UN nih Min Aung Hlaing Sual buarnak tam tuk an tua cang!
SAC ralkap hi raltuknak lei sualnak tamtuk a buar tiah UN nih a chim
==========
SAC kuttang ah a ummi ralkap pawl nih nuhrin covo buarnak ah ṭha tein an i tel i raltuknak lei sualnak le mipi cungah a buarmi sualnak tamtuk a um tiah Office of the United Nations High Commissioner for Human Rights nih March 15 ah a chim i Myanmar ram ah mipi a bubu in thah mi zong ka tangthlak (condemn) tiah a ti.
Vawlei ram vialte nih Myanmar ram ah a cangmi hramhram thiltuahnak pawl dihter colh dingin UN Human Rights Office nih a forhfial tiah hramhram in uknak lak a si hnu ah a voikhatnak bik rak chuahmi report ah langhter a si.
UN reports pawl hi tlaihkhih , hremnak a tongmi le mit in a hmutu pawl tonbiahalnak cungah i hngat in fehtermi a si i Satellite in thlakmi hmanthlak pawl le ṭha tein zohfel cangmi Multimedia files pawl, mipi tampi nih theihmi facts in fehtermi a si.
Palaw kahdohnak ah SAC ralkap 20 nak tlawmlo an thi. Tanintharyi ramṭhen, Palaw peng ah pyusawhtee pawl hmunhma an khuarnak cu PDF phufonh hna nih an kah hna caah SAC ralkap nih an rak bawmh hna i kahdohnak a fak chin tiah Palaw PDF nih a thanh.
March 16 zinglei sml 6 hrawng thok in pyusawhtee pawl hmunhma an khuarnak Palaw khua ah Palaw PDF, KNU le KPDF phufonh hna nih an kah hna i sml 3 chung kahdohnak a chuak tiah theih a si. Kaphnih karlak kahdohnak ah hriamngan hna an hman, bawmh dingah a raami SAC ralkap pawl cu Palaw PDF nih bom an puah hnawh hna tiah a langhter.
Kahdohnak lioah Palauk khua lei in bawmh ding ah a raami pawl cu Htaminmasar khua an phan, Nanpayaut khua ah a phanmi bawmtu pawl cu bom in kan puah hnawh hna tiah Palaw PDF nih a thanh. Cun, SAC kekal (285) battalion in ralkap mawṭaw pawl cu Palaw lei ah lut colh loin hriamgan in kah an bawmh hna i Magyikone le Nantaung khua ah a ummi SAC ralkap pawl zong nih hriamngan in kahthlorh an kah tiah a ṭial.
Kahdohnak chungah pyusawhtee 20 nak tlawmlo an thi i Palaw PDF in mipi hriamtlai pakhat a ban ah kuan nih a khen tiah aa tel. Tu kahdohnak hi Palaw PDF, KNU le KPDF hna fonh in an kahmi hna a si tiah theih a si.
Mawṭaw chungah aa thupmi Myanmar rianṭuantu 53 cu Tak province, Bangkok kainak ah tlaih an tong. Karen ram, Myawaddy ramri lam in Thailand ram chungah phungning loin ramri a lonh i mawṭaw chungah aa thupmi Myanmar rianṭuantu 53 cu Maesot khua chuah hnu Tak province, Bangkok a kainak lam ah March 14 zinglei ah tlaih an tong tiah theih a si.
Maesot khua chuah hnu Tak province chung Bangkok kainak lam cungah a ummi zohfelnak gate ah kawpi tom telh in thil hringno pawl an phorhnak mawṭaw pakhat cu Thai Social Supervision Board le palik pawl nih an check hna. Thil hringno pawl karlak ah aa thupmi Myanmar rianṭuantu pa (31) le nu (22) cu kan tlaih hna tiah Thai uknak nawl ngeitu pawl nih an thanh.
A tu bantuk khuacaan a linh tuk lioah thil hringno pawl phorhnak mawṭaw cungah aa thupmi Myanmar rianṭuantu pawl cu an thaw iap lakin harnak an tuar kha hmuh khawh a si tiah tlaih lioah aa telmi Thai rian ngeitu pakhat nih a chim.
Maesot chuah hnu Tak province chungah a ummi Bangkok kainak lam zohfelnak gate ah a luancia zarhhnih lioah thil hringno phorhnak mawṭaw chungah aa thupmi Myanmar rianṭuantu 15 rak tlaih a si i zarhhnih chungah a voihnihnak 53 tlaih chap an si hi a si.
Tlaih a tongmi Myanmar rianṭuantu hna nih an puai-sa hna cu phorhnak man ah Thai baht 25,000 in 30,000 tiang an pek hna i an rat hi a si. Thailand ram chungah phungning MoU in rat khawh a ngah hlan ah a tu bantuk phungning loin ramri lonh in luh a si ruangah nikhat ah minung 100 leng tlaih an tong i a tu March thla chungah Thai-Myanmar ramri gate 6 hrawng in a rak lutmi Myanmar rianṭuantu 1,000 leng tlaih an si tiah theih a si. Credit: The Chinland Post