Vladimir Putin mit le hmai zoh tikah a chung ah khuachia i hrolh sehlaw!
Russia nih Ukraine a tuk ning le a tuahto ning cu a fak taktak!
===========
“Babylonian captivity” timi hi Jewish tuanbia ah a lar ngaimi a si. Babylon Siangpahrang, King Nebuchadnezzar II nih Jerusalem khua ah a ropui takmi Solomon temple a rak hrawh i, Jewish miphun cu sal ah aa kalpi hna. Cu thawk cun, Jewish miphun cu Vawleicung kakip ah an phan. A cheu cu an phun tiang a tlau beh.
Babylon sal tannak in Jewish miphun cu Russia ram an phan. Russia empire, Alexander II chan (1880s) ahhin, Jewish Miphun hi RUSIA ram ah an rak tam ngai ngai ti a si. Ramleng ahcun, Jewish miphun tam biknak ram a si an ti.
Russia Siangpahrang, Alexander II an thah i, a fapa Alexander III nih uknak a lak hnu in, “May Law” timi phung thar a chuah i, cu hmang cun, Russia siangpahrang nih Jewish miphun cu fakpi in a rak hrem hna. An inn, an lo a hrawh piak hna. Fak tuk in Jewish miphun a hrem hna caah, an celh ti lo i, Jewish miphun tampi cu USA le
British/ UK ahhin tampi an rak zaam. US ram ah Jewish miphun tam deuh khi, Russia ram in a rak zaammi an si.
Cawnpiaktu tampi nih an chim lengmangmi cu, US nih thluachuah an co hi, Thanksgiving ruang ah a si an ti. Cun, an peh rihmi cu Jewish miphun an dawt hna i, an humhim hna ruang ah a si tiah an chap rih.
Pathian nih a thimmi Jewish miphun cu, Vawleicung kakip ah an itthek i miphun dang kut in hrem an tuar lengmang. US lawng ahhin an him bik. Nihin ah Israel ram a himnak zong ahhin biatak tein dirhkamhtu cu, US an si. Cucaah, US cu khuaruahhar in Pathian thlawchuah an co tiah tampi nih an chim.
RUSSIA nih Ukraine a tuk ning le a tuahto ning cu a fak taktak. A cheu nihcun, huatnak in a chuakmi ral a si an ti. A bik in an President Volodymyr Zelenskyy hi a huat rumro ko tiah a ruatmi an um. Jewish miphun a si caah huat khun dawh a si tiah a zummi zong an um. Cucaah, a cheu nihcun Vladimir Putin mit le hmai zoh tikah a chung ah khuachia i hrolh sehlaw a dawh tiah an ti phah!
Putin nih Ukraine cu a ngamh tuk nain a la kho naisai rih lo. Lak khawhnak a si paoh ah tiah Mipi bak a ral cang hna i, a thi paoh thi hna seh tiah a kah thlawrh in a kah hna. UN raldo phung a buar cikcek. War Crimes a si tiah fakpi in an au hnawh. Asinain Nuclear hriamnam hmang in Ukraine cu a tlaihhrem/ hostage a tuah.
Asinain Ukraine nihcun Russia ral hi kan tei lai. Tei lo a ngah lo tiah an khuapi cu fek tein an ven ve ko. A donghnak ahcun an ven khawh te ko lai tiah zumh a si. Putin nih Ukraine a tlaihremhnak cung ah fakpi chiatnak a ton hrim lai. A tu zong a ton cuahmah cang i, amah thlaknak zong a phakpi te lai tiah a ruatmi zong an um.
Europe politicians nih Russia oil le gas an rak irinhmi an palhnak an ifiang. Tuhi lam dang an dah cuahmah. US zong nih Russia he chawlehnak an tuah lengmangmi an ichir cang. Ukraine le Russia war nih Vawleicung economic system tampi a thlen cang lai tinak a si.
Ukraine le Russia war nih harnak a kan pek cio cang. Nihin gas ka rawng i, full tank ah $208 a dih. Zarh khat lawng a nguh lai. Gas man lawng ah thla khat ah $850 cu a dih lai tinak a si. Thla khat ah Car man kan pekmi nakin thla khat chung ah gas man kan rawngmi a tam deuh cio cang lai tinak a si. Zarh 2, 3 chung cu a kai thluahmah rih lai ti a si rih.
TelePhone handset man cu a tlawmte nain a “plan/ data “caah tampi kan pek bantuk a si cang. Gas man a fah tikah, a poinak cu thil dang vialte zong a man an kai dih. Zeicatiah, vawleicung ah kan hmanmi vialte phawrhnak a si tikah, phawrh man a kai ahcun, thilri vialte zong kaiter an hau cang tikah, a cawtu/ consumer caah a fak ngai cang.
Tulio Gas man a kai khunnak supply a tlawm caah a si an ti. Supply a tlawmnak a ruang cu, RUSSIA sinah Gas a cawmi companies tampi nih Russia sinah gas an cawkmi an tlawmter cio tiah an chim. Zeicatiah, advance in Phaisa ipek a si tikah, sanctions a ra ahcun, sungh viar an ttih cio caah a si tiah an chim. Cucaah, tulio hi gas supply a tlawm i, demand/ cawtu an tam tuk caah a kai thluamah hi a si.
Canada 🇨🇦 ram hi Russia in oil/ gas a cawmi ram a si lo nain a kai thiam thiam ve. Zeicatiah, Russia gas a cawk lo nain, US gas le Arabia ram gas tampi aa rinh ve caah a si. 2019 lio ah Russia gas tlawmte an cawk. 2020 hi an caw ti lo. Russia gas kan Caw ti lai lo tiah kan MP nih nizan ah a chim chih ve cang.
Canada hi gas tampi a chuak ve ko. Canadian tampi zong nih Canada chuak hi an rawng cio ve ko nain, US le Saudi Arabia lei tbk in man deng deuh in cawk ding a um caah, Canada nih tampi an chuah kho lo. Nihin news ah OPEC (Organization of the Petroleum Exporting Countries) nih tulio global oil shortest buainak hi phisin dingin hmalak nak an ngeih cuahmah ve tiah an chim.
US Cozah nih Russia sinah oil cawk cu an phih ve cang. Cun, US cu, ralrin ah oil ikhawnmi, “strategic petroleum reserve” an ngei i, cu chung in, 30 millions barrels lak dingin an itimh ti a si. EUROPE le Canada tbk nakin an ining sup lai tinak a si. Credit: Zasang Cinzah