US nih China ralrinnak an pek!

US nih China ralrinnak an pek!
=========
Ukraine Kongah Russia Nih Tuluk Sinah Bawmhnak A Hal, Na Bawmh Ahcun Na Cei Lai Tiah US Nih Ralrinnak Pek!
Ukraine ram kongah Tuluk nih Russia cu bawmhnak a pek sual ahcun a cei te lai tiah American nih ralrinnak a pek cang tiah American thawngzamhnak nih an langhter.

Russia nih Ukraine ramchung luhhnawh in kahdohnak a tuahmi kongah raltuknak lei he pehtlai in bawmhnak pe dingin Tuluk cu Russia nih bawmh a hal tiah min langhter a duhlotu American nawlngeitu hna nih American thawngzamhnak cheukhat sinah an chim.

Asinain Washington ah a ummi Tuluk Embassy nih cun Russia nih atu bantukin bawmhhalnak zeihmanh a um lo tiah an chim ve. American le Tuluk nawlngeitu hna karlak, tonbiaruahnak an ngeih hlanah Ukraine kong he pehtlai in American leikap nih ralrinnak an pek hi a si.

Ukraine ram buai a thawkka ah Tuluk nih a hawitha simi Russia tuahsermi kongah a lungtlinnak a chim nain raltuknak kongah siseh sipuazi leikap ah bawmhnak a pekmi hi theihfian a si rih lo. Asinain Russia nih monghtu/khawltu umlomi vanlawng, raltuknak kong he pehtlaimi ralthuam tibantuk bawmhnak pe dingin naihrawng ah khan Tuluk sinah bawmhnak a hal tiah American nawlngeitu hna chimmi cherhchan in American thawngzamhnak tampi nih an langhter.

Russia cungah a fak taktakmi phihkhamnak le dantatnak cu luat dingin asiloah bawmhnak kongah Tuluk ram cu direct in pehtlaihnak le bawmhhalnak a tuah tiah American rammi humhimnak lei ruahnak petu/cheutu nih CNN he biaruahnak ah a chim tiah Voice of Myanmar nih a tial.

Russia nih Ukraine raltuknak caah chawleh le raltuknak lei bawmh a hal tiah American thawngzamh pakhat nih March 13 ah a langhter. China nih Russia phihkhannak tuah dingin a hrial i bawmhnak a pek a si ahcun a fak tukmi “a phichuak pawl” a tuar lai tiah White House nih ralrinnak a pek hnu sml tlawmpal ah a tu bantuk thawngpang an langhter hi a si.

Russia nih a hawiṭha bik sin in raltuknak lei bawmhnak a hal tiah American rian ngeitu pawl nih an chim. Nitlak lei ram tam deuh phihkhanhnak ruangah a tuarmi sunghnak pahchih khawhnak hnga China sin ah bawmh a hal tiah min langhter a duh lomi American rian ngeitu pakhat a chim tiah New York Times thawngzamh nih a langhter.

Russia nih a halmi hi China nih zeitin dah a leh timi fiang tein chim ding cu rian ngeitu pawl nih an chim duh lo.
Washington ah a ummi China Embassy zungin rian ngeitu pakhat nih “Hi kong he pehtlai in zeihmanh kan theihmi um lo tiah” thawngzamh pawl sin ah a chim. March 14 ah Rome khua ah US level delegation phu nih China level rian ngeitu pakhat he tonnak kan ngei lai tiah White House nih a thanh hnu sml tlawmpal ah a tu bantuk thawngpang a chuah hi a si.

US National Security adviser Jake Sullivan le China Communist Party i top Ambassador Yang Jiechi cu ram hnih karlak zuamcawhnak tuah cuahmahmi le Russia nih Ukraine a tuknak ruangah Ukraine ram himnak le Vawleipi tiang a tlermi himnak kong he pehtlai in biaruahnak kan ngei lai tiah US National Security Council in biachimnak nawl a ngeitu Emily Horne nih March 13 ah a chim.

Russia nih Ukraine a tukmi cungah China nih sualphawtnak a um lo i Russia-Ukraine karlak ah a fak chinchin mi entainak cungah NATO phu nih nichuah lei ah ralkap an thlahmi cungah a tu le tu sual a phawt hna.

