Zualko; Ka pa aww.. Na sining dirhmun a sual tuk e. Na hngawng an i tan timi thawngpang kan vun theih cu!!

Poah Peng, Taungmyint Khua CDM Siangcachim Saya Pakhat SAC Ralhrang Nih A Hngawng An Tan I Sianginn Kutka Ah An Tar
===================================
=Magway ramṭhen, Poah peng, Taungmyint khua i CDM siangcachim saya U Saw Tun Moe cu SAC ralhrang nih October 17 zinglei ah an tlaih i a hngawng an tan hnu ah sianginn kutka ah an tar. Cun amah i a suimilam le kutdonghrolh cu an i fir tiah khuami hna nih an chim.

October 17 zinglei ah SAC ralhrang pawl Taungmyint khuachung ah lut in CDM siangcachim saya Saw Tun Moe an tlaih i an thah hi a si. Zohchia le faak taktak in an thah, a kut le ke zong an tan i a lu cu sianginn kutka ah an tar, tiah theih a si. Saya Saw Tun Moe hi kum 45 hrawng a si. A nupi le fapa pakhat a roh taak hna tiah khuami sin in theih a si. SAC ralhrang nih sianginn zong an duah i khuachung zong an khangh chih tiah theih a si.

Ka pa aww.. Na sining dirhmun a sual tuk e. Na hngawng an i tan timi thawngpang kan vun theih cu, cu taitai tiang in cun si hram hlah seh tiah thla kan caam piak peng ko nain zeibantuk Pathian hmanh nih ka thlacaam aunak an kan let lo e. Nunnak khat lei ah hi bantuk tasapur cu rak tong hram ti hlah tiin na fa nih thla kan caam piak.

A tang mi ka nun caan ah ka pa caah a zungzal in thatnak kan tuah piak peng ko lai. Ka pa na phak nak hmun in Da-Duh (Kawl Phungki thlacaam ning) tiin na ka auh khawh ko e. Ka pa a donghnak na khaul lam ah fa pakhat aiin ka pa na pawngah ka um khawh lo caah minung thatnak ka hmu, ka co kho lo e.

Na fa na pa sual hi ka ngaithiam ko mu, ka pa kan dawt tuk mu. Kei cu ka pa na caah fapa fim pakhat ka si khawh lo caah ka nun chan chung kei chiar (ngai chih) peng ko lai. Ka pa aww…kei cu ka paa caah fanu/fapa thatnak zeihmanh ka tuah kho lo e. Ka ngaithiam ko mu ka pa aww.

Ka pa aw…nang cu ka caah cun Pathian pakhat bantuk na si mu. A tu ah cun kei mah sinah ka pa timi Pathian a um ti lo e. Full moon day ah phone in kan i chawnh lio i, na aw ka theih kha ka nunnak a donghnak bik a si lai tiah, ka rak ruat hrimhrim lo e.

သီတင်းကျွတ် ah ka pa caah Phone pakhat le ka pi caah phaisa cheukhat he upatnak kan peek hna lai, tiah ka ruah nain kei mah lei in harnak a phunphun ruangah phaisa harnak tampi ka ton caah upat peeknak nawl hmanh ka ngah kho lo e. Crd-Mg Kaung

Relchap, Tanlyin Peng Mino Thonginn In Luatnak Hmutu Minung 14 Nih SAC Ralkap Hramchahnak Ding Dohtu Tiin Y 14 Phu An Dirh, Tanlyin peng mino thonginn in luatnak hmutu mino 14 nih, SAC ralkap an hram chah dih tiang doh ding in dohthlengtu phu Y 14 tiah min bunh in October 18 ah cu phu cu an dirh tiah theih a si.

May be an image of indoor

Y 14 phu in ṭuanvo ngeitu San Min Paing nih “thir tung chung in a leng chuahnak a ruang cu mipi hna he hmunkhat ah ṭanṭi in, dohthlengtu phu dirhmun in SAC ralkap uknak kan doh lai tihi a si. Thonginn chung in a luatmi kan dihlak in kan i pehtlai kho dih cang, hmunkhat ah ṭangṭi in kan rianṭuannak langhter ding ah Y 14 tiah min bunh in phu kan dirhnak hi a si” tiah a chim.Y 14 cu mipi he ṭangṭi in SAC ralkap uknak a hram chahkhawhnak ding ca ah dirhmi phu a si tiah thonginn in luatnak a hmutu Y 14 phu in ṭuanvo ngeitu Ko San Min Paing nih a chimchap.

