Zualko: Kan arfi kan ngeihmi cu Ralhrang Uico rual nih saram thah in an kan thah piak!

Zualko: Kan arfi kan ngeihmi cu Ralhrang Uico rual nih saram thah in an kan thah piak!
=======
A ngakchiat tein hringtu Nu nih a thih tak. Kum 12 a si i Mizo ram ah Karate a cawng. Mizo ram state aiawh in India ah pakhat nak tiang teinak a rak hmu. India aiawh in Olympic ah a kal ding sinain ngandamnak lei ruangah a rak kal kho lo. Cubantuk arfi kan ngeihmi cu Ralhrang Uico rual nih saram thah in an kan thah piak. A nulepa hmanh nih a ruak an hmu kho lo.

(An kah nain a thi lo i an hmuh caah hmuahcih in an kah i a lu hrapcheu cu a bauh dih. A hawipa cu a thi ve lo i a lu an tan. A lu belte kan paraltha pawl nih an lak khawh). Nun nih acelh lo e maw kan ram le kan miphun kan va tuar hringhren e.

Hakhathar lam 6 tonnak ah kahdohnak a chuak; 2022 March 3 zinglei sang, Hakhathar lam 6 aa tonnak ah Chin ralkap CDF le SAC ralhraang hna karlak ah kahdohnak a
chuak tiah thawng kan theih.

Pawngkam um mi hna nih, “Tuzing zinglei sang ahkhan kahdohnak thawng a thang. Bomb le meithal thawng ti cawk a si lo. SAC ralhrang lei a thimi le hliam a tuarmi an um pah,” tiah The Hakha Post ah an chim.

Hi kahdohnak ah ralhraang lei in pahnih an thi i rammi ralkap lei in a thi mi le hma pu an um lo tiah kan theih.
Atu banuk in kahdohnak a chuah hnu ah Rungtlang le Khuathar in bomb le meithal he tlerhkhawnnak, i hrocernak an tuah i khuami hna a herh lo ahcun leeng chuah lo ding fb cahmai ah ca an tar cio.

Dokthek khua pawngkam kahdohnak ah CNA Runno pakhat nih nunnak a pek than. Kalay in Hakha lei ah luh aa tim mi SAC ralhraang hna cu Chin National Army (CNA) nih an kah hna i, cu raltuknak ah cun CNA ralkap in Runno Salai Thiang Bik Lian nih miphun le ram ca ah a nunnak a pek than tiah kan theih.

Nihin Kahdohnak ah CNA Ralkap 2 an Nunnak a Liam. Nihin March 2, Falam le Hakha karlak kahdohnak ah CNA ralkap pahnih nih ram le miphun ca ah an nunnak an pek, tiah thanwgpang kan theih. A nunnak a liammi hna cu Salai Za Hnin le Salai Van Bawi Bik an si.

Kalay lei in motor 30 hrawng in a rak kaimi SAC ralhrang pawl cu February 24 ah Falam peng ah an phan i February 27 ah Hakha lei ah an rak lan. February 28 ah Falam peng, Thlanrawn khua pawng ah kahdohnak a chuak hmasa. Motorcycle in khual a tlawngmi Salai Tuan Nei Sum (23) cu Lungpi khua ah SAC ralhrang nih an tlaih i Taal le Tlangzar karlak ah ruru hranghrang in an thah.

Hakha lei ah a rak kaimi ralhrang pawl cu CNA le CDF nih nizaan le nihin ah hmun kip in an kah hna. Nihin kahdohnak ah CNA ralkap pahnih an nunnak a liam hi a si. Nihin kahdohnak a chuah hnu ah SAC ralhrang nih Dohthek khua zong an khangh.

Hakha le Falam karlak kahdohnak ah CNA ralkap 2 an nunnak a liam. Falam in Hakha lei ah a rak raami ralhraang mawtaw thluan 20 leng le tank 2 cu Chinland Defense Force (CDF) le Chin National Army (CNA) fonh in an kah hna. Cu kahdohnak ahcun CNA ralkap 2 nih ram caah an nunnak an pek tiah theih a si. Ralhrang lei zong hliamhma a pumi an tam ve tiah theih a si fawn.

A tutan kahdohnak ah a nunnak a pemi hna hi Salai Van Bawi Bik le Salai Za Hnin an si. Salai Van Bawi Bik cu Thantlang peng Dawn khuami a si i, Salai Za Hnin cu Ralpel khuami a si tiah kan theih. Ralhrang pawl Hakha lei an rat pah ah Ṭaal khua mipi inn hna cu an bauhpiak hna i an thil pawl an fir leng ah Dokṭhek khua cu zaanlei sml 5:00pm hrawngah an khangh chap tiah theih a si.

Ralhrang nih Dokṭhek khua an khangh. Chin ramkulh, Falam peng, Falam-Hakha lam cungah a ummi Dokṭhek khua cu ralhrang nih March 2 zaanlei sml 5:00pm hrawngah an khangh tiah theih a si.

Tuzing ah ralhrang le CDF/CNA cu Ramthlo le Dokṭhek khua karlak ah faak ngai in an i kap. Dokṭhek biakinn chanphio cu hriamngan nih a khen i mipi inn zeizah a kangh bel a fiang in theih a si rih lo tiah Zalen thawngzamh nih a langhter.