Suimilam 6 Chung Ah Mocha Cyclone Thlichia A Zual Kho!
================
Bangladesh nichuah thlanglei in aa semmi Cyclone Mocha thlichia cu suimilam 6 chung ah thazaang a ṭhawng ngai mi Cyclone thlichia ah a cang kho i, May 14 ah Bangladesh ram Cox’s Bazar le Rakhine ramkulh, Kyaukphyu kar Sittwe khuapi pawng tiang a phan kho, tiah khuacaan tuaktantu hna nih nihin May 12 zinglei ah an thanh.
Mocha thlichia cu suimilam pakhat ah meng 60-70 tiang a kal kho, tiah zumh a si. India khuacaan tuaktantu zung nih, Mochia thlichia cu nihin May 12 zinglei in a thazaang a ṭhawng chin khomi a si i, meng khat ah 135 tiang a hrang kho, tiah an ruahdamh. Mochia thlichia cu Rakhine ramkulh, Chin ramkulh, Ayeyarwaddy ramṭhen, Magway ramṭhen le Sagaing ramṭhen tiang a phan lai, tiah khuacaan tuaktantu Win Naing nih a chim.
Kalay Sianghleirun Pawng Um Tualchung Mi Hna Cu Mahle Inn Cio Hlam Ṭhan Ding In Theihter An Si; Sagaing ramṭhen, Kalay peng, Kalay sianghleirun pawng um tualchung mi hna cu CDF CDM Siyin nih khua chuahtak chung ding in an rak chimh hna hnu ah Kalay sianghleirun ah umhmun a khuarmi SAC ralkap le Khaikam palik sakhan cu CDF CDM Siyin nih an kah, tiah theih a si.
May 11 zinglei suimilam 6:00 hrawng ah Kalay sianghleirun catar pawng ah umhmun khuarmi SAC ralkap le Khaikam palik sakhan um SAC ralkap hna cu lamhlat kahnak hriamngan zun 10 in kan kah hna, tiah CDF CDM Siyin nih an thanh.
“May 11 zing suimilam 6:00 tluk ah hriamngan zun 10 in kan kah hna i, SAC ralkap a thimi le aa hliammi an um le um lo cu kan thei kho rih lo. Tualchung mi hna zong anmah le inn panh ṭhan cang ding in kan thanh hna,” tiah CDF CDM Siyin in ṭuanvo ngeitu pakhat nih a chim.
Thawng kan rak thanh bantukin khua a chuahtak chung mi mipi cung ah kan i lawm tuk. May 11 zing suimilam 10:00 hrawng in ralhrial mi hna cu an umnak inn le lo an panh kho cang, tiah CDF CDM Siyin nih cathanh an chuah.
SAC Ralkap Nih Paletwa Ralhrial Mi Hna Cu Facang Pi 10 Le Kyats 4,200 Cio An Bawmh Hna; Chin ramkulh, Paletwa khua um ralhrial chungkhar 602 cu SAC kuttang department kip nih May 11 ah tangka le facang an bawmh hna, tiah zalen nih an ṭial.
Social Welfare Relief and Resettlement Department nih minung pakhat ah zarhhnih tiang ei khawh dingin phaisa 4,200 cio an bawmh hna. Ministry of Border Affairs nih chungkhar 602 cu eidin dangdang an bawmh ve hna, tiah theih a si. Cu bawmhchanhnak cu Paletwa Kimu Hall ah SAC Battalion le zungkip rianṭuantu hna i bawm in an pekchanh hna, tiah theih a si.
SAC Ralkap Nih Nyaungpinthar Khuami 17 Cu A Bu In An Khangh Hna! Bago ramṭhen, Htantapin peng Nyaungpinthar khuami ngakchia 7 telh in tualchung mi 17 cu SAC ralkap nih mei in an khangh hna, tiah PDF in ralkap pakhat nih a chim.
May 10 zinglei suimilam 10:00 in zanlei suimilam 5:00 tiang Nyaungpinthar khua pawng ah SAC ralkap le KNU, PDF kar kahdohnak a chuak i SAC ralkap 20 an thi, ralbawi pakhat telh in ralkap 3 an tlaih hna. SAC ralkap lei a thimi an tam caah ngakchia 7 telh in tualchung mi 17 cu mei in an khangh hna, tiah theih a si.
“May 10 zing suimilam 10:00 in zanlei suimilam 5:00 tiang kahdohnak voi 5 a chuak i SAC ralkap 20 nak tlawm lo an thi, 10 hliamhma an tuar. A thimi an tam caah tualchung mi 17 cu a bu in mei in an khangh hna,” tiah PDF in ralkap pakhat nih a chim. Credite;The Chin Post