Zualko: Ralhraang nih khuami minung 11 an nun bu in mei in an khangh hna!

Salinkyi peng, Dungtaw khua ah Council ralhraang nih khuami minung 11 an nun bu in mei in an khangh hna
==========
Sagaing ramthen, Salinkyi Peng, Dungtaw khuami minung 11 cu December 7 zing suimilaam 8:00 hrawng ah ralhraang pawl nih an hnulei kuttem bu in, mei khangh in an thah hna tiah tualchung mi nih Yangon Khit Thit Media ah an chim.

“Ralhraang pawl hi zing suimilaam 8:00 hrawng ah Shwetaungkung in an rak tum. Khua khat hnu khua khat in an lut i thilri an hrawh dih. Pintayah khualu ah khuami pakhat an thah. Khua dang lei kal an i tim i hlei cung an um lio ah bomb a puah caah ralhraang nih pawngkam khua pawl hriamngan in an kah.

Dungtaw khua an luh hnawh hna. Khuami 11 an tlaih hna, an hnulei ah an kut an tem hna i an nun bu in mei in an khangh hna. Dungtaw khua mi an si lai zumh a um bik. Khua in an chuak i Layngyin taung ah umhmun an khuar. Khuami an zaam dih cang” tiah tualchung mi pakhat nih Yangon Khit Thit Media ah a chim.

Salinkyi peng i khuami pakhat zong nih, ralhraang pawl nih khuami minung 11 an nun bu in an hnulei kut tem he mei in an khangh hna i an aihram thawng ka theih nain ka bawm kho hna lo tiah Yangon Khit Thit Media ah chim.

Ye-Mawlamyaine lam ah ralhraang motor bomb puah an tong, pakua an thi pakhat hma a pu. Ye peng in Tanphyuzayet lei ah a kal mi ralhraang motor pakhat cu Lingmawchain khua le Aungtapyi khua kar December 7 zing suimilaam 8:30 hrawng ah bomb in kan puah hna tiah Ye PDF nih an chim.

Ye peng Aungtuhkha Zayet pawng ah bomb puah hi a si i ralhraang pakua an thi pakhat hma a pu tiah an chim. Dai tein duhnak a langhtertu mizapi kha ralhraang pawl nih minung tluk lo in an thah hna mi cung ah lehrulnak kan tuah mi a si i hramhram uknak a dongh hlan lo kan doh peng lai tiah an chim.

Meiktila pengkomh PDF phuli fonh nih Yangon-Mandalay lam cung um Kankaung palek buuk an kah, palek pathum an thi i pasarih hma an pu. Mandalay ramthen Meiktila pengkomh Yangon-Mandalay lam cung um Kankaung palek buuk cu Meiktila peng komh PDF phu li fonh nih an kah hna i palek pathum an thi, panga hliamtuar an um tiah tualchung PDF nih an thanh.

December 7 zaan suimilaam 12:15 hrawng ah Meiktila pengkomh PDF phu li fonh nih luhhnawh in kahdohnak an tuah hi a si tiah kan theih. Kankaung palek buuk le sakhaan hi Yangon-Mandalay lam mengtung 293/2 i a um mi palek sakhaan a si. Credit: Khit Thit Media, The Hakha Post