Zualko; Pu Lal Ding Lian (38) a nunnak a liam e!!

Matupi, LayMyo Tiva Ah Bomb Lamh Sual Ruangah Pa Pakhat A Nunnak A Liam!!
====================
Chin ramkulh, Matupi khuapi, nichuah lei sang ah a um mi Pu Lal Ding Lian (38) cu, October ni 10, zing lei suimilam 11:00 hrawngah a tawlreba lo chungah bomb aa lamh sual caah a nunnak a liam, tiah tualchung mi an chimnak in theih a si.

Matupi khuapi, LayMyo (လည်မြို_ tiva hlei pawngah a um mi tawlreba lo chungah thianhlimhnak a tuah cuahmah lio ah bomb aa lamh sual caah a kee khat lei a tan (kiak) i a thi tamtuk a chuah caah a nunnak a liam hi a si, tiah kan theih.

Laymyo tiva pawngkam ah SAC ralhrang nih ralram an siam nak a si caah SAC ralhrang nih remh mi a si lai, tiah an chim. Bomb lamh sual ruangah a nunnak a lim mi Pu Lal Ding Lian (38) nih an nu le a fa le pa 3 a tantak nak hna, tiah kan theih. Tangtak mi chungkhar Bawipa nih hnem ko hna seh.

Matupi Ah Meithal Puah Thawng A Thang, Chin ramkulh, Matupi khuachung Laungvan sang Laymyo(လည်မြို) tiva lei ah ummi SAC ralkap sakhan pawng ah nihin October 10, zaanlei suimilam 7:50 hrawng ah meithal puah thawng minutes 10 tluk hrawng a thang tiah theih a si. CDF-Matupi le SAC ralkap kar kahdohnak a chuah le chuahlo kong ah fehternak tuahmi a um rih lo. Matupi khuachung ah SAC ralkap nih phone line an thah caah pehtlaihnak tuahkhawh an si lo.

Matupi Le Paletwa Ah Phone Line A Pit, Chin ramkulh, Matupi ah October 9, zinglei in phone line dihlak a pit i, Matupi ah zeibantuk phone line hmanh a tutiang ah pehtlaihnak tuahkhawh an si rih lo tiah theih a si. Cun Paletwa zong ah nizaan October 9, zaanlei in phone line an pit tiah theih a si.

Matupi ah cun SAC ralkap nih phone line atu le tu in an thahpiak hna caah, tualchung um mipi hna cu pehtlaihnak tuah an har tiah theih a si. Matupi khuachung ummi hna nih an chim ning ah Matupi hrambunh khah-lah-yiah 304 in ralkap 5 an zaam tiah bia chawkvai a len hnu caah a tubantuk in phone line a thih hi a si tiah an chim na in, SAC ralkap an zaam le zaamlo kong ah fehternak tuahmi a um rih lo.

Ramdang Kal Aa Timmi CDM 2 Cu Yangon Vanlawng Tual Ah SAC Ralkap Nih An Tlaih Hna, October ni 9, Yangon vanlawng tual ah ramdang kal ding in aa timmi CDM tuahmi 2 cu vanlawng an hngah lio ah SAC ralkap nih an tlaih hna tiah theih a si. Tlaih a tongmi CDM tuahmi hna hi Mahlaing peng siangniam ruun cachimtu U Aye Kaung le Yangon medical university lecturer Daw May Htu Kyaw hna an si.

CDM an tuah ruang ah an tlaih hna hi a si. Aluancia September thla zong ah sianginn cachimtu pakhat cu vanlawng tual ah an rak tlaih bal cang nain a phone le computer ah ramkhel kong zeihmanh a tarlanghmi um lo caah phaisa an hal i an rak thlah ṭhan tiah CMD lei tawlreltu pakhat nih a chim.

SAC ralkap nih CDM tuahmi min cazin pawl cu vanlawng tual le ramri checkgate kip ah an pek hna i an rak tlaih lengmang hna. An tlaihmi hna cu an hrem hna hnu ah rianṭuan ṭhan ding in min an thut ter hna i rian ah an luhter ṭhan hna. A cheu phaisa ngeimi nih cun kyat sing 50-100 kar an pek hna i an thlah ṭhan tawn hna tiah theih a si.

Monywa Myanmar Economic Bank Hmai I Humhimnak La Mi SAC Ralkap Bomb Puahhnawh An Ton Caah 2 An Thi, Sagaing ramṭhen Monywa khuahelnak lam ah um mi Myanmar Economic Bank hmaiah humhimnak a latu SAC ralkap cu tualchung hriamtlaiphu nih kutcheh bomb an puahhnawh hna caah SAC ralkap 2 an thi tiah theih a si.

Myanmar Economic Bank hmaiah humhimnak la mi SAC ralkap pawl cu October ni 9 zaanlei suimilam 2:35 ah Myanmar’s Royal Dragon Army (M.R.D.A) battalion 6, tatkhuai 2 nih kutcheh bomb in kan doh hna caah SAC ralkap 2 an thi tiah M.R.D.A nih cathanh an chuah. Cu kahdohnak ah cun tualchung hriamtlaiphu lei in hliamtuarnak um lo tein hnu an tolh kho tiah theih a si.

Maungdaw Ah SAC Ralkap Kuttang Um Ramri Hngak Ralkap Sakhan AA Nih An Lak, Ralkap 30 An Thi, Rakhine ramkulh, Maungdaw chaklei ramri hngahnak SAC ralkap sakhan Laityiah(လိပ်ရ) cu Rakhine ralkap AA nih October 10, deilei ah an lak tiah AA lei nih fehternak an tuah tiah theih a si.

Cu sakhan kahdohnak ah SAC ralkap lei duh-ṭat-yin-hmu telh in ralkap 30 an thi, 14 an tlaih hna, cun AA lei zong in a nunnak a liammi an um ve tiah theih a si. “Cu ka sakhan ah cun hriamthil zei maw zat kan lakmi a um, cun tlaihmi zong an um, hriamthil lakmi le tlaihmi hi a zat fiang tein theih a si rihlo” tiah U Khine Thu Khah nih cun a chim.

Maungdaw chaklei ah AA nih August 30 ah mengtung 40 pawng umni ramri hngak sakhan, September 11 ah khah-mah-yiah 352 sakhan le September 15 ah Mitait(မီးတိုက်) khuapawng SAC ralkap hriamngan chiahnak sakhan cu an rak lak i tutan ah Laityiah(လိပ်ရ) sakhan an lak ṭhan hi a si.