Nihin Kan Theih Mi Chungin Thawngpang Chia Fonh!
===================
Magway ramṭhen, Minhla peng Didaukkan khua pawng ah PDF nih an i citmi motor cu May 29 zan suimilam 8:00 hrawngah SAC ralkap nih an kah i PDF ralkap 8 an nunnak a liam, tiah theih a si. Nunnak a liammi PDF cu Tayet, Kanma, Mindung in ṭangṭi phu an si i, raltuk cawn an dih in Minhla peng lei an kir lio ah atu bantuk in SAC ralkap nih an kah hna hi a si, tiah Magway ramṭhen hrambunh PDF in ṭuanvo ngeitu pakhat nih a chim.
SAC ralkap nih PDF motor an kah i ralkap 8 an nunnak a liam pinah meithal zun 7 le meithal kuan zeimawzat zong an laak. Nunnak a liammi hna chungkhar cu humhimnak ca ah kan langhter lo, tiah ṭangṭi phu in ralkap pakhat nih a chim. May 31 zinglei zong ah Didaukkan khua in farlong 4 aa hlatnak ah meithal kuan hma in a thi mi pa pakhat ruak zong an hmuh i khuate vengtu phu chungtel a si lai tiah an zumh.
A luancia 2022 June 22 lio zong ah Pywinphyu peng Mezali hlei ah meithal phortu PDF cu Skat motor 2 in an kal lio ah SAC ralkap nih an rak kah hna i, PDF 12 nunnak a rak liam cang. Tanintharyi ramṭhen, Dawei peng Bonmaw sang le Saw Minyo sang tonnak ah uico rawl a petu pa pahnih hna cu khuachung ah aa chawkmi SAC ralhrang nih meithal in an kah hna caah an nunnak a liam, tiah tualchungmi hna nih an chim.
May 30, zan suimilam 9:00 tluk ah a thlithup in aa chawkvakmi SAC ralhrang nih uico rawl a petu pa pahnih Ko Hein Zaw Aung (kum 38) le a hawipa Ko Aung Aung hna cu a ruang um loin voi 50 renglo meithal in an kah hna caah an nunnak a liam hi a si. A ho hmanh leng ah kan chuak ngam lo” tiah tualchungmi pakhat nih Western News ah a chim.
SAC ralhrang nih pa pahnih an kahthahmi hna cu an chungkhar hna sin ah atu tiang an ruak zong an pe duh hna lo, tiah tualchungmi hna nih an chimchap.
Magway ramṭhen, Sidoktaya peng, Mandatkaing (မဏ္ဍပ်ကိုင်း) khua pawng ah a luancia May 23 ah khan kahdohnak a chuak. Cu kahdohnak ah SAC ralhrang chungtel 3 an thi i 4 nih hliamhma an tuar, People’s Revolution Alliance (PRA-Magway) ralkap pakhat a nunnak a liam, tiah theih a si.
Ram le miphun ca ah a nunnak a petu pasalṭha hi Ngape peng in Asho (Chin) mino pakhat a si i CDM a tuahmi sianghleirun siangngakchia pakhat zong a si, tiah theih a si. “A nih hi tang 10 awngka a si i, Covid-19 ruang ah sianginn a peh kho ti lo. Kum 21 a si i, SAC ralhrang nih uknak a laak ruang ah mipi ralkap PRA ah a lut hmasa bikmi ah aa tel,
keimah he neihniam ngaimi kan si ca ah ka ṭa bantuk in ka zoh, bochan awk a tlaak ngaimi zong a si, kai zumh kho hrim lo” tiah nunnak a petu pasalṭha hawikom nih Zalen ah a chim. Cu kahdohnak ah ṭangṭi phufonh hna a simi People’s Revolution Alliance (PRA-Magway) le Z-Fighter phufonh hna nih kandoh hna i, SAC ralhrang MA-1 meithal zuun khat zong kan laak khawh chih, tiah PRA-Magway nih cathanh an chuah.