African Tleirawk Thihnak In Mipi Karlak Le Palik Karlak Ah Buainak A Chuah Caah Macron Nih Crisis Tonpumhnak A Kawh : France Buainak
=========
France ram pumpi ah zaankhat chung in buainak fakpi a chuak, a ruang cu lam hngak tu (Traffic) Palik hna nih African mi phun tleirawl pakhat an kahthahnak ruang ah a si. Hi kong he pehtlai in, President Emmanuel Macron nih a tu bantuk in tonpumhnak a khawh hi asi.
A zaan hnihnak ah tualchung mi duhlonak langhter in lam a zawh mi, minung 150 tluk cu Palik nih an tlaih hna tiah Interior Minister Gerald Darmanin nih a chim. Mipi thinhunnak cu zalampi ah a karh chin lengmang a bik in France khuapi ah a zual tiah theih asi. Buainak a hrampi aa thok ning cu, Paris nitlak lei khuapi leng Nanterre ah African tleirawl kum 17 Nahel tiah kawh mi cu Palik nih an kahthah tiah theih asi.
Social media tampi nih an langhter ning cun, Palik officer pa hnih lak i pakhat nih African tleirawl motor in zaam aa tim mi cu lam neih te in a kah tiah an langhter. Palik cheukhat nih an chim ning cun, African tleirawl hi a motor cung in chuak ding ah nawl kan pek a sinain a zaam chih caah a tu bantuk in kan kah hi a si tiah an chim ve.
Wayner Kahdohnak Hmun A Kir Hnu Ah Mi A Thah Ṭhan Tualchung Mi Thinphang In An Um. A Liam Cia thlathum i, Ukraine ram kahdohnak hmun in Ivan Rossomakhin a rak kir hnu in Moscow khuachak lei ram khuate tualchung mi hna cu thinphang thlalau in an um tiah theih asi.
A liam cia kum 3 ah khan lainawm buainak (case) in thonginn ah thlak a rak si bal a sinain, Wagner private military contractor he kahdohnak ah tel ding in aa pek hnu ah chuah zalen a rak si.
Novy Burets ah kir in, Rossomakhin nih Moscow khuachak lei lam kilometer 800 (meng 500) tluk a hlatnak khua te hna cu meithal he thah ding in a hrocer hnawh hna tiah an chim.
Hi ruang ah, Palik hna nih a um kalnak hmunhma zulhdawi peng ding in an i zuam. A sinain a rak kir ni 10 hnu caan raulo te ah nutar pakhat a inn chung ah a kahthah tiah an chim. Rossomakhin’s buainak (Case) hi a dang tein sarpiak a si lo. Associated Press nih kan hnu thla zeimawzah chung khan Wagner thiam lo canternak ah a tel ve mi hmunhma 7 an hmuh ṭhan tiah Russian media report nih a langhter.
Russia nih Ukraine kahdohnak ah a ralkap tampi kuat a timh cu lak ah Wagner mercenaries zong a talh chih tiah theih asi. Wagner he ṭangṭi in ral a do mi paoh cu kahdohnak dih in luatnak pek nan si lai tiah bia a kamh hna. Kan hnu khan President Vladimir Putin nih Ukraine ram ah thiamlo canter a si mi hna caah ngaihthiamnak pek ansi lai tiah ca-thanh a chuah.
Afghanistan Tualchung Mipi 1,000 Tluk Taliban Zaang Ennak In An Thi Cang – UN. Kum 2021 August thla in kum 2023 May thla tiang Taliban nih an ram an lak hnu in Afghanistan ah tualchung mipi 1,000 tluk cu hriamngan puahkehnak le thazaang chuahnak in an nunnak a liam cang tiah theih asi.
Kum 2021 August 15 in kum 2023 May thla karlak ah tualchung mi 1,095 an thi i 2,679 tluk nih hliam fak an tuar tiah U.N Mission to Afghanistan (UNAMA) nih an langhter. Nunnak liam mi 700 tluk hna hi khuate Mosque khua fimcawnnak hmun le chawdawr/Bazar mipi umnak hmunhma bomb puahkehnak ruang ah a si tiah an chim.
Hi buainak hi NATO hriamtlai phu an tlak hnu August 2021 Taliban nih nawlngeihnak an lak hnu ah ralthuam hmang in kahdohnak a rak chuak mi ah khan a si. I venhimnak lei ah hawi hlei in Islamic State hi harsatnak a tong mi ansi tiah an langhter.
Hi kong he pehtlai in, misual hriamtlai phu hi thilsual tuah tu ah puh an si hna tiah UNAMA nih a langhter chih. Islamic Emirate venhimnak phu hna nih mipi himnak ding ruat in, misual hna hmunhma lak piak ding ah an cawlcang tiah theih asi. Credit: Lungmili Media