Kawhmu Ah Ramdang Kal Chungkhar SAC Ralkap Nih Thla Khat Ah 30,000mmk In Sing Khat Tiang An Kholh Hna
=====================
Yangon ramṭhen, Kawhmu pengchung in ramleng a phan mi chungkhar cazin SAC ralkap nih an laak, cu chungkhar hna cu thla tin SAC ralkap, palik le pyituhsit phu sin ah ngunkhuai nan pek lai tiah an ti hna.
” Kawhmu khua ah umhmun khuarmi SAC ralkap nih milu cazin laknak an tuah hnu ah ramleng a phan mi chungkhar cazin lak in ngunkhuai an kholh hna. Chungkhar pakhat ah Thailand a phanmi an um ah cun 30,000mmk, Malaysia phan mi 50,000mmk, Korea le Singapore phan mi sing khat, tilawng rian ṭuanmi an si ah cun thla tin thla khat ah sing khat nan pek lai. Nan pek lo a si ah cun hmalaknak tuah nan si lai tiin an kan tlerhkhonh” tiah Kawhmu tualchung mi pakhat nih a chim.
Yangon-Kawhmu-Dala lamkam um Htan Ma Naing khua, Wabalauktauk(ဝါးဘလောက်သောက်) khua hna ah SAC ralkap cu umhmun an khuar pin ah khuami hna cu ral vennak tuah ding in an hnek hna, a tuah kho lo mi chungkhar cu phaisa an kholh hna hnu ah ral vennak a tuahtu cu man an phalh hna. Cheukhat khua ah cun pyituhsit le pyusawhti training kaiter ding in mino an khomhsuat hna tiah theih a si.
KNU Brigade 6 Thla Khat Chung Kahdohnak Ah SAC Ralkap 107 An Thi, Tlangcung Hriamtlai 10 Nunnak Liam; KNU Brigade 6 hmunram Dupalayar pengkomh ah April thla chung kahdohnak voi 29 a chuak i SAC ralkap 107 an thi. Khah Lah Yah 207 Battalion 8 in Battalion Comamnder le Major rank ngei 2 le Captain 1 telh in 85 nih hliam an tuar, tiah Dupalayar pengkomh nih cathanh an chuah.
Cu kahdohnak ah SAC ralkap 3 an tlaih hna i KNLA, KNDO le ṭangṭi phu lei in ralkap 10 nih an nunnak an pek ve pinah ralkap 19 hliamhma an pu. Drone pakhat zong SAC ralkap nih an kah thlakpiak hna, tiah theih a si. April thla chungah SAC ralkap nih vanlawng in voi 31 bomb an thlak i, hriamngan in voi 184 an kah caah cacawnnak sianginn 3, phungki sianginn 1, Khrihfa Biakinn 2, sii khan 2 le tualchung mi inn 387 an rawk i, inn 12 a ciam, tiah theih a si.
Vanlawng le hriamngan in SAC ralkap nih an kah ruangah tualchung mi 23,021 ral an hrial. Sah Kah Khah in Battalion Commander Myo Set Aung kuttang, Brigadier Aung Myo Htun kuttang le Khah Lah Yah 32 Battalion Commander Ye Htet Zaw nih an hruaimi phu nih tualchung mi 2 an thah hna leng ah 1 zong an tlaih, tiah Dupalayar nih cun an langhter. Cu pinah hriamngan kahnak in inn zuat saṭil Caw 34, Vok 21, Meheh 20 le a dang saṭil tampi an thi. Tualchung mi inn 12 telh in dum le hau tampi a kang, tiah an cathanh ah cun an langhter.
Nabuaing-Myingyan Lam SAC Leilawng Bomb Puahhnawhnak Ah Ralkap 4 An Thi; Mandalay ramṭhen, Nabuaing-Myingyan lam ah SAC ralkap an i citmi ke 6 ngei leilawng cu bomb in kan puahhnawh caah ralkap 4 an thi, tiah Shwe Chanthar Guerrilla phu in ṭuanvo ngeitu La Kwin Eng nih a chim.
May 7 zing suimilam 8:00 hrawngah Nabuaing in Myingyan lei a kalmi leilawng pakhat chungah SAC ralkap 25 hrawng an i cit i, bomb in puahhnawh an ton caah ralkap 4 an thi, tam ngai hliamhma an pu, tiah theih a si. “Bomb in kan puahhnawh hna hnuah an kan kah ve ko nain kanmah lei a thimi le aa hliammi kan um lo. Kan tei hlan lo kan doh peng hna lai,” tiah ṭuanvo ngeitu nih cun a chim. Credite; The Chin Post