Upadate; Hakha a hnu bik thawngpang fiang!!

Sikpar Ni 18 Hakha Thawngpang Update!!
=================
Hakha khua chungah CDF kan pasaltha hna le SAC ralhrang an i kap tiah theih a si. Cu kongah thawngpang a dang theih khawh mi a um rih lo ii Kaphnih in a thimi le hliamtuar mi theih khawh a si rih lo. Mipi kan ralkap hna caah thlacaam daithlang hna hlah usih.

Sikpar ni 18 ah Gangaw lei in ralhrang Helicopter a rak zuang ii Rungtlang ah a tum tiah theih a si ii a kir le kir lo cu theih khawh a si lo. Cu kong he pehtlai in SAC Ralhrang kuttang riantuan Tidim pa Pu Vung Suan Thang nih Falam Cherry Hall ah department kip in upa hna he ton biaruahnak an ngeih lio ah Chin ramkulh chung peng dihlak ah tlawn in thanchonak rian tuan ding mi kong biaruahnak ngeih dingah SAC sin ah helicopter pakhat damhpiak ding in a hal tiah theih a si.

Pu Vungsuan Thang nih Khualtlawnnak caah SAC ralhrang sinah a hal mi hna Helicopter cu Sikpar ni 18 ah Gangaw lei in a rak zuang ii Rungtlang ah a tum mi Helicopter cu a si lai, tiah zumh a si. Cun November 17 ah Matupi department kip in upa hna he tonnak a ngei kho i, a rauh hlan ah mah le peng cio caah phaisa a tlak cang lai caah,

A tlami phaisa a la lo mi le a hmang lo mi paoh cu midang nih an lak lai caah, kanmah lei sunghnak a um lonak ding ca ah phaisa tlami kan lak le kan hman a herh tiah lemsoinak bia a chim tiah theih a si. Pu Vung Suan Thang nih November 16 ni Falam khua a phanh lio ahcun Surbung vanlawng tual honnak kan tuah lai tiin a chim tiah theih a si.

SAC Ralhrang thongtla pawl luatnak nawl an peek mi hna kong he pehtlai in Chin ramkulh chung thonginn pawl in atu tiang ah thongtla thlahmi ahohmanh an um rih lo. SAC nih Nov. 17 ah Myanmar ramchung thongtla 5774 cu ngaihthiamnak in luatnak an peek hna ii an thlah hna. Thongtla thlah kong he pehtlai in Hakha palik sakhan le Rungtlang ah chiah mi kong he pehgtlai in SAC ralhrang cunglei nawlpeknak a phan rih lo, tiah tiah a si.

SAC Ralkap Nih Thongtla Luatnak A Pekmi Hna Chungah Ramkhel Lei Thongtla 53 Lawng An I Tel, SAC ralkap nih thongtla minung 6000 tluk hrawng luatnak a pekmi hna chung ah ramkhel lei thongtla minung 53 lawng nih luatnak an hmuh tiah ramkhel lei thongtla bawmtu phu AAPP nih cathanh an chuah.

Nizaan November 17, tiang cazin ning ah thongtla luatnak a hmutu hna chung in ramkhel lei thongtla minung 53 lawng cazin kan lak khawh tiah AAPP nih cun an langhter. SAC ralkap nih hramhram uknak a lak thawk in November 17 tiang thla 21 renglo chung ah SAC ralkap nih an tlaihmi hna hi minung 12976 an si tiah AAPP nih an langhter.

SAC ralkap nih luatnak a pekmi hna chung ah hin min langdeuh ramkhel lei thongtla cheukhat lawng luatnak a pek hna i, mah pumpak sualnak tuah ruang ah thong a tla mi hna tu kha tamdeuh luatnak an pek hna tiah theih a si.

Cycle Ai Phirhmi Nu 2 Nih Meithal In A Kah Caah Ralkap A Rak Tuan Balmi Pakhat A Thi, Magway ramṭhen, Pakokku No.11 sang ah ralkap a rak tuan balmi pa pakhat cu a umnak inn ah meithal kah in thah a tong tiah theih a si. Nihin, November 18, zinglei suimilam 8:00 luan hrawng ah ralkap a rak tuan balmi U Ye Tint (kum 55) cu a umnak inn pawng ah hriam ai tlaihmi nu pahnih nih cycle he an rak fuh i meithal in an kah caah a thih hi a si.

