Zualko: US ah Lai Nutung Hri-awhnak in a Nunnak a Liam

US ah Lai Nutung Hri-awhnak in a Nunnak a Liam
——
Nihin zinglei (Myanmar caan) ah US ram, Iowa ah a ummi Pi Sung Hlawn cu hri i awhnak in a nunnak a liam, tiah thawng kan theih. Pi Sung Hlawn hi fa pathum a ngeimi a si i, Hakha, Gangaw lam sang i a chungkhar inn ah tthutpinak zong nihin ah an tuah. Zei ruang ah dah hri-awhnak in amah tein a nunnak aa lak timi fiang in theih a si lo. The Chin Journal

Kalay ah a Nunnak a Liammi Thang Hawm Lian le Sangte Ruakvuinak an Tuah. Nizan Tahan ah Myanmar SAC ralkap le Tahan lamzawhtu karlak kahdohnak ah lamzawhtu lei in a nunnak a liammi Sangte le Thang Hawm Lian ruakvuinak cu nihin ah Khrihfa phung in an tuah hna.

Nihin Zinglei Hakha ah Nu 4 le Pa 2 an Tlaih Hna. Tu zing Hakha ah ralkap uknak duhlonak zing tuan tein an langhter. Lamzawh dih ah ralkap le palek nih hmunhma an lak i lam an kham hna. BEHS No. 1 sianginn pawng Lakphak dawr pakhat ah an luh hnawh hna i nu 4 le pa 2 an tlaih hna. Mei thal zong voi 6 an puah, tiah kan theih.

Thantlang ah an Tlaihmi hna Pafa Pohma No. 505 in Taza an Cuai Hna. March 27 zaan ah Thantlang ah an tlaihmi hna Pu Tial Ceu le a fapa Salai Van Hmun Sang cu pohma no. 505 in taza an cuai hna, tiah thawng kan theih. March 27 zaan ah Thantlang ah minung 4 an tlaih hna i Pastor Ngun Thawng Lian le Pu Tial Cung cu a thaizing March 28 ah an thlah tthan hna.

Lawngtlai ah Myanmar Ralkap Uknak Duhlo Lamzawhnak an Tuah. Mizoram, Lawngtlai hrambunh Central Young Lai Association (CYLA) hruainak in nihin March 29 ah Myanmar ralkap uknak duhlonak le CDM dirkamh lamzawhnak an tuah.
Lamzawhnak hmun ah Lai Women Association, Lawngtlai zong nih an telpi hna, tiah kan theih.

Hakha Mann Motor Mongtu Ko Sai Kyaw Kyaw Hakha Gate ah an Tlaih. Hakha Mann khualtlawng motor mongtu a simi Ko Sai Kyaw Kyaw cu March 26 ah Hakha Gate ah ralkap le palik nih an tlaih, tiah thawng kan theih. Ko Sai Kyaw Kyaw nih a monghmi Bus chung ah lamzawhtu hna hmanmi thilri (Gas Mask) pawl an hmuh caah tlaih a ton hi a si.

Ko Sai Kyaw Kyaw i a nupi nih, “Gate ah an check i a motor ah Gas Mask tibantuk an hmuh. Mah thilri pawl a phortu nu rak pehtlai u law zaanlei suimilam 5:00 hlan ah rak chuahpi u tiah palik nih a kan ti. Asinain, thilri a ngeitu nu kan chawn kho lo. Voi khat cu phone a tlaih nain mah hnu cun a tlai ti lo,” tiah The Chin Journal ah a chim.
Ko Sai Kyaw Kyaw hi Hakha palik sakhaan ah an hren i, sualphawtnak pohma no. 505 in taza an cuai. Aralaimi April 9 khi biaceih zung ah cuahpi ding a si.

Ko Sai Kyaw Kyaw an tlaih lio ah a hawipa pakhat an tlaihmi a um ve. Asinian, aho a si timi kan thei lo, tiah Ko Sai Kyaw Kyaw a nupi nih a chim chap. The Chin Journal