy a ngeimi dohthlennak ramkhel buu kan ngeihmi a si kan tinak chan cu a si cu.
Hriam an va tlaih lo hmanh ah teinak kan hmuh ahcun CNF nih a kalpi thotho ding a si. Cucaah pei ramkhel ah siseh ralhrang tei fawinak caah siseh CNF/A ah lungrual tein ifun dih ko usih kan ti tawnnak a si cu. Tucu phaisa heu in hriam hmanh an va tlaih i nunnak zong an pek cang caah zei ti awk tha.
Nain hriam an va tlaih cang hmanh ah dohthlen caan tu ahcun CNA command tang tein an um hi teinak lam um chun a si. Um chun a si timi cu lamdang in cun teinak kan hmu lo hrimhrim tinak khi a si ko.
A donghnak ah CDF- Mindat le CNO te pawl an kalpi ning khi cu midang zei rel lo zong a si i tuanbia theih lo zong a si. Phundang in chim ahcun miphun ah hram bunh loin khua ah hrambunh mi ramkhel thurhnawm taktak a si.
A takah anmah bantuk in nuar hmang le midang zei rel loin um cio usihlaw CDF-Mindat le CNO fonh in Zophei hmanh an kan tei lai lo. Pathian tu nih kan umpi cio ko seh. CDF-Zophei ka uar chin lengmang hna. CDF-Thantlang zong ka upat taktak hna. Thinlung pical an ngei, tuanbia an thei i sining an cohlan.
CNO/CNDF aa timi Falam cheukhat hi, Falam ah an ri tuk cang i Falam khuachung i Vankau Veng timi kha le Zahau ram i Zongte le Tlauhmun lakkar hrawng khi “Falam Nation Capitol City” tiah independent ngan tarapi pek ding an si. Cun Chinram le Chin miphun kongah rak ithlak ve ti hna hlah seh.
Thencheunak lei in hmai an suang peng i milu an ri tuk cang. Vankau veng le Zahau cheukhat fonhmi ram cu vawleicung ram hme bik Vatican City nak cun ngan deuh thiam ko lai i an duh khawh men ko dahkaw. Bia a chim lio ah Zawngte bang kutvaih a thawng takmi an puber Peter Thang nih cun mah nak kau cu a uk zong a uk khawh hlei tung lai lo. Vankau veng kha mithlam in hei cuanter cio u law. Ngaih don ah.
Miphunpi lungrual an duh caah CNF/A nih kumhnih leng tiang lungsau tein mi a hngah. Kumhnih hnu zongah zei ai si hlei lo caah mipi zawnruah in Chinland Council dirh dingin Chin hriamtlaibu hna le ralhrang doh awkah aa thawh vemi MP hna sawm in rianhma a thok. Pengtlang hrambunh hriamtlai buu 18 lakah buu 16 nih lungtling tein an cohlan.
Chinland Council dirh awkah aa tel duhlomi cu CNO/CNDF aa timi Falam cheukhat le Chin a pomlomi ZFU/ PDF-Zoland lawng an si. Cu buu hnih te cu hriamtlai an dir hlan tein CNF/A cu Hakha ta a si tiah thil diklo in politics a play peng tu hna an umnak pengtlang an si.
Sihmanhsehlaw CNF/A nih siseh, pengtlang hriamtlai buu 16 nih ssiseh, ralhrang doh aa thawh vemi MP cheukhat nih siseh kan sawm rih ko hna lai tiah langsau tein lam an on piak hna. Nain an cohlan lo zongah Chinland Council cu kan kalpi thiamthiam lai tiah tuan hram an thok cang. Lawmh a um tuk.
Biahalnak a ummi cu CNO/CNDF hi sawm ah maw an that? Sawmlo lawlaw dah tihi a si. Kei cu sawm ka duh hna lo. Anmah an itel ahcun an zia a chuak peng lai i, a lung aa rual ciami pengtlang hriamtlai buu 16 le MP cheukhat kha thencheunak thlaici an vorh hnawh hoi hna lai i zeitik hmanh ah rian hma a kal lai lo. CJDC rianhma a kal khawh lo nak zong hi CNO/CNDF aa timi Falam cheukhat ruangah a si.
Sawm len zongah biakamnak phunkip pek an hau lai i hnahnok men an si. A fun ciami lehlam an kuaiter hna lai. Cu nak cun zeitindah kan det khawh hna lai i an lohtlau lai timi tu hi atu te hin itimh tuah awk a si deuh tiah ka ruah ko hih. A khi luala pawl tel lo ruangah Chinram zong a thangcho hlei lai lo. An duh le anmah tein independent mangtarapi zong la mei hna seh.
Kaltak an si cang lai caah; 1. NUG he an ipehtlaih khawh nakhnga lo CNF nih NUG he min an thutmi hmangin kham ding. 2. Tlangcung hriamtlai he pehtlaihnak an ngeih khawh nakhnga lo kham ding. 3. Anmah pawng i a ummi hriamtlai lila he an ipehtlaihnak a der khawh nakhnga lam kawl ding. 4. Kawl ralhrang le ZRA he an ihawikomh khawh nakhnga lam kawl piak hna in an ramkhel lam tlau ter ding. Credit: Aceu-Salai Sang Ceu Lian