Zualko; Mipi ralkap minung 13 lengluang nih ram le miphun caah an nunnak an peek than!!

Myaing peng ah kahdohnak a fak, SAC ralkap 34 an thi, PDF 3 an nunnak a liam+ Myinmu, Latpankyin khuate cu SAC nih vanlawng in a kah, mipi 8 le PDF 10 an nunnak a liam
=======================================

Magway ramṭhen, Myaing peng, August 6 zinglei ah SAC ralkap, pyusawhtee le mipi hriamtlai phufonh karlak ah kahdohnak a chuak i SAC ralkap 34 an thi, PDF 3 an nunnak a liam tiah theih a si. Myaing peng, Twunma khua ah SAC ralkap le Pyusawhtee pawl training an ngei i adang khua pyusawhtee pawl zong an rak phan timi thawngpang theih a si caah August 6 zinglei sml 5:30am hrawng ah mipi hriamtlai phufonh nih an i relh lo kar ah an kah hna i SAC ralkap le pyusawhtee 34 an thi, tampi an i hliam tiah PDF-Myaing sin in theih a si.

Cun, kahdohnak bawmh ding ah a raami cycle 7 zong bom an puah hnawh i 3 a rawk, 4 an zaam i 2 an luat tiah theih a si. Pyusawhtee training a kaimi pakhat nih a chimnak ahcun SAC ralkap 38 an thi i 27 Pakokko sizung an phan tiah DVB nih a langhter. PDF-Myaing in hriamtlai 3 an nunnak a liam i 5 nih fak tuk loin an i hliam. Cuka hmun kahdohnak cu PDF phu 10 fonh nih an tuahmi a si caah SAC ralkap 34 an thi i tampi an i hliamnak hi a si tiah PDF-Myaing battalion commander nih DVB ah a chim.

Myinmu, Latpankyin khuate cu SAC nih vanlawng in a kah, mipi 8 le PDF 10 an nunnak a liam, mipi thilri tampi a rawk
Sagaing ramṭhen, Myinmu peng, Latpankyin khuate cu SAC ralkap nih August 1 ah vanlawng in a kah i khua chungah SAC ralkap lut in methal an puah caah mipi 8 le PDF 10 an nunnak a liam tiah Myinmu Revolution Force nih a thanh.

SAC ralkap nih Latpankyin khua cu van lei le vawlei lei in kahdohnak a tuah i Latpankyin khuami 7, Kanyin khuami 1 kah an tong i PDF 10 zong an nunnak a liam, Auto methal 8 le bom kahnak 1 zong chuh an si tiah theih a si.
SAC ralkap pawl nih Latpankyin khua sianginn tual chungah an awnmi KG siahngakchia, saya/mah le khuami 100 leng cu ni 2 chung khamhnak ah an tlaih hna i sianginn, hall, sii dawr pawl zong an hrawh dih lengah mipi inn 15, mawṭaw le cycle pawl zong an hrawh i mipi ngeihmi thilri zong an fir dih tiah a thanh.

Kachin Ramkulh, Seyin Khua Pawng SAC Ralkap le KIA/KPDF Kar Kahdohnak Ah Ralkap 10 An Thi! Kachin ramkulh, Hpakan(ဖားကန့်) peng, Seyin(ဆယ်ယင်း) khua pawng um SAC ralkap sakhan le SNA (ရှမ်းနီ) ralkap sakhan cu KIA le KPDF phufonh nih an kah hna caah Kahdohnak a chuak. Cu kahdohnak ah cun commander 1 telh in SAC ralkap 10 an thi i hriamthil zong zeimawzat an lak, tiah KPDF le KIA nih an thanh.