Russia nih Europe nichuahlei ah a ummi Ukraine ram a luh hnawh hnu in US nih Ukraine innpa ram pawl sin ah ralkap thazaang le ralhriam a hun chap thluahmah ve. US President Joe Biden nih, “NATO hmunram cu lehmah pakhat zong luat loin US nih kan runven lai,” tiah Russia nih Ukraine a luh hnawh hnu ah a chim.

North Atlantic Treaty Organization (NATO) ah US telh in chungtel ram 30 an i tel hna. Ramdang ral nih NATO chungtel ram pakhatkhat a tuk ahcun kan i bawm lai, tiah runvennak lei ttanrual ding in hnatlaknak a ngeimi ram an si hna.
Romania, Poland, Slovakia, Hungary, Lithuania, Latvia le Estonia hi atulio Russia nih a tukmi Ukraine he innpa ram pawl an si caah Russia ral in ven ding in US nih a ralkap le a ralhriam pawl a hun kuat thluahmah hi a si.

Abikin Poland ah US nih ralkap le ralhriam a kuat. Nizaan nai khan ralkap 500 le Van ral runvennak Patriot’s Missile System pahnih a kuat. Germany zong ah US ralkap thar kuat chap ding in timhtuah a si. Europe ah a ummi US ralkap thazaang hi 100,000 an phan cang lai, tiah CNN zong nih March 9 ah a ttial.

Poland ah hin US ralkap 4,000 an rak um cang i atu ah a thar in ralkap 3,000 kuat chap a timh. 3,000 chung ah 500 hrawng cu Poland ah an phan cang. NATO Secretary General Jens Stoltenberg zong nih, “NATO raldohnak vanlawng 13o hi atu ah ready in kan umter hna. Cun, Mediterranean Rili ah ralkap tilawng 200 leng kan chiah i ralkap zong a thong in ready in kan umter ko hna,” tiah a chim.

Russia nih Ukraine a luh hnawhnak zarh hnih fai a hun si cang. Russia bomb thlaknak ruang ah Ukraine rammi 450 hrawng an nunak a liam cang i, cu chung ah cun 41 hi ngakchia an si hna. Hliamhma a pumi rammi sawhsawh zong 1,000 leng na phan. Ukraine ramchung rilikam khuapi a simi Kherson khua cu Russia nih a lak cang i a dang khua pawl lak ding in hmai an nor cuahmah.

Ukraine raldoh bawmh ding in vawleicung ram 50 in pum aa pemi minung 30,000 leng zong Ukraine ah an phan ve. March 10 tiang ah Russia ralkap a thimi hi 6,000 cu an tling lai, tiah CBS nih a ttial. Cun, Ukraine raldohnak ah Russia ralbawi (Commander) pakua a thi fawn cang.

Ukraine ramchung khua tampi ah kahdohnak a um caah innpa ram ah a zaammi hi 2.5 million (2,500,000) an phan cang, tiah NBC nih a chim. Aruang um loin Russia nih Ukraine a tuk caah vawleicung ram kip thin a phawh i sipuazi dantatnak fak tuk in an tuah.

Facebook, Twitter, Tiktok tibantuk vawleicung social platform ngan bikbik pawl nih Russia ram ah an Platform hman khawh lo ding in an thah. Cu lawng si loin vawleicungpi cul in kan hmanmi Master Card zong Russia rammi pawl nih an hmang kho ti lo, thahpiak viar an si.

Russia ramchung ah Branch 800 leng a ngeimi MacDonald zong nih a dawr a khar viar. A fak khunmi cu Russia Central Bank zong dantat aa huah pin ah US le Europe ram pawl nih Russia zinan le gas lak ti lo ding in an phih dihmi hi a si. Russia tangka man fak tuk in a ttum. Russia tangka fang khat nakin US Dollar pia khat (cent) a man sang deuh cang.

Nitlaklei ram nih Russia cung ah sipuazi dantatnak fak taktak in an tuah bang in Ukraine kiangkap ah a ummi NATO chungtel ram pawl runven ding in ral lei zong in timhtuahnak an ngeih cuahmah. Russia nih a tukmi Ukraine ram belte hi NATO chungtel ram a si lo tik ah ral lei in bawmh awk a ttha lo.

Asinain, US, Germany, UK, Greece, French, Belgium, Canada, Czech Republic, Portugal, Romania, Spain, Sweden le Netherlands nih ralhraim le chawva lei in bawmhnak pehzul in an pek cuahmah ve. Credit: The Chin Journal