May be an image of indoor

SAC Ralkap Nih Natmauk Peng Hpattawye Khua An Khangh, Tualchung Mi Pa 120 An Tlaih Hna I An Hrem Hna, Magway ramṭhen, Natmauk peng Hpattawye(ဖက်တောရေ) khua cu SAC ralkap nih October 18, zaanlei ah an khanghpiak hna tiah theih a si. SAC ralkap hna nih October 18, zaan suimilam 7:00 hrawng ah Hpattawye(ဖက်တောရေ) khua thlanglei in mei khanghhram an thok. Khuachung um khuami pa 120 zong an tlaih hna leng ah an hrem hna tiah theih a si.

May be an image of indoor

“Hpattawye(ဖက်တောရေ) khuachung inn an khangh, khuachung ummi pa hna cu an tlaih hna leng ah, an tuk velh hna, tuzaan tiang ah an thlah rih hna lo. Khuachung ummi nu zong khua leng chuak lo ding in nawl an pek hna. Khuachung ummi inn zuat saṭil Ar le Vok zong nihin chunnitlak an thah an nawn hna,

May be an image of indoor

an tlaihmi mino hna cu tho kholo tiang in an tukvelh hna, tlaih a tongmi hi minung 120 hrawng an si” tiah khuami pakhat nih a chim. Hpattawye(ဖက်တောရေ) khua cu inn 300 hrawng an si i, October 17 ni zong ah SAC ralkap nih zaan lai ah an rak khangh bal cang, cun nihin October 18 zong ah an khangh ṭhan tiah theih a si.

May be an image of indoor

Gangaw Ah Rallam Sialtu SAC Ralkap Kahdoh An Tong, 8 An Thi, Magway ramṭhen Gangaw chaklei khuate pakhat ah SAC ralkap le tualchung hriamtlai phu kar suimilam pakhat chungah voi 2 tiang kahdohnak a chuak i SAC ralkap 8 an thi, tualchung hriamtlai phu lei in hliamtuar an um tiah theih a si.

May be an image of indoor

October ni 17 zaanlei suimilam 4-5 kar suimilam pakhat chungah SAC ralkap le pyusawhti thazaang 150 hrawng le Yaw tualchung hriamtlai phu battalion 1,2, 3 kar kahdohnak a chuak tiah YDF in ṭuanvo ngeitu pakhat nih a chim. Cu kahdohnak ah cun SAC ralkap lei in 8 an thi i hliam tuarmi zong an tam, a thi mi ruak hna cu Gangaw peng Kan(ကန်) khua palik sakhan chungah an vui hna i cu sakhan ah cun umhmun an khuar tiah a chim. Tualchung hriamtlai phu lei in kan ralkap pahnih cu hriamngan kuan nih a peh hna caah hliam an tuar nain an nunnak caah thinphan ding um lo tiah a chimchap.

May be an image of indoor

Yesagyo Pengchung Ah SAC Ralkap Kahdoh An Tong, Ralkap 6 Nak Tlawmlo An Thi, Magway ramṭhen, Yesagyo peng ah hramhram uknak la tu SAC ralkap hna cu kahdoh an tong i, SAC ralkap 6 nak tlawmlo an thi tiah tualchung hriamtlai phu Yesagyo peng pah-kah-phah nih October 18 ah cathanh an chuah.

May be an image of indoor

October 17, zinglei suimilam 9:00 hrawng ah Tanpyiachaung(သံပြာချောင်း) khua in a chuakmi SAC ralkap hna cu Yesagyo peng Taung U khuapawng ah tualchung hriamtlai Yesagyo peng pah-kah-phah, Salingyi Special Task Force (SSTF), Myaing tualchung hriamtlai pah-kah-phah battalion 2 phufonh hna nih an kahdoh hna caah SAC ralkap 6 an thi, hliamhma tuar an tam tiah theih a si. Chunhnu suimilam 3:00 hrawng ah Taung U khua a khangtu SAC ralkap hna cu tualchung hriamtlai phu hna nih hriamngan hmang in kahdohnak an tuah hi a si tiah theih a si.

