Zeiruang Ah Ralhrang Hi An Sungh Lai?

Zeiruang Ah Ralhrang Hi An Sungh Lai?
=============
Dothlennak (Revolution) timi le ramchung raal (civil war) timi ahcun zeitluk cozah thawngtha asi, timi le zeitluk hriamnam tha a ngeimi cozah dah asi, timi ahhin ai hngat theng bal lo. Abiapi bikmi cu mipi nih zeitluk in kha cozah/ ralkap kha thazaang an pek or pek lomi dah asi, timi ah khin ai hngat zungzal.

Afghanistan War (1979 -1989) lio ah vawleicung hriamnam thawngbik ai ti ve mi Soviet Union a rak sunghnak kha Afghanistan mipi nih Sunni Mujahideen pawl kha an rak tanh deuh hna caah khuate hmun vialte an ral control kho lo, an rak kal paoh ah an thi zungzal. Nihin tiang zongah US cozah nih Afghanistan hi a tei kho taktak ve lo. Khuate leiah mipi bawmhnak thawng in Taliban pawl hi an thazaang a thawng chin lengmang.

Vietnam War (1955-1975) lioah America nih Vietnam a rak tei khawhlonak cu ram mipi tar mitcaw hmanh nih Vietnam communist an rak tanh caah asi. 2013 lio ah ISIS nih fawi tein Iraq ram 60% tluk an rak control khawhnak cu Iraq mipi nih Iraq cozah an rak dirpi lo caah asi. Asinain ISIS sining cu tuk a sum tuk i mipi nih an vun hlawt ciammam than I Iraq cozah le mipi i bawm in an kah than hna tikah fawite in an ci an hmuh khawh than hna.

Myanmar ralhrang kan teinak ding a ruang bik cu Myanmar mi 80% tluk nih ralkap thil tuah kan duh lo i kan doh, Kawl ralkap cozah cu chim lo Russia le US ralkap hmanh nih civil mi bawmhnak tel lo cun ral an tei kho lo kha. Cucaah kan tei hrimhrim lai, a tuan le a tlai tu lawng khi asi ko. Credit: Chelsea Bawi