Zeimawcaan a rauh hnu ah kan Sui Thantlang thawngpang!!

Thantlang khua chung khua arak sa mi hna nih ruah awk ah ka duhmi cu!!
===========================
Thantlang khua chung khua arak sa mi hna nih ruah awk ah ka duhmi cu…Thantlang khuachung ah khuasa ve ko mi Inn le lo dum le hau zong aa neih ve ko mi mino le Tlangval hna nih Ram dang le ralzam dirhmun in le Nu le Pa sin ah an zaam mi hi Thantlang kan lak tik zong ah a lut ngam ding ah kan ruat hna lo.

Nule Pa zong nih Mi fa vial raltuk nak ah thazaang va pek ngai Mah fa le vial sian tuk hna lo. Thantlang khua chung ah mino hi a thong in kan rak um ko. mah hna hi CDF le CNA tal ah i tel hna seh law tampi hmual a nei deuh hnga.
mikut cung rul tlai ah ka ruah hna. Tt luh tik ah a buai bikmi zong an si te men lai, Crd-Salai Phuntanh

Pale Peng Nithum Chung Kahdohnak Ah SAC Ralkap 30 Nak Tlawm Lo An Thi, PDF Ralkap 4 An Nunnak A Liam Ve, Sagaing ramṭhen, Pale peng ah nithum chung kahdohnak a chuak i, SAC ralkap 30 nak tlawm lo an thi, tiah theih a si. A luancia Octobber 25 in Pale peng Pah Kah Phah an zung bik(Headquarter) cu SAC ralkap Helicopter 5 in an kah caah nizan October 27 tiang kahdohnak a chuak i, SAC ralkap 30 nak tlawm lo an thi. Cu hnuah SAC ralkap pawl cu Monywa Nah Mah Khah ah an kir ṭhan, tiah theih a si.

SAC ralkap an kir hnu in PDF nih hmunhma thianhhlimnak an tuah i Pah Kah Phah zung ah an rak tlaihmi thongtla minung 12 cu SAC ralkap nih an thah hna pinah an ruak cu Teypingye(သဲပြင်ကျယ်) khua inn 6 he an khangh chih dih hna, tiah PDF sinin theih a si. Kahdohnak hmun hnih ah a chuak i SAC ralkap 30 nak tlawm lo an thi, kanmah lei in PDF ralkap 4 an nunnak a liam ve i, ralkap 2 hliamhma an pu, tiah hriamtlai phu hruaitu nih an chim tiah theih a si.

Mizoram Zatlang Bu Ah A Ngan Bik CYMA Nih Conference An Tuah I, Myanmar Ralzam Kong Ceihmainak An Ngei, India ram, Mizoram ramkulh chungah a ngan bik zatlang bu le nawlngei bik a simi Central Young Mizo Association(CYMA) nih nizan October 27 ah a voithumnak Conference an tuah i, Myanmar ralzam kong ceihmainak an ngei, tiah theih a si.

A voithumnak Conference cu Thingsulthliah khua ah an tuah i ceihmainak an ngeihmi caang 10 chungah Myanmar ralzam camp hi ṭha tein sak ding le cuka ahcun ralzam vialte umter dih ding in ceihmainak an ngei,” tiah Mizoram hrambunh Vanglaini news nih an langhter. “Myanmar ralzam mi hna cu Mizoram kazakip ah an i ṭhek cio hna i, hmailei ah harnak a chuak khomi a si caah ralzam camp pakhat sak i cuka ahcun hmunkhat ah chiah ding in CYMA nih cozah sinah forhfialnak tuah ding in bia an chah,” tiah theih a si.

Mizoram ah ralzam dirhmun in a ummi hi 40,000 leng an phan i a tam deuh cu Chinmi lawngte an si. Cheukhat cu anmah tein inn an hlang i khua an sa hna, tiah theih a si. Mizoram ah a zammi Myanmar rammi hna cu India cozah nih a cohlang hna lo nain Mizoram cozah, zatlang bu hna le biaknak hruaitu hna nih lumsa tein an don hna pinah an herhmi eidin thilri zong an bawmhchanh hna, tiah theih a si.

Hakha Khua Chungah Meihol Tun Khat Ah 18,000 A Phan, Cawk Ding A Um Ti Lo, Chin ramkulh, Hakha khua chungah mei a rawhnak ni 8 a si cang i mi tam deuh cu meihol in rawl an chuang hna, tiah theih a si. Hakha ummi pakhat nih, “October 21 zing sml 6:30 in mei a mit i ni 3 chung a mih hnu October 23 zan ah zankhat te a ra.

Cu hnu ah ruah a sur tuk i meitung a kiak dih an ti i nihin October 28 tiang ah mei a ra rih lo,” tiah The Chin Post ah a chim. Hakha khua chungah mei a mihnak hi ni 8 a si cang i meihol deuh lawngte hman a si. Khuasak ṭha deuhmi cu gas in rawl an chuang. Zapi zaran cu meihol in rawl kan chuan pinah khuasik thla a si bantukin meihol in mei kan to. Nikhat hnih lawng rawl chuannak kan ngei cang, meihol a dih ahcun lung rethei kan si ko, tiah a chim chap.

Hakha mei a mit hlan ah khan cun meihol tun khat ah 12,000 in 15,000 kar lawng a si. Cu hmanh cu cawk ding a um ti lo. Atu hi tun khat ah 18,000 a phan cang nain Hakha khua chungah meihol cawk ding a um ti lo, tiah meihol cawtu pakhat nih The Chin Post ah a chim.

Voidang ah cun Hakha ah meihol tun khat ah 9,000-10,000 lawng a rak si nain mei a mih le cangka hi bantukin meihol man an kaimi hi cu thil poi ngai a si ko. Khua caan har lio a si caah khat le khat kan ngeihmi kan i bawmh khawh lo hmanh ah thil kan zuarmi a tangmi hi cu a man kan kai ding a si lo, tiah tualchung mi pakhat nih a chim. Meitung a rawh caah mei rianṭuantu hna nih zeitik dah a rat ṭhan lai ti an chim kho lo, tiah theih a si.

Hakha Peng Ah Ngafuan Ruh An Khap, A Rutmi Tangka Kyats Sing Tam Ngai Dan An Tat Hna, Chin ramkulh, Senthang peng ah October thla chung ngafuan ruh an khap, a rutmi cu tangka tam ngai dan an tat hna, tiah theih a si. Senthang peng khuate upa pakhat nih, “October thla cu nga an tit lio a si pinah an keuh i a runrun in nga an fuan thla a si. Cucaah kum fatin ngafuan ruh kan khap tawn. Chimh a ngai lomi hna nih a thli tein ngafuan a rutmi zong cu an um ve. Asinain a ruttu kan hngalh hna ah cun dan kan tat hna,” tiah The Chin Post ah a chim.

Nga an fuan thla ah cun ṭuanvo kan i phaw i ngafuan a rutmi an um le um lo tiva in kan bawh hna, kan ngiat hna. A bik in October thla chung hi kan khap, facang hleh a zaat November zarhhnihnak hrawng ah hin ngatlaih kan onh ṭhan te lai, tiah senthang peng khuami pakhat nih a chim.

Nga an fuan thla ah khuami lawng si loin khualdang mi zong nih Bawinu tiva ah ngatlaih a ngah lo i, ngatlaitu le ngafuan a ruttu an hngalh hna ahcun tangka kyats sing 1-3 tiang dan an tat hna caah a liam duh lomi an um ahcun CDF sinah khua upa nih an phuan hna i, CDF nih ṭuanvo an lak hna, tiah theih a si. Crd-The Chin Post