May be an image of indoor

Myinchain Pengkomh Thlahnih Chung Kahdohnak Ah SAC Ralkap 52 An Thi, Mandalay ramṭhen, Myinchain pengkomh chungah SAC ralkap hna cu tualchung hriamtlai phu nih bomb puahhnawh in an doh hna i, ni 67 chung ah SAC ralkap 52 an thi tiah theih a si.

May be an image of indoor

SAC ralkap hna cu tualchung hriamtlai phu hna nih Myinchain peng Natogyi(နွားထိုးကြီး) peng le Taungta(တောင်သာ) peng ah an kahdoh hna caah minung 52 an thih hleiah hliamhma tuar zong an tam tiah Natogyi PDF hna sin in theih a si. Natogyi PDF, Nagani pah-kah-phah(Myinchain), Shwechainta(ရွှေခြံသား) pah-kah-phah phufonh nih August 10 thok in SAC ralkap rak doh an thok tiah theih a si.

May be an image of indoor

Matupi Ah Meithal Puahthawng Pehtlai In Theih A Si Caah Tualchung Mi Thinphang In An Um, Chin ramkulh, Matupi ah peng (myone) fimcawnnak zung lutlai U Tin Luai thah a ton hnu, October 17, zaan suimilam 9:00 hrawng ah meithal puahthawng pehtlai in a than caah nihin October 18, ah khuachung um siangakchia hna cu sianginn an kai ngam hna lo tiah theih a si.

May be an image of indoor

“Nizaan zaan suimilam 9:00 luan hrawng ah meithal thawng, bomb thawng, hriamngan le hriamhme thawng hna a than caah, khuami hna cu thinphang in an um. Nihin zinglei in cun dawr ah thilcawk khawh zong a si ko na in siangakchia tu cu sianginn an kai lo, khuami thinphang in an um dih hna caah ka fa zong sianginn ka kai ter lo” tiah tualchung mi pakhat nih a chim. Hriamthlahnak kong ah mi zei kut in thlahmi le puahmi a si fehternak tuahmi a um rihlo.

May be an image of indoor

Russia Su-34 Ral Tuknak Vanlawng Cu Minung Umnak Sang Chungah A Tlak Caah Minung 13 Nak Tlawmlo An Nunnak A Liam, Russia ram thlanglei Rick khuachung building cung ah Russia jet vanlawng pakhat a tlak caah minung 13 nak tlawmlo an thi tiah Russia ṭuanvo ngeitu hna nih an chim.

May be an image of indoor

Cu a tlami vanlawng cu Su-34 Jet fighter a si i, zuan aa timh ah a tlak hi a si. Vanlawng khaltu pahnih cu vanlawng a tlak hlan ah inn cung ah an zuang manh tiah theih a si. Vanlawng tlaknak ruang ah a rawkmi inn cu checkhlatnak tuah a si i, a thi mi minung 13 ruak an hmuh, cu chung ah cun ngakchia minung 3 an i tel tiah Russia ṭuanvo ngeitu hna nih an chim.

May be an image of indoor

Vanlawng a tlaknak dot 9 a sangmi innpi cu mei a kangh hnu ah, minung 68 an chanhchuah khawh hna, minung 19 nih hliamhma an tuar caah sizung ah an kalpi hna tiah theih a si. Vanlawng a zuan lio ah vanlawng engine cu a kangh caah cu vanlawng a tlaknak a si tiah vanlawng khaltu hna nih an chim tiah Russia runvennak lei vuanci zung nih an thanh.

May be an image of indoor

Ayeyarwaddy Tiva Ah Rithaisi Phurtu Minung 2 PDF Nih An Tlaih Hna, Sagaing ramṭhen, Khin U peng Ayeyarwaddy tiva ah rithaisi a phurtu minung 2 cu PDF nih an tlaih hna tiah theih a si. Ayeyarwaddy tiva ah October 18, zinglei suimilam 7:00 hrawngah tilawng pakhat cu Temintaman(သေမင်းတမာန်) phu le Tawkyi Gyayine(တောကြီးကျားရိုင်း)phu nih checkhlatnak an tuah i, rithaisi phortu minung 2 cu an tlaih hna tiah theih a si.

