Yangon Khuachung Thawngpang

Yangon Khuachung Thawngpang (Zanlei Suimilam 4:00 PM tiang)
===================
Nihin Yangon khuachung cu nizan nak in i tuaitam nak a zor deuh. Insein Myone chung, Bayint Nyaung lam ah lamzawh tu hna nih an khammi pawl mei an khangh. Zanlei suimilam 3:00 PM hrawngah Tamwe i cheukhat lam an khamh mi zong mei an khangh hna. Insein, Sanchaung, Thaketa le Seikkyi Kanaungto zongah hmunhma cheukhat ahcun lamzawh nak a um rih thiamthiam. Nain hliam hma a pu mi an um le um lo thawng an zamh mi a um rih lo.

Atu zing thawkin duhlo langhter nak caah campaign thar an tuah, cucu zing fatin suimilam 09:09 AM ah kut bengh cio ding ti a si. Cun chun suimilam 1;30 ah umkheng tum ding, nihin an thawk ve. Nizan Thaketa i an tlaih mi hna minung 100 cu nihin ah an thlah than hna.

Yangon khua leng Thawngpang; Kachin ramkulh Hpakant Myone, Kamaing Ralkap camp pawngah i ralchan nak a um i pakhat hliam a pu. mah i ralchannak ah mipi lei le KIA lei an i tel le tel lo an fehter kho rih lo. Magway Ramthen, Gangaw Myone ah Gangaw le Kalay lampi ah Mipi lei le ralkap lei i ralchannak a um. Thawngzamh pakhat nih a langhter ning ahcun, Mipi lei nih Artisanal Hunting rifles an hman a ti. Hihi Gangaw le Kalay lampi i a voihnih nak i ralchannak a si, aa khawngdeng mi an um le um lo an langhter lo.

Shan ramkulh, Kyaukme khua ah nihin lamzawhnak ah teargas in an then hna, nu pakhat siizung a phan. Kadang hmundang zongah lamzawhnak a um thiam thiam, Magway ramthen Natmauk, Yesagyo, le Mandalay ramthen Tharzi, Sagaing ramthen Kalay, Kawlin, Kayah ramkulh Demoso, Kachin Ramkulh Hpakant hna ah lamzawh nak an tuah rih.

Zahan Zan Thawngpang; Mon ramthen, Mawlamyine ah rescue team i a tuanmi mino pali le KNLA lei in second lieutenant tiah auh mi ralbawi pakhat an tlaih hna. An tlaih nak hna inn ah hriam nam a um le um lo zong checking an tuah hna. Nizan ah Bago pengkulh, Palek hmunhma ah bom a puak, palek lei minung panga hma an pu. Zahan zinglei suimilam 3:00 AM hrawng ah Kachin ramkulh Shwegu khua i palek sakhan an doh hna i an hriamnam an lakpiak hna. A dotu hna hi a ho an si an langhter kho hna lo.

Nizan ah CNN reporter Clarissa Ward timi nu, Kawlram a phan, a ratpi mi a minung hna cu, Yankin myone chung i duhlonak an langhter nak hmunhma ah thawnglaknak an ngei. Ralkap nih Feb 1. hnu annaa an lak hnu ah a voikhat nak ramdang media an sawm mi hna a si. Nihin ah KNU’s Brigage 5 nih thanhca an chuah, cu ahcun nai te ralkap nih airstrikes an hman mi hi 2015 i NCA minsenthut mi zeirel lo a si pi ah NCA kha sullam ngei lo in an tuahmi a si caah kan i dohthan ko lai an ti. An thanhca ah Thai nawlngei tu nih Kayin ralzam cohlannak ding zong an langhter.

SAC nih nizan ah internet kong thawng an thanh Myanmar Alin ah Deputy Commander in Chief General Soe Win nih internet nih riantuan nak caah hnahnawh a kan pek. Cu caah internet hman khawh thannak ding caah pehzulh in rian ngeitu sin ah hmankhawh than ding in kan tuah lai a ti. An kaa lawng a si te lai dah. Kawlram pumpi in nihin suimilam 1PM hrawng in mei a mit dih, EPC nih thawng an thanh ning ahcun technical thatlonak a um caah suimilam 4-5 hrawng ah mei a ra than te lai an ti. Kannih lei cu suimilam 6 ah a ra. Mei a rawk an timi hi ralkap zia a rawk i a si lai dah, a ruang a um. Nizan ah Rakhine ramkulh ah Rohigan hriamtlai umnak ah ralkap nih an kah hna, a zapi te ka langhter ti lo. Credit; Van Lian Thang