“Kan theihning ah cun a umnak inn pawng a umlio ah cycle ai citmi mino nu 2 nih na kah tiah kan theih, kah a tongmi pa hi ralkap a rak tuan balmi a si i a kee pakhat a bul mi caah kelem he a ummi a si, SAC ralkap he naihniam ngai in a ummi a si, a mah tu hi cu dai tein a ummi a si ko na in, a thli in zei thil a tuah ti belte kan theilo” tiah tiah tualchung mi pakhat nih a chim.

U Yee Tint cu meithal in voi 3 leng an kah hnu ah a thi, a ruak cu mi bawmchantu phu hna nih Pakokku sizung ah an kalpi. Chunhnu ah a ruak cu sizung in inn lei an tlunpi than i ruak humhnak an tuah tiah theih a si. A hlan ah ralkap a rak tuan balmi U Yee Tint cu mi zei phu nih an kah le zeiruang ah dah an thah timi tucu theih fian a si rihlo, a kaptu phu lei zong nih cathanh chuahmi a um rih lo tiah theih a si.

Falam Surbung Vanlawng Tual Honnak Kan Tuah Lai – Chief Minister U Vung Suan Thang, SAC ralkap rianpek cohlangtu ramkulh Chief Minister U Vung Suan Thang nih November 16 ni Falam khua a phanh lio ah Surbung vanlawng tual honnak kan tuah lai tiin a chim tiah theih a si.
SAC kuttang um Chin ramkulh, Chief Minister cu Falam Cherry Hall ah department kip in upa hna he ton biaruahnak an ngeih lio ah Surbung vanlawng tual honnak kan tuah lai, cun vanlawng khualtlawnnak a tlamtlin khawhnak ding kong kan tuaktaan lai tiah a chim.

Cu hnu ah Department kip in upa hna nih Falam general hospital ah sibawi nih an herhmi thilri a chambaunak kongkau chimnak zong an ngeih tiah theih a si. SAC ralkap rianpek cohlangtu Chin ramkulh Chief Minister nih Chin ramkulh chung peng dihlak ah tlawn in thanchonak rian tuan ding mi kong biaruahnak ngeih dingah SAC sin ah helicopter pakhat damhpiak ding in a hal tiah theih a si.

November 17 ah Matupi department kip in upa hna he tonnak a ngei kho i, a rauh hlan ah mah le peng cio caah phaisa a tlak cang lai caah, a tlami phaisa a la lo mi le a hmang lo mi paoh cu midang nih an lak lai caah, kanmah lei sunghnak a um lonak ding ca ah phaisa tlami kan lak le kan hman a herh tiah lemsoinak bia a chim tiah theih a si.

Baa Ann Peng Ah BGF Nih Ngakchia Pakhat Telh In Minung Pali An Kah Hna I An Nunnak A Liam, Karen ramkulh, Baa Ann peng Mihkaren(မိကရင်) khua ah SAC kuttang BGF nih nizan November 17 zaanlei sml 5:00 hrawngah meithal in inn pakhat an kah caah kum 7 ngakchia pakhat telh in minung pali an nunnak a liam, tiah khuami pakhat nih a chim tiah theih a si.

“BGF 20 hrawng cu motor pahnih in an ra i, khua chak ah a ummi inn pakhat cu meithal in an kah caah an chungkhar ning in meithal kuan nih a khen hna. Thawng dik lo an theih caah minung i palhin meithal in an kah mi a si men lai,” tiah a chim chap. BGF nih kahnak in Mihkaren khua ngakchia pakhat, kum 24 tluk pa pakhat, kum 50 tluk nu pakhat le khua chak ah rian a ṭuanmi Kawhpyian(ကော့ဖျံ) khuami kum 30 tluk pa pakhat an nunnak a liam. A nunnak a liammi chungah kum 7 ngakchia le kum 24 tluk pa pakhat hi unau an si i kum 50 tluk nu hi unau hna an pi a si, tiah theih a si.

