Tutan Laitlang i ralkap mawttaw tampi an phak ruang ah lung der ngai in um cio a si.

Ralkap Thluak Fah Zualtertu
==============
Tutan Laitlang i ralkap mawttaw tampi an phak ruang ah lung der ngai in um cio a si. Hi kong ah ka hawi pakhat nih a chim i a si ngai ah ka ruah vemi cu; “Tutan i Laitlang a hung kaimi hi Chin ralkap hna nih biatak tein doh ah cun an tei ko hna lai. Lam zong hmun tampi in phih khawh le a lam ning hmanh in hrawh khawh a si ko.

Nain, Kawl ralkap nih Zeitin dah CNA le CDF nih ral an tuk timi theihnak ah an hman lai caah thil ttha lo a si kho. Atu cu lampi ah harnak zeimawzat an pek hna i hi lampi ah Chin ralkap an khat ti an theihter hna. Cu nak i a van ttha deuh rih mi cu Chin ralkap nih Zeitin a Kan tuk lai timi theih an duh bikmi thei rih lo in an chiah mi hna hi a si,” tiah a ti.

Hihi Kan ralbawi hna i an ruah ning zong si ve seh law aho nih theih a si lo. Ruat cio hmanh uh a si kho ngai mi a si. Lungdernak ah si loin Laitlang i a rak Kai chap dingmi ralkap caah lu fah a zualter tu, thluak a buaiter chin ding thilcang tu a si tiin ruah khawh a si.

Kum 16 Ngaknu Bantuk In A Hlen Fawi Hlah Law Kum 18 Nungak Bantuk In Na Lungthawng Ko. Kan dothlennak hi a pipuam tuk. Thihhlan lo ca lawng si lo in, vawlei a hmunh chung caah a si. Kan nunnak cu zeitik a liam lai theih a si lo, khoika hmun ah kan thih lai hngalh a si lo, zeitin in dah kan thih lai tiah a hofa hmanh nih an hngal kho lo. A thiding lawngte kan si. Mifim pakhat nih innchungkhar caah na nunnak a liam ah cun i lungsi ko, ram le miphun caah na nunnak a liam ah cun mi van tha na si, tiah a ti.

Mifim bia le Pathian bia ah midang caah nunnak na pek sian a siah cun nun man ngei na si tiah a um. Nunnak ah aa dawh bik nak cu i pekchanhnak hi a si. Jesuh khrih nih mi vialte kan caah a nunnak a pek, hla phuah thiam nih, an tuknak hmavual kei caah damnak, a thihnak kei caah nunnak a si a ti bak ko.

Kan ti thluahmah rua, kan ti duh mi ah kal usih; Kum 16 ngaknu cu a pawng na um deuhdeuh le dawtnak deu biathlum in na helh zong ah a rau lai lo, na sin ah a hna a ngam cawlh lai, mah leng ah a ruahnak a thinlung a ngeihchun vialte na caah sian lo in a um lai lo, an pek dih ko lai. Na hlen deuhdeuh lai an duh deuhdeuh lai. A tutan ah hin hlen a fawimi, hlen aa zumhmi mipi kan si lo a biapi taktak.

A tu lio kan dothlennak, a biapit tuk lio caan ah Evan, Tluang Lian nih Satan fate a ti mi Satan fate zong a rak cawlcangh ngaingai caah thinlung zor dengmang mi kan um. Cun, a bik in Hakha khua chung ah ralhrang an luh tik ah mipi tam deuh cu kan thinlung phundang nawn te khin a hung um. CNA/CDF hi kan ruahnak bantuk an si lo tiah lungzor in khua a ruat mi le a chim mi kan um pah len. Dothlennak hi hlennak in tei khawh a si lo, a dik mi tu in tei khawh deuh an si.

Kum 18 Nungak bantuk in kan lung a thawn a hau. Kum 18 nungak cu pa pakhat nih nau a pawiter sual hmanh ah hmailei ah ka zulh dingmi lam a tampi rih, ka caah thiltha tuah ding tampi a um ko a ti. A caan ah cun mah le mah i thah hmanh a lung ah a chuak ko. Nain, hmailei khurkhua faak deuh in a ruah than i a thatnak in khua a khan, a lung a thawng i a hnu ah vatha taktak a ngei than. Lungthawnnak, lungsaunak nih hlawknak a chuahpi bantuk in lungzornak nih sunghnak a chuahpi ve.

Ni hin ah kan lungzor in le thazaang dernak in kan thudir sual maw, kan chim sual maw, kan tuah sual maw ti hi mah le mah bia hal lo awk kan tha lo. Hakha ah Min Aung Hlaing ralhrang an luh ruang ah an kan tei a si naisai lo. Kan tei lo hna zong a si fawn lo. Lungthawng in thudir ko hna usih. CNA/CDF ah i hngat ko hna usih. Khua a dei dengmang cang.

Khua deilai ah mipi nih kan dirpi sual hna lo ah cun chunmui a tlung lai i khuadei le dei lo hmanh kan thei ti lai lo. Kan cihmih a kan timtu kawl ralhrang cu Chin mi nih kan nun chung doh herh ti lo dingin a tu hi caan tha ah ser hram hna usih. Ser caan a si. A lam zong a tam bik caan a si. Tei an fawi bik lio caan zong a si.