May be an image of indoor

“Ayeyarwaddy tiva ah October 18, zinglei suimilam 7:00 hrawngah Khin U nichuah lei, tiva in a rak kaimi tilawng pakhat cu tualchung hriamtlai phu nih checknak kan tuah, rithaisi kan hmuh caah kan tlaih” tiah Tawkyi Gyayine(တောကြီးကျားရိုင်း)phu in ṭuanvo ngeitu pakhat nih a chim.

May be an image of indoor

Sagaing-Monywa Motor Lampi Ah SAC Ralkap Kahdoh An Tong, 24 An Thi, Sagaing ramṭhen, Myinmu peng Sagaing-Monywa motor lampi Myinmu le Htisaung khua kar ah SAC ralkap hna cu drone hmnag in voi 7 tiang bomb thlakhnawh an tong, mine in voi khat puhhnawh an ton caah SAC ralkap 24 an thi tiah Zero pah-kah-phah phu in ṭuanvo ngeitu Tat Kyi nih a chim.

May be an image of indoor

October 17, zinglei in zaanlei tiang SAC ralkap hna cu Zero pah-kah-phah phu nih an doh hna, kaphnih kar i kahdohnak voi 8 tiang a chuak, cu kahdohnak ah cun SAC ralkap 24 an thi tiah theih a si. SAC ralkap kadohnak cu Zero pah-kah-phah phukhat lawng nih an tuah i an hmanmi mine ca ah Sagaing pengkomh pah-kah-phah nih sermi bomb in an bawmh hna tiah theih a si.

Wetlet Peng Sakhan Kahdohnak Ah PDF Ralkap Pakhat A Nunnak Liam, October ni 17 zinglei ah Sagaing ramṭhen Wetlet peng Shwe Pan Kone khua palik sakhan cu tualchung hriamtlaiphu fonh hna nih kan kah hna i SAC ralkap lei in 2 an thi, 96Soldiers phu in PDF pakhat a nunnak liam ve tiah 96Soldiers phu nih cathanh an chuah.

May be an image of indoor

October ni 17 zinglei suimilam 5:40 hrawngah Wetlet peng Shwe Pan Kone khua palik sakhan va lak ding in 96Soldeirs-PDF, Daungni phu, Minphyusin phu le Tawthargyi phu fonh hna nih kan kahdoh hna tiah an cathanh ah cun an langhter. Kahdohnak suimilam pakhat hrawng a rauh ah SAC ralkap nih vanlawng in an bawmh hna caah sakhan la kho lo in hnu an tolh ṭhan tiah theih a si.

May be an image of indoor

Thongtla Minung 14 Nih Kanti(ခန္တီး) Palik Sakhan Thonginn An Bauh I An Zaam, Minung 5 An Tlaih Khawh Ṭhan Hna, Sagaing ramṭhen, Kanti pengkomh Kanti palik sakhan thonginn cu nihin October 18 zinglei sml 3:00 hrawngah thongtla nih an bauh, tiah Kanti pengkomh palik he aa naihniam mi sinin theih a si.

May be an image of indoor

“Nihin zinglei sml 3:00 hrawngah thonginn kil thir thluan in khammi cu an bauh i, thongtla minung 14 an zam. Cu chungah minung 5 cu an tlaih khawh ṭhan hna i 9 tu cu an luat,” tiah a chim chap. Palik he aa naihniam mi pakhat nih, “Kanti palik sakhan ah thongtla mi hna hi hriamnam he aipehtlai mi case, sual tuahnak le rithaisii case in thong a tlami an tam bik an si,” tiah a chim.

May be an image of indoor

A luancia zarh zong ah Mandalay ramṭhen, Kyaukse peng palik sakhan ah hrenmi thongtla pawl cu Madalay U Bu thonginn i an ṭhial hna lioah thongtla cheukhat cu, Myintnge(မြစ်ငယ်) hlei pawng an phanh ah motor chung in an zuang i, an rak zam. Cu pinah Magway ramṭhen, Pakokku thonginn cu thongtla minung 4 nih an bauh i an rak zam, tiah theih a si.

May be an image of indoor

Myinmu Le Shwe Bo Peng Ah SAC Ralkap Bomb Puahhnawh An Ton Caah 10 An Thi, Sagaing ramṭhen, Myinmu peng ah ke in rallam a sialmi SAC ralkap cu, Civilians Defense Security Organization Myaung(CDSOM) nih bomb in kan puahhnawh hna caah SAC ralkap 8 an thi, tiah cathanh an chuah.