SAC Ralkap Sii-ai Pechantu Bomb Puahhnawh An Ton Caah Ralkap 20 Hrawng An Thi, Magway ramṭhen, Pakkoku khua in nichuahlei Chaukkan(အရှေ့ချောက်ကန်) khua lei ah sii-ai pek ding in a kalmi SAC ralkap pawl cu, nihin November 18 zinglei sml 3:00 hrawng ah bomb puahhnawh an ton caah SAC ralkap 20 hrawng an thi, tiah theih a si.

SAC ralkap 60 hrawng a phurtu le sii-ai phurtu motor pathum cu Pakkoku khua chuahnak ah bomb in kan puahhnawh hna, tiah Dragon Brothers Guerrilla in bawino Paing Kyi nih a chim. “Nichuahlei Chaukkan khua ah hliamhma pumi SAC ralkap le pyusawhti hna bawmhchanh dingah Pakokku in sii-ai a chantu SAC ralkap motor cu, bomb lung 8 in nihin zinglei sml 3:00 hrawngah kan puahhnawh hna caah SAC ralkap 20 hrawng an thi i 7 hliamhma an pu, an motor lila zong pahnih lawng an lan kho” tiah a chim chap.

Nizaan November 17 zong ah Pakkoku in nichuahlei Chaukkan khua lei ah riahcaw chan dingin a kal mi SAC ralkap motor pahnih zong lam hlat hmehmi bomb in Dragon Brothers Guerrilla phu nih an rak puahhnawh hna caah SAC ralkap 4 an rak thi tiah theih a si.

KNU Hpapon Pengkomh Zarhhnih Chung Kahdohnak Ah SAC Ralkap 30 Leng An Thi, KNU Hpapon pengkomh ah SAC ralkap, BGF le KNLA kar ah zarhhnih chungah voi 60 tluk kahdohnak a chuak i, SAC ralkap 30 leng an thi, tiah theih a si. November 1 in 15 tiang ah SAC ralkap, BGF le KNLA karah kahdohnak voi 58 a chuak i SAC ralkap 35 an thi, 23 hliamhma an pu.

KNLA Brigade 5 in ralkap 3 nih ram le miphun ca ah an nunnak an pek i 3 hliamhma an pu, tiah KNU/ KNLA nih cathanh an chuah tiah theih a si. Cun SAC ralkap le BGF nih tualchung mi an lo hmun le mizapi nih zulhmi lam hna cu, hriamngan in voi 29 tiang timh ciammam te in an kah pinah Hpapon pengkomh chungah a ummi hmun 3 zong ah Jet Fighter in bomb lung 12 hrawng an thlak caah tualchung mi inn le biaknak he aa pehtlaimi inn an rawk.

Tualchung mi a thimi le ai hliammi an um le um lo tu cu fiang in kan thei kho rih lo, tiah cathanh chungah an langhter. Karen zatlang bu hna nih, KNU Hpapon pengkomh Brigade 5 hmunram chungah kahdohnak a zual i, SAC ralkap nih nuhrin covo buar in an cawlcangh caah tualchung mi 130,000 leng a himnak hmun ah an zam i bawmhchanhtu tampi an herh, tiah an langhter.

Gaza Ralhrial Camp Pakhat Mei Nih A Kangh Caah Minung 20 Leng An Nunnak A Liam, Gaza ralhrial camp pakhat mei nih a kangh caah ngakchia telhin minung 20 leng an nunnak a liam tiah theih a si. Gaza ram milu tam ngai an umnak ralhrial camp pakhat ah November 17 ni ah mei kanghnak a chuak i minung 21 nak tlawm lo an nunnak a liam. Cu chungah ngakchia 10 an i tel, tiah sii-inn ṭuanvo ngeitu Dr. Salah Abu Laila nih a chim.

