Vanlawng Kahnak Hriamnam Kan I Hmaithlak A Herh!

Vanlawng Kahnak Hriamnam Kan I Hmaithlak A Herh!
============
Kan hnulei ah vanral vennak kong tlawmpal ka ṭial cang nain ṭialnolh ka duh. Nizan tihni Oct 23 i Kachin ramkulh Hpakan peng thilcang mi kha kan theih cio ko. A thimi dihlak 100 leng an si cang tiah The Irrawaddy News nih a ṭial. SAC nih cun lehrulh kahdohnak (တန်ပြန်စစ်ဆင်ရေ:) kan tuahmi a si tiah an thanh. Asinain cucu thiam an i chehnak sawhsawh a si.

Timh ciammam tein mizapi an umnak ah bomb an thlakmi nih an nawlngeihnak a hmunh khawhnak dingah cun zeibantuk tuksaphur thahnawnnak zong an tuah lai ti kha a langhter. UN, US le zatlangbu (INGO) tampi nih SAC mawhchiatnak cathanh torlecheng in an chuah. Asinain SAC cu cathanh in mawhchiatnak men nih a chei lo tuk palia! A hriktida hmanh a thak lo!

UN nih zetin a ti lai? US nih zeitin a ti lai? ASEAN nih zeitin a ti lai? ICJ le ICC ah tazacuai khawh a si tibantuk kan ruah lioah nunnak tampi an liam. Atu lioah cun zeikong hmanh ruah len a hau lo. Vanlawng kahnak hriamnam tu hi kan i hmaithlak cio ding a si ko. Ngakchia an umnak sianginn le hlasaknak a tuah sawhsawk komi hna hmanh vanlawng in bomb a thlak hnawhmi nih kan miphun hloh dih hi zeihmanh ah a rel lai lo. Kan khuapi khangh dih zong a ui lo hrimhrim.

Rom siangpahrang Nero nih Khrihfa hna sualphawtnak dingah Rom khuapi a khangh i hlasak pah in a zohmi bantuk khan Min Aung Hlaing le SAC ralbawi hna nih kan khua kan inn a kangh lio le kan thih cuahmah lio hi tisa-sen din pah in an kan zoh men ko lo maw! SAC cu IS le Taliban renglo an si. Taliban nih Afghanistan an uk hnuin buainak dang tete um hmanh seh law kan ram bantukin mizapi an temtuar lo. IS le Taliban hruaitu hna hmanh nih khin Min Aung Hlaing sual ning an theih ah an khuaruah a har lai. Sualnak ah cun kan rak tluk lo tuk hi teh an ti lai a fiang.

SAC nih 2023, August ah tuah an timhmi thimnak hi kan tuah kho lai lo ti an phang tuk. Thimnak hi an tuah khawh sual ahcun MAH nih ramhun (President) a ṭuan lai i thimnak in a kaimi cozah kan si tiah dotla cozah si aa zuam lai. Cu lawnglawng cu SAC caah dotla cozah si khawhnak lam a ummi a si. Ramchung ramleng in thimnak kan cohlang lo, cu ee kha ee an ti len zongah UN ah Veto Power a ngeimi Russia le China nih an cohlan lai i cuticun an hmun thai ko lai.

Cucaah SAC nih thimnak hi tuah ding hrimhrim in an i tim. Cu thimnak tuah kho lo dingin dawntu a si tiah an ruahmi paoh cu thianh an i zuam ko lai. Dawntu thianhnak ah cun tanglei kahdohnak an i bochan khawh ti lo caah cunglei kahdohnak hi fak chinchin in an tuah lai ti a fiang. Fur a dih lai, khuadawm an thiang lai i duhpaoh in cunglei thazang a hman khawh cang lai. Fur chung hmanh ah vanlawng a hman lengmang cu mu! Fur a dih cun a zual lai.

Hi hlan ah cun Regional Military Commander (တိုင်းမှူး) hi vanlawng hmannak nawl an rak ngei lo. Asinain kan hnulei ah khan Regional Military Commander (တိုင်းမှူး) hna cu cunglei ah siannak hal loin vanlawng hman khawhnak nawl an pek hna.
Rakhine le Chin ramkulh hi Western Command (အနောက်ပိုင်းတိုင်းစစ်ဌာနချုပ်) ah an chiah i an hmunpi cu Rakhine ramkulh Ann khuapi a si.

Vanlawng kahnak kan ngeih ṭung lo ahcun zeidang thil kan zalhmi vialte hi an ciam dih ko lai. Cucaah pumpak, a khua, a peng le a ram huap in vanlawng kahnak hriamnam kan i hmaithlak a herh. Zeidang kha an biapi lo ka tinak a si lo. A tlawmbik CNA nih 3, peng CDF nih 1 cio tal an i hunh khawh a hau. Credit: The Chin Post

A Mah Le Mah A Thah (Suicide) A Tuah Mi Tlangvaal Kaung Htet (25) Nih A Thih Lai Te Ah A Chungkhar Sinah Caa A Tial Tak Mi! A tu lio ah biachahnak ka tuah mi hi a palh tiin maw sual rak ka phaw hlah uh mu. A tak in kaa thim mi a si caah zalong tein kal ka duh, tiah a thih lai October ni 21 ah ca a rak tial hmasa. A chungkhar sinah caa a tial tak mi cu, ” KA Nu, A May Kyi, Ka Ni, May Htu le A May Nge nan zapi tein hi vial in nan Kut kan tlaih hna ( Kan thlah, chawnhbiak ta hna). Upat kan peek hna mu.

Zeithil paoh hi zei caan ah dah zei kan tuah lai timi hi ka theih ti lo ruangah, a donghnak ah hi lam hi kaa thim mi a si. Hmailei ah zeithil dah a cang lai timi hmanh ruah zongah ka tih. Minung pawl zong ka tih hna. Phaisa ngeih lo zong ka tih. Zei poah hi ka tih dih.

Ka nau lete zong tthan tein rak kan zohkhenh piak hna uh mu. Hi vawlei nunnak cu, hi vial in kaa za cang ko lai. Ka rak tuah cia mi pawl sual ka phaw hlah uh mu. I thim ding lam hi, hi hlei in adang ka ruah kho ti lo e. Zeitehmanh zong thatnak ka tuah kho lo e.

Ka nau pa lete ka far lete zong kei mah bantukin nan si nak hnga lo rak i ralring uh mu. Ka Ni..A May Kyi zong, ka Nu zong rak ka zohkhenh piak han mu. Ka Ni..na cungah ka rak ttha bal lo mu (Thatnak ka rak tuah bal lo mu.) Ka Ni..ka ngai thiam ko mu. Hi vial hi a si ko.

Kaa thim mi hi nan ka ngaithiam ko lai tiah i ruahchan buin upatnak kan peek hna. Ka Nu le, ka Ni lete nih nan dawt mi Kaung Htet.” tiah caa a tial tak. Cakilk-A tlak ning in ka leh.