Nizan October 17 zanlei sml 1:40 ah Sagaing ramṭhen, Tatma 33 SAC ralkap nih mizapi thilri an firmi cu motor 10 in an phurh i an kal lio Nabegyu(နဘဲကျူး) khua le Pyoh(ပျော့) khua karah CDSOM le ṭangṭi phu hna nih bomb in an puahhnawh caah SAC ralkap motor pakhat a rawk i SAC ralkap 5 an thi, hliamhma pumi zong an um, tiah theih a si.

Cuni zanlei sml 2:40 ah Myinmu khua in bomb thianhhlimh dingah a chuakmi SAC ralkap 9 cu Kanphyia Zayet(ကန်ဖျားဇရပ်) karah bomb lung 4 in an puahhnawh ṭhan hna i SAC ralkap 3 an thi chap, tiah theih a si. Cun Sagaing ramṭhen, Shwe Bo peng ah SAC ralkap hliamhma pumi a phurtu motor cu bomb puahhnawh a ton caah 2 an thi, tiah Shwe Bo Defense Force(SBDF) sinin theih a si.

October 15 zanlei sml 2:28 hrawng ah Palai khua mizaw bawmchantu motor cu SAC ralkap nih an chuh hna i, hliamhma pumi ralkap an phurh hna, cu lio ah bomb puahhnawh a tong i SAC ralkap 2 an thi, tiah theih a si.

Kawlram Ramkomh Vuanci Dr. Lian Hmung Sakhong S. Korea A Tlawng, NUG Cozah, Ministry of Federal Union Affairs ramkomh Vuanci Dr. Lian Hmung Sakhong cu nihin October 18 ah S. Korea a phan, tiah Representative-Office/KOREA nih cathanh an chuah.

Dr. Lian Hmung Sakhong cu S. Korea ram um, Asia Center – Seoul National University ah a ra laimi October 21 ah tuah dingmi, ramkip he Myanmar Federal Democracy kong ceihmainak telpi ding in khual lian in an sawmmi a si, tiah theih a si.

Dr. Lian Hmung Sakhong cu NUG in S. Korea ram aiawhtu Yan Naing Htun le a rianṭuanṭi hna nih an don pinah S. Korea ram um Myanmar rammi hna le Chin zatlang bu hna nih an don, tiah theih a si. Dr. Lian Hmung Sakhong cu S. Korea ram ah zarhkhat a cam lai i, S. Korea cozah nawlngeitu, zatlang bu, S. Korea ram um Chinmi le Myanmar rammi chungkhar hna he tonnak an ngei lai, tiah theih a si.

Natogyi le Myittha Ah Umhmun Khuarmi SAC Ralkap Cu Natogyi PDF Nih Drone In Bomb An Thlak Hnawh Hna, 11 An Thi, Mandalay ramṭhen Natogyi le Myittha peng ah umhmun khuarmi SAC pawl drone in bomb thlakhnawh an tong i 11 an thi tiah theih a si. October ni 12, zaanlei suimilam 5 hrawngah Natogyi peng Zedip (ဇေဒိပ်) khua umhmun khuarmi SAC ralkap cu Natogyi People Defence Force nih drone in an bomb an thlak hnawh hna nain a thimi le aa hliammi fiangin theih a si lo.

October ni 13, zaanlei suimilam 4 hrawngah Myittha peng Yitkan ( ရစ်ကန်) khua ah umhmun khurmi SAC ralkap cu Natogyi PDF nih drone in bomb an puah hnawh ṭhan hna i SAC ralkap 7 an thi tiah theih a si. Cun October ni 16 , zaanlei suimilam 4 hrawngah Natogyi peng Pinse (ပြင်စည်) khua sianginn hmaiah checkhlatnak tuahmi SAC ralkap cu Natogyi PDF nih drone in bomb an thlakhnawh hna caah SAC ralkap 4 an thi i 5 nih hliam an tuar tiah Natogyi PDF nih cathanh an chuah.

