ICBM riantuannak ah a biapi ngaimi pakhat!
==========
ICBM riantuannak ah a biapi ngaimi pakhat cu ngandamnak lei riantuannak hi a si. Mission fields cheukhat ah training kaitermi Nurse Aids pawl an si khawh chungin Bawi Khrih rian ah an i pumpe hna. ICBM program chungah Nurse Aid hi Medical Missionary tiah zong in auh an si. Atu ah Nurse Aids a tuan cuahmahmi sayama 20 an si.
Mission fields a herhnak hmun paoh ah kaa pumpe lai tiah Nurse Aid training kai dingin a rak sawkmi hi an dihlak 40 leng an si cang. Interview tuah an si lai i, pumpeknak taktak he misson riantuan a duhmi minung 25 hrawng thim in kaiter an si te lai. Atu tan cu Nurse Aid training lawng si loin Pharmacist Aid training zong kaiter chih an si lai. October 9, 2023 in cawnnak thawk te ding an si.
Yangon ah Nurse Aid le Pharmacist Aid training kainak zeimawzat an um nain ICBM program in cun ‘Thet Sann Yae Nurse Aid and Pharmacist Aid Training’ ah kaiter an si tawn. A ngeitu hna hi khrihfa an si i Pathian aa bochanmi le an si khawh tawk Pathian riantuan a duhmi an si. Mission field lei in ICBM Nurse Aid pakhat khat nih mizaw kong ah an hngalh khawh deuh lomi bawmh an rak hal tikah lungsau tein phone in an rak chimh tawn. Training an pek zong ah ICBM nih cawntermi pawl cu class dang tein (mission field ca ah) cawnnak an ngeihpi tawn hna.
Atu tan zong anmah sinah cawnter ding an si. An cawnnak ding kong he pehtlai in ICBM Myanmar Director Rev. Thla Tin Thang le Office Secretary Pi Khin Than Myint nih an zung ah an va leng i biaruahnak le i ceihmainak an ngei kho.
Pathian thawngin ICBM Rakhine field chung Khamaungtaw khua ah zumtu thar chungkhar pakhat kan hmuh. Kan i lawm tuk. Lamhruaitu Pathain min thiang kan thangthat! Bawipa nih zumtu thar chungkhar cungah a thluachuahnak tlunter sehlaw, zultu tha an si khawh naklai lam hruai ko hna seh!
Pathian dawtnak thawngin ICBM Rakhine field chung Zardimaw khua ah zumtu thar pakhat kan hmuh. Lamhruaitu Pathian min thiang kan thangțhat! Zumtu thar zong Bawipa nih zultu țha a si khawh naklai thluachuahnak he lam hruai hram ko seh!
ICBM Rakhine field Khamaungchetaing khua (Ramree peng) ah Pathian nih zumtu thar pakhat a kan hmuhter. Pathian min thiang kan thangțhat! Zumtu thar hi Rakhine mi a si i Ramree khuapi ah a ummi a si. Ramree khua le Khamaungchetaing khua hi an i naihte. Zumtu thar hi Khrih zultu țha a si khawh nakhnga Bawipa nih thluachuahnak he lam hruai hram ko seh!
Bawipa a țha! ICBM Rakhine field Yuu khua ah zumtu thar pakhat (kum 67) a kan hmuhter țhan. Lamhruaitu Pathian cungah lawmhnak in kan khat i a min thiang kan thangțhat! Zumtu thar cungah Bawipa nih a thluachuah tlunter sehlaw a zultu țha siter hram ko seh!
Pathian nih ICBM Rakhine field Yuu khua ah zumtu thar chungkhar pakhat a kan hmuhter țhan caah a min thiang kan thangțhat! Zumtu thar chungkhar zong Khrih zultu țha an si khawh nakhnga Pathian nih lamhruai ko hna seh!
Pathian nih ICBM Rakhine field chung Metaungcheyin khua ah zumtu thar chungkhar pakhat (Jesuh Khrih cu ka Khamhtu le ka Bawipa a si tiah a zummi; biaknak dangin Khrihfa ah a cangmi) a kan hmuhter țhan. Lamhruaitu Pathian min thiang kan thangțhat!
ICBM Rakhine field Metaungcheyin khua ah Pathian nih zumtu thar (Jesuh Khrih cu ka Khamhtu le ka Bawipa a si tiah a zummi; biaknak dangin Khrihfa ah a cangmi) a kan hmuhter caah A min thiang kan thangthat!
