Upatmi CBCUSA Khrihfabu le Pastor Hna

Upatmi CBCUSA Khrihfabu le Pastor Hna
==========
CBCUSA Youth Department nih Bawi Khrih min in nan kut kan in tlaih hna. Pathian vel le daihnak cu nan dihlak cungah a thar in tlung ko seh, tiah thla za kan in campiak hna. Bawipa thawngin November 24-27, 2021 ah Worship Camp cu tlamtling tein Chin Evangelical Baptist Church, Indianapolis, IN ah kan tuah khawh, tiah thawng kan in thanh hna.

Tutan Worship Camp hi Avoi 3-nak kan tuah a si. CBCUSA Youth rian ttuannak ah biapi ngai in kan chiahmi a si. Mino 300 renglo CBCUSA khrihfabu bu 37 in an ra kho hna. Ni thum chung ringawn tum a phunphun an cawng. Cu hna cu, Acoustic guitar, electric guitar, bass, drum, keyboard, solfa, vocal, sound engineer, le video live stream thlahning ti bantuk hna an si.

Kan miphun chungin Pathian nih ringawn lei pahrang a pekmi le bochanmi kan unau kan sawm hna. Cu hna cu Esther Van Hnem Sung, Van Biak Tling, Sailo Thang, Philip Thang, David Hnanga, James Thang, Siang H. Thang, Morris Sang, Phun Peng, Pastor Hniar Hlun, Pastor Tha Bik Lian, le Sang Peng Ceu hna an si. CBCUSA Mino tthanchonak caah an caan, an thinlung le an ruahnak tampi an pekmi cungah kan i lawm tuk. Bawipa nih a sunparnak caah hmang chin ko hna seh.

Chun ah ringawn cawnnak an i lim hnu in, tlawmpal an i din. Cu hnu ah Worship Service kan ngei. Mino nih ringawn an tum dih. Praise and Worship an kan hruai. Thla kan cam. Thawngttha kan i hrawm. Kan pastors te nih thawngttha an kan chimh. Cu hna cu Pastor Van Tha Kam Thang (CEBC), Pastor Aaron Uk (CBMC), Pastor Moses Lian Peng (LCBC), Pastor David Lian (ZBC), Pastor Dawt Cung (LCC), Rev. Zathawngcin Siakhel (BBC), Saya Jay Cung (CCC), le Saya Barry Van (RCBC) hna an si.

Cun, 2021 Worship Camp a kan donpiaktu CEBC-INDY cungah kan i lawm tuk. An biakinn zong a ttha. Mino tampi luhchuahnak le cawlcanghnak ah a rem. A kan fimtawl ngaingai. Zalong tein chun he zan he mino 300 renglo kan i hawikom kho hna. An mino zong an fel. An i biatak.

Hawi he rian ttuan an thiam. Mileng komh/chawnh an thiam. Zingka ah breakfast thaw tein an kan pek. Thaithawh phunphun an kan pek. Zanriah thaw taktak in an kan pek hnu ah, zaan ah an rawlttam sual la, tiah hotel ah ei cawk lo in rawl an kan chiahpiak rih. CEBC-INDY cung ah kan i lawm tuk. Bawipa nih a min sunparnak ca’h le kan miphun/ram caah in hmang chin ko hna seh.

Worship Camp nih aa tinhmi cu (1) CBCUSA local khrihfabu in Pathian biaptu taktak (true worshipers) mino tampi ser hi a si; (2) ringawn lei pahrang ngeimi (talented youth) tampi in ser zong a si; (3) cun local khrihfabu ah Praise & Worship tthanchoter zong hi a si. Avoi 3-nak tiang kan tuahmi chungah theipar ttha tampi kan hmuh. Local khrihfabu ah hman awktlak mino tampi an chuak.

Worship Camp an rak kainak in Pathian dawtnak an thei. Bible sianginn kai i Pathian rian ttuan aa timmi mino zong an um. Cucaah Bawipa nih thlua a chuah ko ti kan hmuh i, hmailei zongah pehzulh kan i tim. Kum vui (November 2022) zong ah kan tuah rih lai. Don a duhmi khrihfabu kan um ahcun Youth OC upa sin ah thawngthanh khawh a si. Upatnak le lawmhnak tampi he, CBCUSA Youth Department.