Kyauktaw Peng Ah SAC Ralkap Hriamngan Kuan Ruangah Nu Pali An Nunnak A Liam, Tualchung Mi 6 Hliamhma An Pu, Rakhine ramkulh, Kyauktaw(ကျောက်တော်) peng le Myinpyia(မင်းပြား) peng ah nizan October 17 ah SAC ralkap nih hriamngan an kah caah hriamngan kuan nih tualchung mi nu 4 cu a khen hna caah an nunnak a liam, tiah theih a si.

A nunnak a liammi hna cu Kyauktaw peng in Paihteyet(ပိုက်သည်ရပ်) khuami Gyia Mi Na(kum 30), Daung Chaung Gyi khua ah cachimtu sayamah Mya Mya Saw(kum 48), Myinpyia peng Phalaung Pin(ဖလောင်းပြင်) khuami San Nwe Soe(kum 10) le Hla San Yin(kum 23) an si, tiah theih a si.

Daung Chaung Gyi khuami pakhat nih, “Ralkap nih hriamngan an kah lioah sayamah nu cu sianginn chungah a um lio a si i, hriamngan kuan cu sianginn tual chungah a tlak caah sayamah cu hriamngan kuan pelpawi nih a khen caah a nunnak a liam hi a si,” tiah a chim. Nizan October 17 chun in SAC ralkap nih hriamngan kah ruangah ngakchia pahnih telh in tualchung mi 6 hliamhma an pu, tiah theih a si.

Sagaing-Monywa Motor Lam Ah SAC Ralkap Motor Voili Tiang Bomb Puahhnawh An Ton Caah SAC Ralkap 5 An Thi, Sagaing ramṭhen, Sagaing-Monywa motor lampi ah Monywa lei a kalmi SAC ralkap motor cu nizan October 17 ah voili tiang PDF nih bomb an puahhnawh caah SAC ralkap 5 nak tlawm lo an thi, tiah theih a si. Chaung U in Monywa lei a kalmi SAC ralkap motor 4 cu nizan October 17 chun sml 12:30 ah Brave Heart Army – BHA nih, bomb lung 3 in kan puahhnawh hna caah SAC ralkap 2 nak tlawm lo an thi, tiah an langhter.

Cun Myinmu peng Wunpyi(ဝမ်းပြည့်) le Alakapa(အလ္လကပ) khua karah zanlei sml 2:12 ah Sagaing hrambunh Tatma 33 SAC ralkap motor 11 cu, Monywa in an chuah lei ah People’s Army To Fight Dictatorship(PAFD) Companny DK PDF(MMU)၊ People’s knight Defense Force Myinmu (PKDF-MMU)၊ TAUNGTHA People Defense Force (TTAPDF)၊ D.B.B.F-MMU ṭangṭi phu hna nih bomb lung 4 in kan puahhnawh ṭhan caah hliamhma pu an um i SAC ralkap motor cu Myaung peng kalnak lamṭhen ah dir in hliamhma pumi cu an thlopbul hna, tiah PAFD nih cathanh an chuah.

SAC ralkap motor cu Chaung U-Monywa lam ah zanlei sml 5:30 ah BHA nih bomb lung 6 in voihnih kan puahhnawh ṭhan caah SAC ralkap 3 nak tlawm lo an thi chap, tiah Brave Heart Army – BHA nih cathanh an chuah.

SAC Ralkap Nih Unau Pahnih An Tlaih Hna Pinah A Naupa Cu Kyats Sing 70 In An Tlanhter, A Upa Inn Zong An Hrenhpiak, Madalay ramṭhen, Ngazun peng Satpyiagyin(ဆပ်ပြာကျင်း) khuami khuabawi hlun Htun Thein a inn cu, SAC ralkap nih an hrenh pinah a naupa Aung Zaw Win cu kyats sing 70 in an tlanhter i a chungkhar nih SAC ralkap cu tangka an pek hna caah kan hnu zarh ah an thlah ṭhan, tiah Htun Thein he naihniam in a ummi sinin theih a si.

A luancia August thla ah an unau in an rak tlaih hna i, October 15 ah SAC kuttang khuabawipa Aung Ko le SAC ralkap nih Htun Thein inn cu an hrenhpiak, tiah theih a si. “Aung Zaw Win cu a chungkhar nih kyats sing 70 in an tlanh ko nain a motor tu cu an pe lo. Khuabawipa Aung Ko nih, liecence a um lomi motor pakhat nan ka cawkpiak lawng ah motor cu kan pek hna lai a ti hna,” tiah naihniam mi pakhat nih cun a chim.