Jabar Laila ralhrial camp a kangmi mei cu caan sau nawn a rauh hnu lawngah ṭuanvo ngeitu hna nih an phalh khawh. Jabar Laila cu Gaza ah a ummi ralhrial camp 8 chungah ai telmi camp pakhat a si, tiah theih a si. Ralhrial camp a kanghnak a ruang hi fiang in hngalh a si lo nain datsi an chiahnak hmun in kangh hram ai thawkmi sidawh a si, tiah tualchung mi hna nih an chim.

Mei kanghnak camp chungah a um mi ngakchia le nu hna cu zeitin hmanh in khamh khawh an si lo, tiah mi bawmchantu pakhat nih a chim. Gaza cu milu nuai 2.3 leng an umnak hmunram a si i, vawleicung huap in milu an tlawm biknak ram a si. UN cazin ning in Gaza milu sing 6 hrawng hi ralhrial camp 8 ah an um, tiah theih a si.

SAC Ralkap Nih Sattwa(ဆပ်သွား) Khua An Khangh Caah Khuami Inn 7 Le Sii-inn 1 A Ciam, Magway ramṭhen, Yesagyo peng Sattwa khua cu SAC ralkap nih an khangh caah khuami inn 7 le sii-inn 1 a ciam, tiah Yesagyo Township Info Committee nih an langhter tiah theih a si.
A luancia November 16 ah SAC ralkap nih Sattwa khua an khangh caah khuami inn 6, zung rianṭuantu an umnak inn 1 le sii-inn 1 a ciamh hi a si.

“Uico ralkap nih Sattwa khua an khangh caah khuami inn 7 le sii-inn 1 a ciam. Khuami a thimi le ai hliammi tucu an um hraw lo, cun sii-ai a kaangmi zong a tam lo. Uico ralkap pawl cu PDF nih an kah hna caah Zitaw khua tiang uico ralkap pawl cu an zam,” tiah Yesagyo Township Info Committee in ṭuanvo ngeitu pakhat nih a chim.

Maungtaw Ah SAC Ralkap Kut In A Nunnak A Liammi Minung 11 Sinah Kyats Sing 5 Cio Pek In SAC Ralkap Nih Ngaihthiam Halnak An Tuah, Rakhine ramkulh, Maungtaw peng, Kyeikchaung(ဂြိတ်ချောင်း) khua ah SAC ralkap hriamngan kuan in a nunnak a liammi minung 11 cu, SAC ralkap nih kyats sing 5 cio le facang he ngaihthiam halnak an tuah hna. Media nih an in hal hna ahcun SAC ralkap nih an kahmi a si lo tiin nan leh hna lai tiah bia an riah ta hna, tiah theih a si.

November 16 ah SAC ralkap kuttang Nah Khah Khah 7 le Maungtaw Kyingchaung(ကြိမ်ချောင်း) 24 Beohar um SAC ralkap nih, hriamngan an kah caah Kyeikchaung khuami 11 an nunnak a liam i, minung 27 hliamhma an pu. A nunnak a liammi hna chungah kum hra tang ngakchia minung pathum an i tel i, kum hra cung minung pakhat ai tel ve, tiah theih a si.

Nizan November 17 zinglei ah Kyingchaung 24 Beohar in Brigadier Pyi Sone Aung le Nah Khah Khah 7 in palik bawi Win Myint Aung telh in SAC ralkap 40 hrawng nih khuami hna cu hi kahdohnak hna hi kanmah kut a si lo, tiah an va chimh hna, tiah theih a si. “Hriamngan a kaptu hi No. 24 Kyingchaung check gate in SAC kuttang ramri hngaktu palik phu Nah Khah Khah 7 an si. Hi kan kahmi hi khoika hmanh ah nan chim lai lo, tiah khuami sinah bia an riah ta hna.

A nunnak a liammi hna cu November 16 zan ah an ruak an vui hna i, hliamhma fak a pumi Min Yet cu Maungtaw sii-inn ah an thlopbul. Midang tu cu an nunnak ca ah thinphang a si lo, tiah theih a si. Kyingchaung khua cu Myo miphun an umnak hmun a si i inn 55 le milu 470 leng an umnak le lo rianṭuan in pawcawmnak a tuah mi an si, tiah theih a si. Crd-The Chin Post