Malaysia Lei A Kalmi Lehnak Ah Nunnak A Liammi Chin Mi Pathum Ruak Vui An Si
==========
May thla zarhkhatnak ah Thailand ram in Malaysia lei a kalmi motor pakhat aa letmi ah nunnak a liammi Chinmi pathum ruak kan vui cang hna, tiah Chin Community Bangkok nih theihternak an tuah.
Thailand ram Songkla ramkulh, Hatyai khua pawng ah May thla zarhkhatnak ah khan Myanmar mi 25 phortu motor pakhat cu a rak i let i, motor cuangmi chung in Chin mi Salai Setha solo, Mai Singo Fachhai, Salai Thurein Htun hna cu an nunnak a rak liam. An ruak cu an chungkhat hna le Chin Community Bangkok hna i bawm in May 16 ah an vui cang hna, tiah theih a si.
Myanmar ram chung ah SAC ralkap nih nawlngeihnak an lak hnu in Thailand ram in Malaysia ah a kalmi Myanmar mi hna cu lam tanṭim ah nunnak a liammi an um bantukin Thailand cozah nih an tlaihmi zong tam ngai an um, tiah theih a si.
Mochia Thlichia Ruang Hartongmi Hna Ca Ah TNLA Nih Kyats Sing 500 AA Sinah An Pek; Thlichia ruangah hartongmi Rakhine rammi hna ca ah Ta’ang National Liberation Army(TNLA) nih Rakhine hriamtlai Arakan Army(AA) sinah Kyats sing 500 an pek i, bawmhnak an pekmi cungah AA hruaitu Htun Myat Naing nih lawmhnak bia a chim.
A luancia ni tlawmpal ah khan NUG nih kyats sing 1,000, KIO nih kyats sing 3,000 le Kokant hriamtlai MNDAA nih kyats sing 1,000 bawmhnak an pek cang hna, tiah theih a si. Rakhine ram cu thlichia nih fak tuk in a den ruangah inn le lo tampi a rawk i, harnak nganpi an ton caah bawmhchanhnak rian hma a kal khawh deuh nakding ah bawmhnak kan pek hna hi a si, tiah TNLA nih nihin May 20 ah cathanh an chuah.
“Mocha thlichia ruangah Rakhine mizapi harnak kan ton lio ah atu bantukin kanmah he ṭangṭi phu tlangcung hriamtlai hna nih an kan bawmhchanh cio caah lunglawmhnak tampi kan ngei,” tiah General Htun Myat Naing nih cun a chim. Rakhine ramchung ah thlichia nih a hrawhmi inn le lo hna cu AA hruainak in an remh cuahmah hna i, lam le thingkung a purmi hna zong thianhhlimhnak an tuah, tiah theih a si.
Moe Peng Chung um Khuate Hna cu SAC Ralkap Nih Hriamngan In An Kah i Khuami 10,000 Hrawng An Zaam; Karen ramkulh, Moe Peng chung khuate cheukhat cu SAC ralkap nih hriamngan in an kah i ngakchia pakhat nunnak a liam pinah khua 9 chung in khuami 10,000 leng an zaam, tiah theih a si.
May 18 zinglei suimilaam 8:00 hrawng ah SAC ralkap khah-ma-yiah (ခမရ) 599, 590, tatma 44 le kha-la-ya (ခလရ) 48 hna cu KNU-Moe peng chung Saway khua, Kunetaw khua chung luh duh ah hriamngan pehtlai in voi 25 an kah lawng si loin Ngyionpinthar khua zong ah zuun 5 an kah i kum 14 ngakchia pakhat nunnak a liam, tiah KNU nih cathanh a chuah.
Cun, kum 47 minung Daw Hlah San, Mg Myint Myat (kum 18) hna cu hriamngan in hliam an tuar i sii-inn lei ah an thlopbul cuahmah hna. May 16 zong ahkhan Kha-la-ya 60 nih hnawngkung khua ah hriamngan zuun 7 le May 17 ah Taungsuh khua ah zuun 5 zong an kah tiah theih a si. Cun hi bantuk in khuachung ah hriamngan a kah peng caah khuami 13,991 cu khua chuahtak in an zaam dih tiah theih a si. Credite; The Chin Post