Vawlei Ralpi 3rd Nak A Chuak Kho

Vawlei Ralpi 3rd Nak A Chuak Kho
==========
Bible scholar tampi nihcun vawlei ralpi 3rd nak cu, kan Bible nih a kong a chimmi donghnak ralpi hi a si lai, tiah an zumh. Sihmanhsehlaw kan Bible nih vawlei ralpi pa zeizat dah a um lai, timi a chim lo. Cucaah Jesuh rat tthan lai ah a chuak dingmi donghnak ralpi hlan ahhin, ralpi dang zong chuah khawh len rih a si ko.

Nihin ah kan vawleipi therphang in a chia dihtu Russia Vs. Ukhraine ral nihhin vawlei ralpi a thawhter khawh ko. A thawhter hrimhrim lai, tinak siloin vawlei ralpi thawhter khotu ding ral a si. A ruang tawi tein a tanglei ah ka hun langhter lai:

1. Ukriane le Russia hi vawlei ram tthawng vialte tthen hnih ah a tthentu ram an si: vawlei ralkap fonh phu vialte lakah a tthawng bikmi cu North Atlantic Treaty Organization (NATO) hi a si. Ram tthawng lawngte ram 30 fonhnak phu a si. Cu hna lakah democray ram vialte lakah ram tthawng bik, United Kingdom, United States, Canada, le France, hna zong an i tel.

Cu phu nihcun atu tan ah fek tthup in Ukraine an dirkamh. Atu tiangah, fakpi in Russia cu lam phunkip nih (hriamnam tel rih lo) an den cuahmah cang hna.

Khatlei ah vawlei cung communist ram vialte lakah ram tthawng bik China, le North Korea hna nih fek tthup in Russia cu an dirkamh ve. Hi ram hnih lengah hin, Cuba le hlan lio ah Soviet Union chungtel ram a rak simi Armenia, Kazakhstan, Kyrgyzstan, Tajikistan le Belarus hna zong nih Russia an dirkamh lai i Middle east lei in anmah he lungput khat a kengmi Iran hna zong nih Russia cu an dirkamh ve lai.

Khah, tiva khatlei ral ah vawlei cung democracy ram vialte lakah ram tthawng bikbik lawng nih Ukraine cu an dirkamh i tiva khatlei ral ah communist/islamic ram tthawng bikbik nih Russia cu fek tthup an dirkamh ve. Cucaah hi ram hnih fak taktak in an i kah i diplomatic le sanction nih Russia lungthin a tthumter khawh lo ahcun, hriamnam in nun chimh a hau te lai.

Cu te cu vawlei ralpi thawhternak tawhfung te cu a va si ko hnga. Atu ah Russia nih Ukraine tuk ding in nawl a chuah cang i kap hnih lei ralkap nunnak tampi a liam cang. Russia nih a tei ko lai caah, Ukraine ram dihlak te lak ding in a tuk ko ahcun, NATO ram tampi him loin an um ding a si cang lai caah an cohlang kho lai lo. Mah thihnak cun mithih cu an i thim deuh te ko lai.

Zeitik poh ah a cang kho! 2. Cucu vawlei ralpi 1st le 2nd nak aa thokning he zong aa khatmi a si: Vawlei ralpi 1st nak cu Soviet Union nih EU chungtel Yugoslavia ram a rak tuk lio ah, US ralkap nih an hawi Yugoslavia a rak bawmhnak in aa thokmi a si. Cu ve bantuk in vawlei ralpi 2nd nak zong cu Hittler hruaimi Germany ralkap nih Poland an tuk i Great Britain le France nih Poland an dirkamh nak in a rak i thokmi a si ve.

Russia nih Ukraine ram hi NATO nih hriamnam ngan chiah i Russia ram cawlcang ngam loin tuah te nak ah hman an timh, tiah a ruah ve. NATO lei nih le Russia nih hlan lio Soviet Union ram chungah a rak ummi ram vialte kha thahrum in amah kut tangah chiah dih tthan aa timh caah Russia kut in kan i ven a hau, tiah an ruah ve fawn caah hi raltuknak meici hi vawlei pumpi a ttekdarh dih lai lo, timi chim khawh a si hrimhrim lo. Credit: Saya Hram Bik Lian