US ah Za Uk Lian nih Minung Pakhat Meithal in a Kah Hnu ah aa That Ve

US ah Za Uk Lian nih Minung Pakhat Meithal in a Kah Hnu ah aa That Ve
———–
US ram Pennsylvania State ah Laimi Za Uk Lian (kum 45) nih minung pahnih meithal in a kah hna i minung pakhat a nunnak a liam, tiah thawng kan theih. Lehigh County ah a ummi Store pakhat ah Za Uk Lian cu motor in a kal i, highway lamcung ah a kalmi motor pakhat cu voi tampi meithal in a kah. Motor a mongtu nu meithal kuan nih a khen lo caah nunhim in a um.

Cun, Jeep motor chung ah a ummi pa cu Za Uk Lian nih a kah ve i hliam a pu. Store ah rian a ttuanmi minung pakhat nih, “Meithal in kah a tongmi pa cu a motor chung in a chuak i bawmh hal in a au len,” tiah a chim.Cu dih cun datsi a rawngmi Truck motor mongtu pa cu Za Uk Lian nih a kah tthan i cu pa cu a nunnak a liam.

A nunnak a liammi pa hi Ramon Ramirez (kum 31) tiah theihmi a si. Za Uk Lian cu a kee in a zaam i amah tein meithal in aa kap ve. Za Uk Lian hi South Whitehall Township ah a ummi a si i, zei ruang ah dah atu bantuk in thahnawnnak a tuah, timi fiang in theih a si lo. Credit: The Chin Journal, April 22, Yangon.