Htun Thein a naupa Aung Zaw Win cu SAC ralkap nih an tlaih caah a upa Htun Thein cu khuate pakhat ah a zam i, cuka a zamnak Ngazun peng Nyaung Laypin khua ah SAC ralkap nih an va tlaih hi a si, tiah theih a si. A naupa Aung Zaw Win cu a luancia August 21 lioah an rak tlaih i, a upa Htun Aung cu August 30 ah an rak tlaih.

Loikaw Peng Thlakhat Chung Kahdohnak Ah KNDF Nih SAC Ralkap 15 An Thah Hna, Kanrenni ramkulh, Loikaw Peng thlakhat chung kahdohnak ah SAC ralkap 15 nak tlawm lo an thi, tiah KNDF Battalion 2 nih nizan October 17 ah cathanh an chuah. Loikaw peng ah a luancia September 17 in October 15 tiang SAC ralkap le Karenni Nationalities Defense Force(KNDF), Karenni Army(KA), United Southern Shan Federal Union(USSFU), PDF karah kahdohnak a chuak, tiah theih a si.

A luancia September 17 lioah Mawchi le Padange(ပဒါးညေး) khua ah rallam a sialmi SAC ralkap pawl cu, KNDF ṭangṭi phu hna nih an kah hna caah SAC ralkap 3 an thi, Kayantharyar(ကယန်းသာယာ) lamṭhen ah KNDF nih sniper in SAC ralkap 3 an thah ṭhan hna. KNDF ṭangṭi phu lei in ralkap 1 a nunnak a liam ve. September 16 ah SAC ralkap umhmun an khuarnak Kayantharyar(ကယန်းသာယာ) lamṭhen ah kahdohnak a chuak i, SAC ralkap 2 an thi, KNDF ṭangṭi phu lei in ralkap 3 hliamhma an pu, tiah theih a si.

October 3 le 7 ah Mawchi khua pawng kahdohnak le ralvengtu SAC ralkap cu KNDF ṭangṭi phu hna nih kan kah hna caah SAC ralkap 5 an thi, tiah KNDF Battalion 2 nih cathanh an chuah. Nualawu(နွားလဝိုး) hmunram ah umhmun khuarmi SAC ralkap cu October 14 ah KNDF ṭangṭi phu nih an kah ṭhan hna caah KNDF Battalion 2 in ralkap 3 hliamhma an pu i, ralkap 2 an nunnak a liam.

October 15 ah Mobye in Wayi Kawkhu(ဝါရီကောခူ) lei ah rallam a sialmi SAC ralkap cu KNDF ṭangṭi phu hna nih kan kah hna caah SAC ralkap 4 an thi, hliamhma pumi an tam, tiah KNDF Baatalion 2 nih an langhter.

SAC Ralkap Le Pyusawhti Umhmun An Khuarnak Cu PDF Nih Hriamngan In An Kah Caah SAC Ralkap Le Pyusawhṭi 10 An Thi, Myaing peng Tayetkan(သရက်ကန်) khua um SAC ralkap le pyusawhṭi cu PDF ṭangṭi phu, phu 17 nih hriamngan in kan kah hna caah SAC ralkap le pyusawhti 10 an thi, tiah Western Region Brigade 7, Battalion 708 in ṭuanvo ngeitu nih a chim.

Tayetkan um SAC ralkap le pyusawhṭi nih mizapi cu harnak an pek hna caah October 16 zan sml 9:30 hrawng in 11:00 tiang hriamngan in kan kah hna, tiah Battalion 708 in Battalion Commander nih a chim. PDF ṭangṭi phu hna nih 60mm, 80mm,100mm,120mm le meithal in voi 200 leng kan kah hna caah SAC ralkap le pyusawhṭi 10 an thi, kanmah lei in a thimi le aa hliammi kan um lo, tiah Battalion 708 nih cathanh an chuah.

Cu kahdohnak ah Battalion 708, Wolf Guerrilla Myaing, Myaing Warriors, Southern Mating Young Boys Force (SMYBF), Myaing Underground Defence Force (MUGDF), Regional Defence Force(RDF) le a dang PDF phu 11 hna i bawm in an kah hna, tiah theih a si. Crd-The Chin Post