Tuzing August 8, sml 5 hrawng ah kahdohnak cu a chuak i, SAC ralkap le SNA ralkap pawl nih cun an sakhan an chuahtak hnu ah KPDF le KIA phufonh hna nih mei in an khangh, tiah theih a si. KIA thawnglatu nih hriamthil an lak mi cu M-22 pathum, MA-1 pakhat, MA-2 pakhat, M-23 pakhat, M-16 pakhat, 60 mm pakhag, RPG pakhat, Sniper pakhat le bomb lung zeimawzat hna an si, tiah an thanh.

Yephyo Peng Ah Nuva Pahnih Le An Tupa Kum 6 Ngakchia Tlaih An Tong!: Tanintharyi ramṭhen, Htarway pengkomh Yephyo peng Kyaukdaung(ကျောက်ထောင့်) khua ah kum 6 ngakchia telh in tualchung mi pathum cu, SAC ralkap nih August 6 ah an tlaih hna, tiah tualchung mi sinin theih a si. Tlaih a tongmi hna cu Tin Soe, Htun Ngi le an tupa Kaung Myat Phyo an si, tiah theih a si.

Yephyo khuami pakhat nih cun, “SAC ralkap cu an ra i, an inn chung ah an lut. An pathum ning tein an tlaih hna,” tiah a chim. Tlaih a tongmi cu nuva hna cu an tar ngai cang. An tupa cu kum 6 hrawng te lawng a si rih, an pathum in Yephyo palik sakhan ah an chiah hna, tiah theih a si.

Myaikyina, Shwe Aik Sang, Kuva Dawr Ah Nam Sawhnak A Chuak! Kachin ramkulh, Myitkyina(မြစ်ကြီးနား), Shweaik(ရွှေအိုက်) sang ah nizaan August 7 zaan sml 9 hrawng ahkhan kuva zuartu nu pakhat cu kuva a rak cawtu pa pahnih nih hman an thlak caah nungak nu i a tlangval pa nih kuva a cawtu pa pahnih cu nam in a sawh hna, tiah khuami nih an chim.

Kum 30 tluk a simi Ko Aa Phu Soe (ကိုအားဖူဆို) cu a ṭaang ah hliamh a si i, kum 30 tluk a simi ṭhiam Ko Di Yaw Swel(ကို ဒီယောဆဲလ်) cu a ṭaang le a paw ah hliamh a si. An pahnih in Myitkyina Hospital ah an kalpi hna, tiah theih a si. Ko Aa Phu Soe cu cu August 8 tuzing ah a nunnak a liam, tiah theih a si. Cu kong he pehtlai in nam sawhtu Kum 26 mi, Ko Aung Paing cu Section-312 in thong an thlak, tiah theih a si.

Ukraine Raltuknak Ah N. Korea Nih Russia Bawmh A Duh! Ukraine raltuknak ah Russia bawm ding in N. Korea nih a ralkap sing khat kan in bawmh hna lai, tiah Russia ram media hna nih an langhter. Ukraine raltuknak ah N. Korea ralkap sing khat cu nanmah bawm ding in timhcia kan si an ti, tiah Russia military expert Igor Protsenko nih a chim.

N. Korea ralkap hi miakpi(Artillery) kah a thiam tukmi an si, tiah Igor nih a chim i, US nih Ukraine cu HIMARS Missile kahnak hriamnam pek ding in biachahnak a rak tuah caah Russia cu thinphang ngai in a um. HIMARS Missile kahnak hriamnam cu Ukraine ralkap nih an hman caah Russia ralkap pawl cu an lung tha a zor ngai, tiah raltuknak kongkau tuaktan thiam hna nih an chim.

Cucaah miakpi kah thiam mi N. Korea nih Ukraine kah a duh ko ahcun Russia nih kan cohlan awk a si ko, tiah Igor nih a chim. N. Korea nih ralkap singhra leng a ngeih hna i, a herh caan ah auh khawh ding in aa chiahmi ralkap (reserve) hi singruk hrawng an um rih. N. Korea nih Ukraine ram nichuah lei Donbass ah rianṭuantu 1000 leng thlah a timh hna, tiah Daily NK nih a langhter ve.