Zei ruang ah Mindat nih Rallokap hi an tei khun hna?

Zei ruang ah Mindat nih Rallokap hi an tei khun hna?
========
A ruang tampi puh awk a um i, mah lak cun Chin mi u le nau kan i ttan pi hna caah ti kha cu a lang tuk i chia rih u sih. A ruang pakhat cu kawl cozah kuttang ah kawl cozah rian a ttuan mi an rak tam tuk.

Kawl bawi he hawikom in voitam pi an tthu dir hna. Mah cu an tthut dir ruang ah cun kawl tluak le kawl rallokap an khuakhan an i fian hlei khunnak a si. Mi ttia lo bawi a hrocer mi kawl bawi pawl khi an rak ttih nemmam hna lo, an mah tu nih an hro tthan hna i con lak tiang.

Zei ruang ah an rak hro ngam tthan tawn hna ti mi ruang ah cun Chin mi kan ram si, hngal hlah uh ti khi an rak langh ter tawn. A tu ral an i tuknak zong ah kan hmuh khawh mi cu rallokap an hro mi naak in a let in an i hro i an puar, i hrocer si lo in a tuah hrim in an tuah.

Psy-War tlawm te lawng an hmang. A dang ruang pakhat chap ah cun lehrulcham an hmang. Chan thar ah cun an thlau cang ti awk in a si ko nain an thlik ah a rak taang rih. Ci le kor cu i philh ter awk a ttha nain thlau awk a ttha lo. Mindat mi pakhat a nunnnak rallokap nih an lak cun rallokap an nunnak kan lak ve lai ti khi phuan lo lungthli ah an i chiah. Credit: Cung Aung

Uktu Chia le Uktu Tha Kong a ka ruah ter. Kan umnak Indiana State hrawng ah ice snow tla ding, ni khua tha lo ding a si caah zarhkhat aa duh in kan State chung ah hruaitu hna nih heh tiah ralrin dingin thawng an kan thanh. A si khawh chungin leng chuak hlah uh an ti. Cun chuah awk a tha lo mi thil biapi na ngeih ahcun dinei na mawtaw chungah naa ken lai timi le thil poi pang chuak sual seh law mah telephone hin na chonh hna lai, dinei awk na ngeih lo ahcun mah phone hi na chonh hna lai tiah mipi kan him nak ding ah heh tiin thawng an kan thanh i an kan chimh.

Febrauary 1,2022 zanlei sangah tisik an hnah tal ka vaa cawk ve lai ka ti Meijer ah ka kal cu a tha mi a tang ti lo. An rak cawk dih cang. Mipi vial te ralring tein an um dih. Dinei an i zalh cia dih i mei mit sual seh law tiah candle te hna tiangin gas tiangin tling tein an i cawk dih hna. February 2, 2022 in company cheukhat zong nih nikhua a that lai lo caah an ti i an company zong an khar piak hna.

Kan fa le sianginn kai mi vial te zong an him nak ding caah online in an kai ter hna i a cheu school district cu chun tianglawng an kai ter hna. An saya/mah te nih email in telephone in nu le pa dih lak thawng an kan thanh i ral ring tein um ding le nikhua a that deuh lo ahcun sianginn kai a si rih lai lo nak kong zong fiang tein an kan chimh cia.

An rammi minung pakhat te hmanh thih a siang loin him tein um hna seh tiah a kan tlangtla tu rampi a hruaitu hna le tuanvo ngeitu hna cungah lomhnak chimcawk lo ka ngei pumpak in. Cu lawng siloin hitluk in rammi a daw i rammi hna fahnak in ding a siang lo tu America ram pi hna ah khua kan rak sak khawh ve hi Pathian vel a si ti lo cu chim ding dang a um lo.

Khat leiah lomhnak in ka khah lio ah kan Myanmar ram kong ruah lo awk a tha lo. Mitha lo pa MAH kong ka ruat, keimah ca a thatnak a si ahcun tiah minung zeizat thih hmanh poi ah a hei chiah lo ning, mipi nih pek lomi, mipi sinin an chuh mi hna, hranhram in an lak mi nawlngeih nak te a hmunh khawhnak ding ah midang chungkhar an tuar ning, an hram ning, an inn lo vial te khangh piak dih an si ning, thah le nawn a hei tam ning, thongthlak le tlaih le hrem a hei tam khawhning, nau pawimi nu le nau ngei ka mi nu hna hmanh hual loin tlaihhrem an tonning te hna, refugee dirhmun in pawngkam ramah umnak reprai loin aa dormi kan unau hna an hei temhtuar ning ka ruat i ka mitthli kaa hnawt cawk lo.

Aw mitha lo hna nih rampi nawlngeih nak an hun lak cang ahcun mipi thisen luan le tahhram nak vial te hi theih piak lo, i hmuh ter lo in an um ko hi teh tihi fiang tuk in a ka theih ter chin. COVID nih Myanmar ram faktuk in a den lio zongah i kham ding le i ralrin ding chim hlah a thimi le a zawmi hmanh a ningcang tein an thanh duh lo i an lih lawng te in an chimning te hna ruah tikah thinlung a fak tuk hringhren.

Ramtha le system aa ngeimi ram ahcun nawlngeih nak pek an si tikah midang caah a tuan ding ka si timi lungput he tuan a si. A tlamtling lomi an tampi ko lai nain a tlangpi cun ram rian tuan tu nih cun ram an daw i rammi himnak ding an tuaktan. Bawipa kan Myanmar ram te zonghi rammi a daw i an nunhim nak a veng kho tu nusal/pasal tha hruaitu kan pe tuan ko law…..kan mipi an temtuar nak vial te hi kan hmuhpiak ko sawh hna. Mitthli he Bawipa na sinah thla kan camnak kan let ko cang sawh ti lo cu. Credit: Biak Tha