𝐊𝐚𝐧 𝐝𝐨𝐭𝐡𝐥𝐞𝐧𝐧𝐢𝐧𝐠 𝐭𝐡𝐚𝐳𝐚𝐚𝐧𝐠 𝐜𝐮𝐚𝐢𝐭𝐡𝐥𝐚𝐢𝐧𝐚𝐤 𝐭𝐡𝐢𝐥 (𝟓)
===========
Vawleicung hriamtlai in dothlennak tuanbia zoh tikah an teinak a biapi a ruang, an sunghnak a biapi a ruang pawl hi ramkhel thiamsang pawl nih tampi an khawmhsuat. Mah tampi lakah a biapi cemmi timi thil (5) ka thim i kan dohthlennak ka van cuanh.
𝐌𝐢𝐩𝐢 𝐭𝐭𝐚𝐧𝐩𝐢𝐧𝐚𝐤 (𝟏𝟎/𝟏𝟎); Ralkap nih nawlngeihnak a lak hnu ah tlangcung ramkhel party siseh, hriamtlai siseh hnawhsare in bia a ruah hna, a sermi cozah ah hmunhma a pek hna. Ai ruahning ah NLD tha tthawnnak Kawlrawn ahcun mipi an buai ko lai asinain tlangcungmi pawl kan deihter hna ahcun chikkhat tein an dai lai tiah ai ruah.
An i ruahning a palh cikcek. Miphun kip in ralkap nawl a lakmi cungah duhlonak an langhter, lam ah an chuak, CDM an tuah, a donghnak ah mipi thazaang lila in CDF, PDF, LDF tbk tampi a van chuak. Nihin tiang NUG siseh, hriamtlai bu ther pawl (CDF, PDF le LDF) pawl hi mipi thazaang in an dir rih. Kan mipi thazaang kan chuahnak cu 10 ah 10 bak si.
𝐑𝐚𝐦𝐝𝐚𝐧𝐠 𝐜𝐨𝐳𝐚𝐡 𝐛𝐚𝐰𝐦𝐡𝐧𝐚𝐤 (𝟒/𝟏𝟎); Ram pakhat ah cozah cuh a um tikah ramdang bawmhnak hi a biapi ngai. Meithal bawmhnak, chawva bawmhnak, umnak hmun peknak pinah chanthar ahcun ramdang cozah nih chawkhellei phih (sanction), an ttanh lomi cozah pom piak lo le nuhrin covo (human rights) ah doh hi an i la bikmi cu a si. Nihin kan dothlening ah a bau cemmi cu ramdang bawmhnak hi a si.
US hi mipi lei ah a ttang cem cu a si, nain Ukraine a bawmning le Afghanistan tbk a bawmhning he cun tahchunh awk kan tha lo. Cu pinah, US a hawikom ngai simi India, Thailand, le Japan hrim hi ralkap lei an i benh ngai. Kan dothlennak ah lutlai simi pawl nih Ukraine a bawmhmi 1% hi rak kan bawm sehlaw kan duhning in thil tampi a kal lai an ti.
𝐇𝐫𝐮𝐚𝐢𝐭𝐮 𝐭𝐡𝐚 (𝟔/𝟏𝟎); Mipi a hihuap khomi, upat tlak, ai pumpemi hruaitu hi a bikin hriamtlai dothlennak ahcun a biapi ngaimi a si. Nihin kan dothlennak ah an chim ngaimi pakhat cu Zalensky bantuk in hruaitu kan ngeih a hau timi hi pakhat a si. Duwa Lashi La hi a pawngkam ummi nih mi nunnem, mi ziatha, chawnbiak thiam tiah an chim thiam ngai. Asinain, hriamtlai dothlennak ahcun mipi tampi a huapmi (asiloah) hriamtlai bu lei in upa nih hin rak kan hruai sehlaw a tha tiah ka ruah.
𝐋𝐮𝐧𝐠𝐭𝐡𝐚𝐰𝐧 𝐥𝐞 𝐭𝐡𝐢𝐥 𝐬𝐢𝐧𝐢𝐧𝐠 𝐝𝐚𝐰𝐢 𝐤𝐡𝐚𝐰𝐡 (𝟖/𝟏𝟎); Hriam dothlennak hi ruahning nakin a caan sau kho pinah ruahlomi thil tampi ton khawh a si. Cu tikah, lungthawn le thil sining dawi khawh hi a biapi taktak mi a si. CDF, PDF le LDF pawl hi mipi kilven hau, ralkap thlak a hau timi lungthin he pumpe in hriam a tlaimi an si.
Tlangcung hriamtlaibu (EAO) pawl nih an van dirhkamh hna tikah duhsah in meithal an chuah, drone an van hman, milu an karh, bu hruaining duhsah in a fek i meithal zong nihin ah tampi an van ngei kho. Cu pinah, ralkap pawl kha CDM tuah hna seh tiah a phunphun in an van lem hna. Khatlei ah Min Aung Hlaing ralkap pawl cu chawva le nawlngeihnak duh ruangah raldohmi an si tikah an van harsat deuh, an thin phan deuh paoh ah zaam le CDM mit an kawl. Mah hihi kan tei biknak a ruang cu a si.
𝐇𝐫𝐮𝐚𝐢𝐧𝐢𝐧𝐠 𝐟𝐞𝐤𝐦𝐢 (𝐂𝐡𝐚𝐢𝐧 𝐨𝐟 𝐂𝐨𝐦𝐦𝐚𝐧𝐝) (𝟔/𝟏𝟎); November 2021 tiang cazin ah CDF, PDF le LDF hi phu 309 an si. Duhsah in NUG nih a kuttang ah a fekdeuh a van khumh hna, asiloah amah he ai pehtlaimi EAOs kuttang ah a van khumh hna i April 2022 tiang ah NUG hriamlei vuanci nih ralkap milu 50,000-100,000 kar hi kan kuttang an um cang ti si. Ramkhel lei nih cun PDF milu hi 65,000 fai an si kho tiah an ruahdamh. NUG tangah a cawlcang lomi hriamtlai milu hi 30,000 fai a si kho tiah an ruahdamh.
NUG tangah hriamtlai thar I benh dih a harnak hi chawva tha te bawmh khawh lo, NLD nih NUG a uktuk timi ruahnak le tlangcung hriamtlai (a bikin China he ai pehtlai deuhmi) cheukhat pawl nih anmah kuttang khumh an rak I zuam ve hi a si. NUG nih a rak i ruahmi Federal Army hi cu a practical tuk lem lo, mah nakin EAOs tam deuh hnatlaknak ngeihmi, PDF dihlak ngawt hi anmah kuttang luhter hi a practical cemmi cu a si. Credit: Lian Bawi Thang
Note: 𝑻𝒉𝒆 𝑫𝒊𝒑𝒍𝒐𝒎𝒂𝒕 𝒂𝒉 𝒌𝒂 𝒕𝒊𝒂𝒍𝒎𝒊 𝒄𝒉𝒖𝒏𝒈 𝒄𝒉𝒆𝒖𝒌𝒉𝒂𝒕