A theihngalmi sinah ruahnak hal:
Kan hnu March ah khan UN Security Council member pawl sin ah closed door biaruah nak nei ding in an ka sawm caah can ttha asi tiah ka vai ithawh. Zankhuadei meeting tenh ruahah New York phak dingin vanlawng cung ah ka tthut caah ka ba ngai. Mitkuh cimlo in New York khuapi cu ka phan.
UN Security Council rilmal cu an kong lawng kan rel tawnmi asi I voikhat zong ka rak tong bal hna lo. Burma ram kong ah resolution an thlak ka asi caah thil biapi ah ka ruah. Zeitindah bia ka chim ah athat lai tikha aphunphun in ka ruat. Special Envoy nu he kan iton lio ah aka timi cu closed door asi lai caah nasiaherh mi kha isumlo te in chim ko tiah ruahnak arak ka pek.
New York UNSC he tonding kha chunhnu ah asi. Zingah Burma aiawh in UN palai an chiahmi U Kyaw Moe Tun kha ruahnak hal ta ah cun attha lai tiah kan ruah caah ka umkalnak logistics aka tawlrel piaktu nu nih U Kyaw Moe Tun cu appointment ahei lak I vantthat ah rak ra ko uh itong ta ko hna usi tiah ati. Burma UN office ah cun kan va kal.
U Kyaw Moe Tun cu roling in UN GA ah mipi lei ah ka ttang ko lai tiah bia arak chim lio kha online in ka rak zoh (Mah kong zong cu ka rak ttial bal cang). UN I Burma palai zung cu kan vaphan I inka hram in arak kan don.
UN SC nih Burma kong ah an caihmai mi pawl le zapi nih kan theih khawhlo mi puanzar phen ah zeibantuk lente celh nak dah aum. Zeidah ralring ding zeidah chim ding tipawl kan ihal kan ichim. Tluangtlam ngai le toidor ngai in bia achim. Biaruah anuam. Ahlan UN Geneva Human Rights Council I kawl cozah nuhrin covo buarnak pawl arak runven hna bantuk kha cu asi tilo. Atu cu ralhrang le cozah vengtu sinak in mipi lei attangmi mipi ca ah UN ah fekte in le limhang nei tein a dir mi asi tik ah upak nak asang chinchin.
New York le Geneva UN meeting ah ka rak kal pahtawn. Ahlan ah cun Burma Ambassador to UN cu ui le me bantuk in arak izoh tawnmi kan rak si hna. Asinain atu cu Ambassador Kyaw Moe Tun cu vawlei cung diplomacy buantual I abiapit biknak hmun in mipi lei attang in adirmi asi tik ah ka upat ngaingai.
Mipi lei attan ruang ah ka upat nak le ka lawmh nak zong cu pumpak in chimhruah nak can ka nei I ka lawm. Ahlei in UN SC ah zapi hmuhlo ah zeibantuk lentecelh nak tete dah aum timi pawl kha hawikawm ttangti bantuk tein ruahnak tthattha aka cheuh caah ka lawm ngaingai. Zeibantuk thil poh hi amah le aka le azawn ah athei hngalmi sin ruahnak hal hi ahlawk zungzal.
Nai Cyclone Mocha thlichia le ttotho ruangah Chinram chung ah in le lo tampi ahrawh. Pathian zaangfahnak thawng in minung thih le loh thawng cu kan thei hraw rih lo.
minung umnak In 1774
Biakin le Biaknak he ai pehtlai mi in 29
Sizung le Siin he aipehtlai mi in 5
Siangin 30
Rawlruuk 19
Hivialte hi ahrawh tiah field lei riantuan tu hna nih Maythla 17 tiang ah thawngpang an lak khawh tawk asi.
Internet le Phone line a tthat lo ruang le pehtlaihnak ahar ruang ah thawng pang duhning in rianrang in lak khawh asi lo. CHRO pawl nih detail in arauh hlan ah thawngpang tlamtling deuh in an kan thanh khawh Lai tiah ka zumh.
Har le fe in thawngpang ala tu le rian attuan tuhna cung ah kan ilawm i upatnak kan pek hna.
Rai le Ral lak ah Tthotho le thlichia nih a den mi kan miphun hawi hna caah thlacam nak in rak thei cio hna usih. By Salai Bawi Lian Mang