UNGA Biakhiahnak cungah Malaysia A Lawm, SAC nih A Pawm Lo

UNGA Biakhiahnak cungah Malaysia A Lawm, SAC nih A Pawm Lo
=============
June 18 ah tuah mi UN General Assembly nih Ralhrangbu cu zei ram hmanh nih hriamnam zuar lo dingin a phih hlei ah 2020 rampi thimnak upat ding le Daw Aung San Suu Kyi tel in an tlaihmi vialte chuah dingin biachahnak an tuah.
UN Assembly biachahnak he pehtlaihin ASEAN chungtel Malaysia nih kawlram buainak thatnak lei a panh khawhnak dingah kan duhning zong kan langhter cang bantukin UNGA biachahnak cungah kan lung a lawm tiin June 18 ah cathanh a chuah.

Ralhrangbu nihcun mah biachahnak hi kap khat lei lawng ruah in tuah mi a si. Kan ram thithruainak ah hnahnawhnak a kan pe mi zei thil poh kan pawm lailo tiin June 19 ah cathanh a chuah ve.Ralhrangbu sin ah hriamnam zuar phihpiak ding agenda hi May thla UN tonpumhnak ah Liechtenstein nih draft a chuah pi mi a si.

Mah biachahnak hi kutthlernak in tuah mi a si i, UNGA a kai khawh mi ram 159 lakah ram 119 nih an pawm, ram 36 cu karlak ah an um. ASEAN chungtel ram 10 ah Indonesia, Vietnam, Malaysia, Singapore, Philipine ram hna cu biachahnak a pawm mi an si. Thailand, Lao, Brunai, Combodia hna cu a karlak a um mi an si.

Canada ram nih Tu Kum chungah Ralzam 45,000 a Lak Lai. Canada nih a hlan an lak tawn nak a lethnih tam in tukum 2021 ah ralzam kan lak lai tiah Canadian Immigration Minister Marco Mendicino nih June 18 ah a chim. Marco Mendicino nih June 20 Refugee Day hlan cacawn ninga ni ah “Vulei cung ralzam an tam tuk cang, Canada cozah nih ralzam hna zawnruahnak he 2021 ah a lethnih nak tam kan lak lai. Canada ramchungah a um cang mi dornak a halmi si hna seh, ramdang ah a um mi ralzam chungkhar si hna seh kan lak hna lai” a ti.

Canada nih tuan deuh ah ralzam 23,500 ka lak lai a rak ti cang hnuah a tu cu ralzam 45,000 ka la lai a ti cang. Canada cozah nih ralzam hna laknak le ralzam hna hmunhma thialnak caah budget C$ 3 million ($2.4 million) kan hman lai tiah Mendicino nih a chim. 2020 kum chung ah Canada nih ralzam a lak mi hi vulei cung ah a um mi ralzam cheu hnih ah cheukhat deng a si caah UNHCR nih Canada cozah cu “muinak hmunah a ceu mi meifang a si” tiin a fak. Credit: The Chin Post