Zahan ah Cherry Htet kong an chimnak video clip Cu

Cherry Htet
************
Cherry Htet hon ti le cangka Pi Aung San Suu Kyi mitthlam ah a cuang colh. Aung San Suu Kyi hon ti le cangka Cherry Htet mitthlam ah a cuang colh ve. Mi ṭha lo pa Min Aung Hlaing ruangah Aung San Suu Kyi mui kan hmuh ti lonak thlakhat renglo a si cang i, Cherry Htet a mui kan hmuh ti lonak thlakhat renglo a si ve cang. Zahan ah Cherry Htet kong an chimnak video clipp te ka ngai i, ka lung a awṭom ngai. An chimmi hi pahnih a si i, zei deuh dah a hman deuh hnga ka tinak ah ka lung a awṭom ngainak cu a si.

1. Cherry Htet hi palik senthum a si i, “kaakuaizi vuanci”(ministry of defence) nih ASSK vengtu dingah an thlahmi a si an ti. ASSK nih a dawt tuk i, a nu le a pa zong a ton hna pinah a birthday ah sui ṭhi tiang a cawkpiak an ti fawn. ASSK thawngin sentum in bohnih(jumping promotion) an peek an ti rih. Atu hi ASSK he hmunkhat ah an chiah ko hna a timi an um an ti.

2. Cherry Htet cu “kaakuaizi vuanci(ministry of defence)” minung a si caah a dang tein an kherhlai, an kherhlai hnuah bohnih in bothum an peek i, Naypyidaw Tamadah zungah rian a ṭuan ko a timi an um an ti ve. Cu bia pahnih te nih lung awṭom ngai in a ka tuah. Zei hi dah a si kho bik nan ti cio ve hnga.

Relchap, Lai palek pawl sin cakuat; Lai palek vialte, nan phaw le nan meithal chia cang ulaw, CDM ah lut ve cang u tiah siaherhnak he ca kan kuat hna. Zeicatiah, nizan le nihin ah duh lonak langhter in lam a zawhmi hna nan kah hna ning cu tapung ral a kapmi nan lo cang. Ral a domi nan lo. Mino tete nanmah kut in an nunnak a liam, ngaihchia ngai a si. Nan cal i domh ulaw, fakpi in khuaruat tungmang cio u.

Ralkap nih tanbo ah an kan hman timi zong i fiang cikcek hna ulaw, ralkap nan si lo zia kha mipi nih in hmu cang hna usih. Nan pawcawmnak ruangah nan mit nan i chinh peng rih ahcun nanmah ca lawng a si ti lo. Nan nupi le nan fale ca hrimhrim ah hmai a hngal kho ti lai lo. Minung cu pawngkam he khua a sami kan si. Nanmah caah nan zei a poi lo men lai nain, nan fale kong ruat cio tuah u.

Minung hi paw khim lawng a za lo. Innpa chakthlang le khuami he i dawt thiam a biapi. Khuami le pawngkam minung nih rem lomi si hi thihnak in a faak deuhmi a si. Atulio Kawlram dirhmun zoh tikah mit chinh in palek rian nan i tlaihmi khi nan hmailei a “techia” lo ngaimi a si deuh. Palek ciocio ah khua a ruat deuh i, hmailei a hmu chung kho deuh paoh cu CDM an lut len cang. Rak lut ve hrimhrim u. Nan i chir hrimhrim lai lo. Credit: Perhkalh Thawng