Ni 9 Chung ah Salingyi Peng Tualchung Mi 14 Thah An Tong, 30 Leng SAC Ralkap Nih An Tlaih Hna!
=========
Sagaing ramṭhen, Salingyi peng, Nyaungpingyi khuakomh ah tualchung mi 14 cu SAC ralkap nih an thah hna pin ah minung 30 leng an tlaih hna, tiah mino phu hruaitu in ṭuanvo ngeitu pakhat nih Khit Thit Media ah a chim.
SAC ralkap pawl cu Nyaungpingyi sakhan an phanh hnu in sualnak ngei lo tualchung mi hna cu a ruang um lo in an thah hna. June 11 in June 19 tiang ah tualchung mi 14 thah an tong i hliamhma tuar mi zong an tam, tiah khuami hna nih an chim.
“SAC ralkap nih ni 9 chungah minung 14 nunnak an lak pinah 30 leng an tlaih hna. Tlaih a tong mi hna hi Hnintaw khua le Htantaw khua mi deuh an si” tiah tualchung mi pakhat nih a chim.
June 14 ah khan Nyaungpinkyi sakhan pawng ummi Htantaw khua chaklei ah thilri a thiarmi Htantaw khua mi hna cu SAC ralkap nih an kah hna i cu ni ah cun minung 10 hrawng an thi. Nunnak liam mi hna chungah minung 2 ruak lawng lak khawh a si i, a dang a tangmi ruak cu an la kho lo, tiah theih a si.
Tualchung mi pakhat nih cun, “June 11 zaanlei zong ah khan Htantaw khua pawng ah SAC ralkap nih tualchung mi 2 an thah hna. SAC ralkap an um peng caah an ruak zong lak khawh a si lo, an ruak cu uico nih an ṭam len ka hmuh. June 19 ni zong ah Htantaw khua mi thluak lei tlamtling lo mi pa pakhat cu SAC ralkap nih an kah i, cu pa ruak cu kan laak khawh,” tiah a chim.
SAC ralkap hna cawlcanghnak ruangah tualchung mi tam deuh cu ralhrial dirhmun an phan i, an zamnak hmun ah nunnak liam mi hi 5 hrawng an um cang. Nunnak liam mi hna chung ah a tam deuh cu lung zawtnak a ngeimi an si, tiah tualchung mi nih an chim. Tlaih a tong mi 30 leng cu SAC ralkap nih an umnak sakhan remhter ding in rian an ṭuanter hna, tiah tualchung mi hna nih an chim.Crd; The Chin Post