Thantlang peng Congthia le Phaikhua pawng ah SAC ralhrang hriamngan a tlak nak kong!
=======================
Thantlang peng Congthia le Phaikhua pawng ah SAC ralhrang hriamngan voi 5 tluk a tla tiah tualchung mi hna nih an chim. June 12 zanlei suimilam 3 tluk ah a tlak hi a si. “Lungkhar lei in an kah mi a si men lai, Congthia khua pawng le Phaikhua khuapawng tiva kam lei ah a tla tiin kan theih, khua mi cheukhat zong tlungkhur ah kan i thup i lungre thei ngai in kan um” tiah tualchung mi pakhat siin kan theih.
Chin ramkulh chung ralram hmun pakhat ah Chin ralkap ṭangṭi phufonh le rallam a sialmi SAC ralhrang pawl kar ah kahdohnak a chuak. Cu kahdohnak ah Chin National Army (CNA) in pasalṭha 2 nih ram le miphun caah an nunnak an pek, tiah tualchungmi pakhat nih Lungmili Post ah a chim.
“June 12, zinglei suimilam 4:30 renglo hrawng ah SAC ralhrang nih rallam sial in mipi ralkap hna umnak cu an luhhnawh caah atu bantuk in kahdohnak a chuah hi a si. Hi kahdohnak ah SAC ralhrang thimi le hliam a pumi kong ah thawngfiang theih a si rih lo” tiah a chimchap.
Ram le miphun caah nunnak a petu pasalṭha hna. Upatnak sangbik kan in pek hna! Mipi hna nih thlacamnak le a lamkip in kan ralkap hna caah pehzulh in thazaang chuah cio hna usih.
Magway ramṭhen, Salin peng, Thayettaw palik sakhan pakhat cu a luancia May 10, zinglei suimilam 3:00 tluk ah PDF ṭangṭi phufonh nih luhhnawh in an kahdoh hna caah SAC ralhrang bawi pakhat telh in 12 an thi, tiah theih a si.
June 11, nizan zinglei suimilam 8:00 tluk ah palik sakhan ah ca an taarmi pawl cu ralhrang nih an laak dih hnu ah cuka hmun cu an chuahtak dih, tiah theih a si.
Hi kahdohnak ah PDF ṭangṭi phufonh nih ralhrang sakhan cu an la kho manh lo. PDF nih luhhnawh in kah an timhmi hna an theih manh caah hlankan in ralhrang pawl timhlamhnak an rak ngei manh cang caah atu bantuk in mipi ralkap lei hnu lei an tolhnak ruang a si, tiah Khit Thit nih a langhter.
Tualchungmi pakhat nihcun “Palik sakhan kahdoh lio ah hin SAC ralhrang bawi pakhat a thi pinah a thimi dang zong an tam ngaingai. Palik sakhan uktu (sakhan hmu) zong a phei ah kuan nih a khen i hliam a pu ve. Mipi hna nih ziah
sakhan nan chuah taak tiin an hal hna nain zeihmanh an chim duh lo” tiah a chim.