UN pi zong nih atu lio kan si ning an kan cuanh ko!

UNGA le CHIN mi kong
=========
Kan ram ralhang nih an kan nam cuahmah. Vawlei pi nih an kan cuanh. Ram pumpi in an kan cuanh. CNA le CDF, CNDF, PDF ti in kan pasal nusal ttha hna nih kham an izuam. Hmun kip in kan si khawh tawk cio in thazaang rak chuah cio asi. Ruahnak le thazaang mah le phak khawh tawk in rak chuah cio asi.

UN pi zong nih atu lio kan si ning an kan cuanh ko. Kan si ning hi UN General Assembly ah chim le ruah tlak ah an ruah caah UN Secretary General Special Envoy on Burma Office nih an rak kan chonh I biaruah nak kan nei. An mah lei in Political lei expert hna le ralkap lei expert hna an I tel.

An mah an auh ning in UN Conflict Prevention and Stabilization Expert timi zong ai tel. Suimilam 2 chung Chin ram le a pawngkam Sagaing le Magwe ramthen I thil a cang mi kong kan I ruah lai an ti. E tiah Salai Za Uk Ling he meeting ah cun kan tthut pi hna.

Meeting I bia kan iruah tik le kan si ning thil um tuning pawl kan chim tik ah kan bia a dong kho lo I Suimilam 5 dengmang kan tthu tti hna. An mah UN lei in Conflict Prevention and Stabilization Expert pa nih ram kip I a rak hmuh ton mi thil si ning le Burma ram thil sining kong pawl zohchih in bia hal nak le a hmuh ning pawl tampi achim.
Ral kong, politics kong, Political party pawl kong, MP pawl kong, SAC ralhrang MAH le a hawi le pawl kong IDP kong, Refugee kong in Covid 19 kong tiang chim le rel asi. An mah hi UN aiawh in SAC lutlai pawl a va tong tawn mi an si caah thil sining an kan chimh mi tete zong a um len.

UN General Assembly cu UN biaceih nak ah a sangbik asi. Committee phunphun an um. Burma ram kong ah UN General Secretary nih lam kaltu Special Envoy athlah. Cu General Secretary Special Envoy nih Burma ram kong ah Secretary General sin le UN body dangdang ah report le recommendation a pek mi cu Burma ram kong he pehtlai cun a sangbik bia phurtu le rorel tu asi.

Secretary General Special Envoy nih UN General Assembly ah Chinmi hna kan sining le UN le vawlei pi nih rak kan theihpi hna she law, siaherh in ruat hna she ti nan duh mi zong bia kan chuah pi lai an ti caah ca tlap khat in kan ttial I recommendation cu kan hei pek hna.

Friday ah UN General Assembly the Third Committee ah kan chuah pi lai. Cun UN body dangdang zong ah kan chimrel kan chuah pi lai an ti caah kan ilawm. An chimrel mi hi kan miphun himnak ah bawmchan tu sihram ko seh.

Lungdong lo le Ralttha te in kan ttantti ttualmal hna ah cun Pathian nih teinak a kan pek hrimhrim lai. Kan meeting lio hmanthlak a um ko na in vun tar awk a rem deuh rihlo caah UN HQ le a hmai hmanthlak tu kan vun tar, mit tha dam ah.