UK Cozah nih U Kyaw Swa Min cu a inn cu chuak dingin a fial Cang!

Myanmar Ambassador cu a inn in chuak dingin Britain cozah nih a forhfial
==========
Myanmar ah Kawl ralkap nih hramhram in uknak lak a sinak a soitu Myanmar Ambassador U Kyaw Swa Min cu a tu a umnak Ambassador inn in chuak dingin Britain cozah nih a forhfial tiah Reuters nih a langhter.

An tlaihmi hna President U Win Myint le Daw Aung San Suu Kyi cu thlahpiak dingin Ambassador U Kyaw Swa Min nih a luancia kum March thla ah khan cathanh a rak chuak. Ambassador hmunhma hi Daw Aung San Suu Gyi nih a ka khinhmi a si caah Daw Aung San Suu Gyi tangah rian ka ṭuan rih ko lai tiah cathanh chungah a rak telh.

Cu hnu ah, London khua i Myanmar Embassy cu SAC minung pawl nih an tlaih caah Ambassador U Kyaw Swa Min cu Embassy chungah an luter lo bantuk in SAC zong nih Ambassador dirhmun in an hnawh. Asinain, Ambassador inn ah U Kyaw Swa Min cu a um rih ko.

Ambassador inn hi chaklei London ah a um. Thirhriling, security camera pawl an bunhnak Ambassador inn cu a tu ahcun phunglut lo cozah asi caah, Embassy ah i ap ṭhan ding cu U Kyaw Swa Min nih a al hna. Ambassador inn ah U Kyaw Swa Min a um peng rihmi tawlrelpiak dingin SAC nih hneknak a um caah Britain Ministry of Foreign Affairs i rian tlaitu pakhat nih March 4 ah U Kyaw Swa Min cu email a kuat.

U Kyaw Swa Min Ambassador inn in a chuah lomi hi Kawlram ah a ummi Britain Embassy rianṭuantu pawl caah phunglam he pehtlai in buainak a um tiah an chim. Mah kong he pehtlai in Britain Ministry of Foreign Affairs nih cun zeihmanh a chim lo nain Ministry chungin chimnak nawl a ngeitu nih cun U Kyaw Swa Min cu democracy faak piin a dirpi tiah Reuters ah a chim.

Cu lawng si loin, U Kyaw Swa Min le a chungkhar pawl Britain ah an um khawhnak hnga kan bawmh hna lai tiah a chim.
U Kyaw Swa Min nih cun Britain Ministry of Foreign Affairs nih an kuatmi email kong he pehtlai in zeihmanh a chim lo nain Daw Aung San Suu Kyi an thlah a silole Britain nih hnatlakpinak a ngeihmi Myanmar cozah a kai lo ahcun Ambassador inn in ka chuak lai lo tiah a dirhmun a chim.

South Korea ah a dotu party hruaitu President ah thim a si. Thlanglei Korea thimnak ah a dohtu party candidate Yoon Suk-yeol cu March 9 thimnak ah President ah thim a si i a tulio uknak nawl a ngeitu candidate Lee Jae-myung zong nih ka sung ko tiah a lungtling i a zuamcawhtu Yoon Suk-yeol cu a thangṭhat tiah Reuters nih an langhter.

Me 95% leng an rel dih hnu ah Lee Jae-myung nih March 10 ah democratic party headquarter ah Yoon Suk-yeol nih a ka tei ko tiah reporters pawl sin ah a chim. Thlanglei Korea thimnak ah Presidential candidates nih an ngahmi me hna hi i thlau tuk loin Conservative Party hruaitu Yoon Suk-yeol nih 1% tein thimnak ah a tei tiah theih a si.

Me a thlatu mipi pawl nih President thar cu eihmuarnak hrawkmh cikcek dingin le Chaklei Korea nih aa tinhmi Nuclear kong he pehtlai in a fiangmi biaruahnak ngeih rih dingin kan duh tiah Reuters nih a langhter. Thlanglei Korea ahcun, President kum 5 ah voikhat ṭuan a si i a raa laimi May thla ah President sinak cu a tulio President Moon Jae-in sin in laak a si lai.

Kawlram Tanghra a phi dingmi 312,299 ah, Chin Ramkulh in 2,958 lawng an si. Ramkomh Kawlram pumpi in ramṭhen le ramkulh kip in siseh, ramdang in tanghra a phi (exam) dingmi 312,299 an um tiah Ralkap uknak tlaitu (SAC) nih March 9 ah a thanh. Cuchung ah, Chin ramkulh in Tanghra camipuai a phi dingmi hi 2,958 lawng an tiah theih a si.

Tanghra cammipuai kong he pehtlai in, kum dang ahcun, Chin ramkulh huap in a phi (exam) mi hi 10,000-15,000 kar an si tawn. Atu kum a phi dingmi hi cu kum dang i camipuai phit ding ah a min cazin a pemi chung in a bau than tawn mi zat hmanh an si lo tiah thil theimi pakhat nih a chim.

Ramkomh Kawlram huappi in 2019-2020 cacawn kum ah tanghra camipuai (exam) caah cazin a pemi le a phi mi hi 900,000 fai an si tawn tiah theih a si. Tanghra a phi dingmi chung in, Rakhine ram chungah ca check nak hmunhma 128 a um lai i siahngakchia 45,592 nih an phit ding an caah Kawlram chungah tanghra a phi ding mi an tam biknak a si.

Cun, Yangon ramṭhen ah ca check nak hmunhma 105 a um i siangngakchia 37,560 nih tanghra camipuai an phit lai caah pahnihnak a tam bik a phimi an si. Cun, Mandalay ramṭhen ah siangngakchia 37,202 nih tanghra camipuai (exam) an phit lai caah a pathumnak tambik ah an dir tiah Ralkap lei thanhnak ning in theih a si.

Sagaing ramṭhen ah siangngakakchia 16,820 nih an phit i ca check nak 72 a um lai. Atulio Ramkomh Kawlram chungah, kahdohnak a faknak bik le a buaibiknak hmun pakhat a si mi, Kayah ramkulh in siangngakchia 780 lawng nih tanghra caminpuai an phit (exam) lai caah a tlawm bik phi dingmi an si tiah theih a si. hi a cunglei cazin le nambar vialte hi Ralkap lei nawlngaihnak a tlaitu nih an thanhmi chirchanh in tialmi a si.

Hi kong ah, a luan ciami Chinland Post ripawt kan zoh than tik ah, 2020 Kum Chin Ram In Tanghra A Phi Ding 14000 An Hlei; Kumdang nak An Tambik tiah kan rak thanh, Hika link ah rel khawh a si. Cun, 2019 ah Tanghra camipuai phit ding in min cazin a rak i pemi chung in Chin ramkulh in a bau mi hi 4,094 an si tiah Chinland Post nih kan rak thanh bal cang. Hika Link ah rel khawh a si.

Ralkap uknak tlaitu lei nih an thanhnak ah, Ramkomh Kawlram ning in tanghra camipuai hi, March 31 ah thawk in, April 9 ah dih ding in an timhtuahnak a si. Atulio ah, Hakha zong ah BEHS No. 1 siangnakchia khomh in CDM a tuah lomi cachimtu nih an tawlrel cuahmah i sianginn an kai timi thawngpang zong a chuak. Credit: The Chinland Post