CNDF Ralkap Salai Ngun Za Lian Kim Bomb I Thlahphoih Sualnak In A Nunnak Liam
=========
CNDF ralkap Salai Ngun Za Lian Kim (kum 21) cu May 6 ni ah Bomb i thlahphoih sualnak in a nunnak a liam tiah CNDF nih May 8 ah ngaihchiat nak an langh ter. Ram le Miphun caah a nunnak a pek mi Salai Ngun Za Lian Kim cu CNO/CNDF nih upatnak kan in pek, a kal tak mi chungkhar hna nan ngaihchiatnak kan in hrawmpi hna.
Bochan awk Pasal tha nang mah cu na riantuan hawi CNO/CNDF nih kan in philh lai lo i ram caah na nunnak na pek hnawh chan mi ralhrang uknak tha lo cu a hram in bongh ding ah a dih dongh tiang kan doh lai tiah na min chal in biakam nak kan nei tiin CNDF nih ngaihchiat pinak cathanh an chuah.
Cyclon Thlichia Ruangah Chin Ramkulh Telh In Ramkulh Le Ramthen Cheukhat Ah May 9 In 14 Kar Ruahpi A Fak Kho; Bangladesh rili in aa thok ding ‘Mocha’ Cyclon thlichia ruang ah Chin ramkulh telh in Myanmar ramkulh le ramthen cheukhat ah May 9 in 14 kar ah ruahpi sur a fak kho tiah khua caan zohnak zung nih May 8 ah thanh ca an chuah.
Mocha Cyclon thlichia cu a tulio ah thlihran dingin aa thok lio a si i May 9 ah thlichia thazaang der deuh mi le May 10 ah thlichia fak deuh mi in a ra kho tiah an langhter chih. Hi thlichia ruangah Yangon ramthen, Naypyidaw, Sagaing, Mandalay, Magway , Pago, Ayerawaddy, Tanintharyi ramthen , Kachin, Shan, Chin ramkulh, Rakhine, Kaya, Karen le Mon ramkulh hna ah ruahpi sur a fak lai.
Myanmar tlangram le rili thenkhat ah May 9 in 14 kar ah thlichia hrannak in tilet a tho kho i suimilam pakhat ah meng 70 in meng 80 a rang kho. Cucaah mipi hna nih a hlankan in ralrin le a herh mi thilri zong i damh cio dingin khua caan zohnak zungnih ralrin peknak thawng an thanh.
Khaikam Khuapi Ah SAC Ralhrang Nih Ralphaw Ah An Tlaihmi Motor Hna Cu Nithum Hnu Ah An Thlah Ṭhan Hna ; Chin ramkulh, Tedim peng, Khaikham khuapi Gate ah SAC ralhrang nih May 6 ah ralphaw hman ding ah an tlaihmi motor hna cu May 8 zing ah an thlah ṭhan hna, tiah theih a si.
SAC ralhrang nih Kalay khuapi in Chin ramkulh chung a rak kai dingmi motor hna cu kham in Khaikam khuapi um LCD Petrol zuarnak dawr ah an tlaih hna i, ralphaw hman ding ah an erh hna, tiah theih a si.
May 8 zing ah SAC ralhrang nih an tlaihmi motor hna cu an thlah ṭhan hna i, kalay-Chin ramkulh motor lampi zong onh a si cang, tiah Zalen nih a langhter. SAC ralhrang nih atu bantukin motor an khamnak le an tlaih hnanak a ruang cu mipi hriamtlai nih an sakhan luhhnawh in kahdoh lai an ṭhihphan caah a si, tiah kan theih.Credite; Lungmili Post