Pathian nih ICBM Rakhine field Yuu khua ah zumtu thar 2 (Jesuh Khrih cu ka Khamhtu le ka Bawipa a si tiah a zum i biaknak dangin Khrihfa ah a cangmi) a kan hmuhter than. A sunglawi tuk kan ti. Lamhruaitu Pathian min thiang kan thangthat!
ICBC sakpiakmi Than-htaung Boarding House Pathian sin pekchanhnak (hunnak): Indiana Chin Baptist Church (ICBC), USA hmang in ICBM Paletwa field chung Than-htaung khua ah Boarding House saknak caan tha a kan pe i aa lim tiang lam a kan hruai lawng si loin amah sin pekchanh thlacamnak (hunnak) caan tha a kan petu kan biak kan Pathian a min thiang kan thangthat!
Boarding House sawhsawh si loin Boarding School in kalpi kho te u si law, kan ram a that te tikah cun Private School tiang va si kho te seh law… timi saduhthahnak kan ngei. ICBM fields chungah hin fimnak lei bawmhchanh a herhnak hmun tampi a um. Cu chungah Paletwa field hi a herh khun tiah kan hmuh. Paletwa field chung hmanh ah hin Laymyo area (Than-htaung khua pawnghrawng) hi a herh khun tiah kan hmuh.
Biaknak dang sin in zuamcawhnak a tamnak hmun, a hlei in fimnak lei ah zuamcawhnak a umnak bik hmun zong a si. Cucaah, ICBC khrihfabu nih dawtnak le zawnruahnak he hi project hi an i tlaih i inn pahnih sak dingmi chungin a voi khatnak ah main building sakpiak dingin budget an suai.
Kan ram buaibai lio a si lengah tlunkal a har tuknak le thilri phorh a har tuknak Than-htaung khua ah hi innpi sak ding cu thil har ngai in ruah a rak si. Sihmanhsehlaw, Pathian nih lam a kan hruai. Anmah Laymyo Area i zumtu tete zong an i lawmh tuk caah an kut bak in innhmun an cawh, tlangrian an tuan. Noggin in sak ding a si caah thing a tha deuhmi ah khawhnak lam an i zuam. Innsak tuanvo lak hrim hi ngamh a um lo tuk. Nain, Pu Ram Hup Lian nih Pathian rian kan tuan a si ve tiah innsak tuanvo a lak than i thil sining zoh in Rakhine zungthiam deuh a hman hna.
Myauk-oo (Mrauk-U) tiang lawng motor ngan nih innsaknak thilri a phorh khawh. Myauk-oo in Laymyo tiva (Lemro tiva) pawng i a ummi Sin-oo khua tiang motor hme deuhmi in thiar a si. Cun seh bunhmi lawng (set-hle) in Than-htaung khua pawng tiva kam tiang thiar a si fawn.
Tiva kam in Than-htaung khua chung innsaknak hmun tiang minung nih keng in phorh (thiar) a si rih fawn. Cucaah, innsaknak hmun tiang mirang vawilei dip khat ah 29,000MMK hrawng in a phan. Thil man nih a kai, a hmun tiang thil thiarnak ca ah phaisa tampi a dih rih. Thil har ngai a si nain ICBC khrihfabu nih siaherhnak he a si khawh chungin tlamtlinter aa zuam. Cucaah Pathian nih a kan zoh sawhsawh lo. Aa lim tiang lam a kan hruai. Pathian dawtnak a sunglawi hringhran!
Innsak aa lim hnuah Than-htaung khua pawng khua pakhat i a ummi, kum upa ngai a si cangmi, tarnu pakhat cu innsakmi zoh ah a rak i thawh i ” Hi bantuk inn tha pi kan fale caah sakpiakmi ka hmuh hnu hin cun ka thih zong ah kaa lung sakl cang lai…” tiah a lunglawmhnak langhternak caah a chim.
Hi innpi cu kan miphun chungin mifimthiam tampi an chuah khawhnak hmun, mi tampi nih Pathian dawtnak an hngalhnak hmun le Pathian sunparnak a langhnak hmun a si khawhnak lai Pathian nih thluachuah pe hram ko seh! Hi innpi a sakpiaktu ICBC khrihfabu cungah kan i lawm tuk. ICBC khrihfabu chungkhar vialte Pathian nih a sunparnak caah hmang chin hna sehlaw, thluachuahnak chap chin ko hna seh! Amen. ICBM – International Chin Baptist Mission