Vawlei cung ah khrihfa Ram a si mi hna hi, an mah tein a i uk dih hna!

Vawlei cung ah khrihfa Ram a si mi hna hi, an mah tein a i uk dih hna!
===========
Khrihfa ram kan i ti zumhnak ah hmai ah kan kal kan i ti, Pathian Dawtnak kan thei kan i ti. Khrihfa bu kan then cheu i hmankhat Pathian biak tii le thangthat tii zong kan duh lo. Pathian Dawtnak kan theih sin in thencheu nak khua kan ruat.

Miphun kan daw kan i ti hmunkhat ah lungrual nak he riantuan ti kan duh lo. Miphun Dawtnak kan neih sin in thencheu nak khua kan ruat, kan i thencheu hna. A ngai ngai kan ti ahcun Vawlei cung ah khrihfa Ram a si mi hna hi, an mah tein a i uk dih hna. Miphun dang nih Uk mi le duh paoh in sal bantuk ah hman mi an um ti lo.

Khrihfa ram a thangcho lo mi ram Vawlei cung ah an um ti lo, khrihfa ram a si mi paoh paoh thangcho dih hna.
Kan nih Laimi Miphun hi 99 cu khrihfa mi zum tu kan si nain kum 120 leng chung Miphun dang kut ah kan um cang.
Thencheu nak lawng hi ma kan thiam mi a si hnga? Hmunkhat te ah lungrual tein Pathian zong biak tii i Pathian zong thangthat tii hi kan i thim ding a si hnga lo maw?

Miphun le ram Dawtnak zong hi hmunkhat te ah lungrual tein tuan tii caan a si hnga lo maw? Zeitik ah khin dah lungrual tein hmunkhat te ah riantuan tii caan a si te hnga? Pathian hi Dawtnak Pathian a si. Zawn ruahnak le zaangfah nak a nei mi Pathian a si.

Kan Miphun hi pakhat le pakhat i zawn ruat hna uh sih, i zaangfah hna uh sih, i daw hna uh sih! Cu lawng ah khrihfa a si mi Miphun kan si nak le khrihfa ah chiah mi kan ram kan Miphun hi Miphun dang kut in kan luat lai i sal bantuk ah chiah mi Miphun kan si ti lai lo.

Unau chuak khat pa 2 hna in Miphun le Ram caah nun nak pek in dohthlennak an tuah, Tta far chuak khat pahnih hna in nun nak pek in Miphun luatnak ding caah dohthlennak an tuah i, an nun nak an thap. Inn chung khar khat Minung 10 hna ram tha ram rum ah, aphan mi hna tah zei dah kan tuah khawh mi a si ve hnga?

Unau pahnih le Tta far pahnih hna nih, an unau an Tta far in, an nun nak tiang Miphun le Ram caah an thap lio caan ah hin, dai tein kan zoh sawhsawh ko hna lai maw? Zei te tal khi an caah tuah duh nak lungthin le zawn ruahnak lungthin tal kan nei ve hnga lo maw? Laimi hi Pathian a duh in kan duh i cu ahcun kan i za, a mah sertu Pathian fial mi rian tuan kan duh lo. Miphun le ram dawt hi sertu Pathian fial mi riantuan a si. Credit: Salai Ceu