Ukraine pawl cu Europe pumpi in an dirkamh hna!
Ukraine pawl cu Europe pumpi in an dirkamh hna!
========
Asia minung le Europe minung hi kan lungput le kan khuaruah ning hi maw ai dang hrim2 hnga? Asiloah Asian ram pawl khi biaknak le nunphung ai dang lengluang mi nih khin lai a rel pah rua hlah maw ti awk in?
Ukraine pawl cu Europe pumpi in an dirkamh hna. A ram kip in an mah le an ti khawh ning cio in an cawl hnawh hna. Cozah in an cawl, civil society organizations in an cawl. Rianttuannak sector cio tiang in Ukraine bomhnak payment system an tuah hna i duh tik poah ah ti khawh zat in pek khawh peng ding in an tuah. Ralzaam pawl tiah le EU nih a herh ning in an tawlrel thluahmah ko hna.
Cu lio ah kannih Kawlram vial cu mah cawl tein kan cawl peng. A zei ram innpa le Asian ram pawl nih humanitarian aid le aid lo um hlah, refugee caah tiah khuakhan piak le lairel piak zong um hlah. China, India, Thailand pawl nih mah miaknak le hlawknak mit lawng a au mi, ASEAN ramdang pawl ti ah le mah nih tuar ve lo mi cu zei poi lo bantuk in an um viar. Ruah ahhin thinhan le ngaihchiat ai cawh.
Europe Eagle (mupi) ai hlau! Europe ram pumpi thinphang in um lio asi caah Europe kong ka van ttial ta rih la.
Europe Eagle ka ti mi cu Germany asi. EU ram chung ah a tthawng bik cu Britain, Germany le France an si i anmah pathum hi EU a hiptu le a hruaitu an si zungzal ko. UK cu EU in a chuah cang caah EU members ahcun Germany hi a tthawng bik a si ko cang.
Germany hi Hitler ral ruang ah sungh zatlaknak faktuk an rak ton caah ralkap le hriamnam thazaang tthawn ter kha an lung ah a um ti lo. Zeidang technology le fimthiamnak ahcun hmaisuang an si zungzal. Ralthawhnak ramdang ah hriamnam kuat le bomh zong a duh lo ngai mi an si. France nih EU ramchung security tthawnter ding in hma kan lak deuh awk asi e a ti lengmang nain biapi ah a rak chia duh bal lo.
Nain Russian nih Ukraine a van nam hnu in German mipi le hruaitu hna an i hlau i cu hlan an ruahning le dirhmun an thlen thluahmah. Angela Merkel nih Germany le EU a hruai lio (2005 – 2021) ahcun ralkap thazaang in political problem phisin ding khi hrial an i zuam, biaruahnak (dialog) deuh in thil kal pi an i zuam.
Russia kong zong ah dialog deuh in an kal pi peng. Biaruahnak (dialog) lawng in asi kho ti lo (a work taktak lo) tiin an lung an i thleng i ralkap le hriamnam thazaang biatak tein tthawn ter an i tim cang. An defense budget dihlak ah 47 billion euro asi mi kha a let renglo 100 billion euro ah an kai ter colh (Reuters, NRK). Tubantuk timhlamhnak an ngeih mi kong ah Germany Prime Minister Olaf Scholz nih, “atu hi caan thar chung ah kan lut” ati.
A tu an i timh ning in ralkap le hriamnam thazaang an tthawn ter ahcun ralkap thazaang in France le Britain a lonh hna lai i Europe ah military power a tthawng bik pahnih nak an si lai ti asi (Håkon Lunde Saxi, associate professor at Section for Military Strategy). Russia-Ukraine War nih Europe ram umtuning, nitlak lei ram vialte, nichuah lei ram tiang in a muisam tampi thlen dawh in a um. Credit: Sangukceu Zinhlawng