Zaanmang Chia Ai Lim;

Zaanmang Chia Ai Lim; Tuan deuh ah ka rak tial bang 2020 US President Election cu zaan mangchia a hluan taktak. Thla hnih le cheu chung lung awttawm le um nuam loin khua kan sa. Vawlei kil-ne Lairam le Mizoram, Philippine Australia tiang in kan i tuai viar. Trump ttanh le ttanh lo i elnak le i soiselnak in media a khat. Thla kan cam, bia kan phuang. Pu Trump thawng nih vawlei a hnih bak ko. Mi roling pakhat cu a si ve hrim. Huatu, dawtu le dotu tam taktak a ngei. Mi hleice le mi mak a tling. Atu cu mitkuh thaw tein mang nuam manh caan a si cang.

Vawlei cung cu mipi duhnak democracy phung in i hruainak ram a si. Mipi duhnak hi Pathian duhnak a si thlu bal lo. Media chan si kaw, news diklo le rawiphiarnak (Conspiracy theory) a tam tuk. Tuan deuh fax, email le internet chuahka kha information age ti a rak si i atu media, YouTube, Twitter le Facebook chan cu mis-information age asi ti dingin a um. Khua tuaktan thiamlo kan caah cun zumh awk theih a har i thlihraannak poh ah kui ve a fawi.

Tutan thimnak kongah biaphuan (Prophecy) a ngeimi zong an tam taktak. An phuan ningin thil a cang lo nain sual cu ka phaw ngam hrim hna lo zeicahtiah Pathian khuakhaan kan hngal kho thlu lo. An chim ning le phuan ning in hei tling dih sehlaw, Uanthlaarnak le phorhlawt ruamkai nakah a hmangmi kan tam tuk hnga ti hna ka ruat. Tutan thil nih a kan hmuhsak, cawnpiakmi cu mi bia phuan lawngah dir loin mah tein Pathian bia rel i, Pathian duhnak kawl le A aw theih i zuam kan herh zia a si. Mizo nih โ€œmah cangai khorhโ€ an ti bang mi phungchim le biaphuan lawng i rinh loin mah tein Pathian bia rel le ei ve a herh hringhran ko. Midang ruahnak le mit hmuhmi cungah zumhnak bunh loin Mah tein Pathian bia kawl le hawl caan a si cang. Van tla MANA lawng i rinh loin mah kutchuak theitlai ei caan a si cang. Amen! Credit: Lalbat Cinzah