Tuluk nih Kawl ralkap cung lawngah siloin KIA/KIO telhin tlangcung hriamtlai phu
Tuluk nih Kawl ralkap cung lawngah siloin KIA/KIO telhin tlangcung hriamtlai phu
===========
Tuluk nih Kawl ralkap cung lawngah siloin KIA/KIO telhin tlangcung hriamtlai phu cheukhat cungah tamtuk nawlngeihnak a ngei. Hihi duh zong duh lo zongah a hmanmi asi. Kawlram naingngaizi, hriamtlai dohthlennak ah Tuluk ikomh thiam le an policy zohchih lengmang in kal a hau.
Cu lo ahcun an ci a mit dih kho. Tutan KIA/KIO cathanh zoh tikah Tuluk duh bangin Kachin ram chungah a bikin ramri ah kahdohnak a um lai lo, siloah a tlawm chin kho ti a lang. Nain KIA/KIO le PDF ibawmh in Sagaing ramkulh ahcun kahnak cu a zor lai ti ka zum lo.
Nawlngeihnak/Thazaang Langhter Zia Thiam Ngai A Herh! KIO/KIA kong hi cu chim hau lo bak in kantheih dih cangmi a si. An mah sin in hriamtlai training siseh, ramkhel training siseh a kaimi Tlangcungmi kan tam. February1, 2021 Ralhrang uknak lak hnu chinchin cu KIO/KIA thazaang cu a karh chin cang. Nain nihin ni tiang ah Kachin ram khualipi Myitgyina hi a hohmanh nih KIO tang ah a um tiah a ruatmi kan um men lai lo.
KIO zong nih official in Myitgyina hi kan control khawh cang tiah an chim bal lo. Kawlram ah a cakcem hriamtlai pakhat a si mi KIA zong nih khuapi khuachung ah hriamnam in a thazaang a langhter bal rih lo. Nain politics le in KIO nih Kachin ram khualipi telh in kan mah control area a si cang ti mi an langhter cang. An langhter zia hi kan i cawn a herh ngai tiah ka ruah. Cu cu zei dah si tiah cun KIO nih Ralhrang phaisaa a kawl piakmi thilri an hrawh piak mi hi a si.
Hi kong he pehtlai in kan hnu thla chung ah KIO Myitgyina district cozah nih ralhrang thilchuah zuar ti hlah uh tiah cathanh an chuah. Cu cathanh an chuah lio ah zei tin dah rian an ttuan hnga tiah ka ruah tawn. A ruang cu mipi nih KIO bia an ngai hnga ma timi le an zuar zong ah KIO nih zei tin dah ttuanvo a lak khawh hnga timi kong a si. Sihmanhsehlaw, a tu cu voi (2/3) tiang KIO nih KaChin ram khualipi Myitgyina khua chung bak ah Ralhrang thilri an hrawh cang.
Hi nih a langhter mi cu KIO nih Myitgyina hi a control cang tiah chim khawh a si. Hi kong hi media ah a phak tik ah a relmi poh nih Myitgyina khuachung ah ralhrang an um lo ma, a si lo ah ralhrang nih maw KIO cu an ti ngam lo tbk in a phunphun kan ruah khawh. Nain a fiangmi cu KIO nawlngeih nak loin Myitgyina ah khua a sa kho ti lo, Myitgyina ah cun Ralhrang cu Tapung dirhmun ah an thla cang ti kha a si.
Hi chung in fim kan i lak hnga ding cu hriamnam thazaang in khuapi khuachung ah Mipi theih in kan thazaang/nawl ngeihnak kan langhtermi nak in zei thluk in dah mipi nih kan mah bia an ngaih/ kan mah he mipi hi pakhat an si ti hi langhter kho ah cun atha deuh. AA zong nih 2021 ah a tuah balmi cu COVID-19 ruang ah Rakhine ram lock-down kan tuah tiah cathanh an chuah i Rakhine mipi nih an zulh dih ve. Cu kong cu media ah a langh tik ah Rakhine ram cu AA he hmunkhat tein an dir timi a lang.
Atu lio hriamtlai kan unau cheukhat kan puithling deuh lonak cu mipi he a sik in kan i si, biaknak le upa pawl he facebook in hmuh ning aa dannak kong kan ttial, ramdang le phaisaa thazaang chuah tu hna cung ah mawtchianak facebook ah langhter tbk kan tuah. Chim duhmi cu minung pakhat hnih nanmah he ruahnak aa kalmi kong ah nan buaibai tuk tawn i, mipi tampi nih nanmah an in dir/ tan pi nak hna kha a zor ngaimi a lo.
Cu caah cathanh te chuah in nawlngaihnak/thazaang langhter in khuachung ah Ralhrang thilri a zuarmi dantat tbk le mipi nih zulh a herhmi phunglam hna tam deuh in ser khawh i zuam hram usih. Tahchunnak ah COVID-19 kong zul ding, Ralhrang thilri zuar lo ding cathangh chuah le Silent Strike ah Chin mipi vialte i tel dih uh tbk hna tuah in, kha vialte kha a tlamtlin dih poh ah cun Chin State 90% kan mah Control Area a si cang tiah chim khawh asi cang ko.
Aruangcu Ralhrang cu an umnak hmun lawng an control khawh tinak asi lai. Cu caah a tu lio hi cu Ramkhel lei he pehtlai in Rianttuan deuh i zuam i kan nawlngaihnak/thazaang langhter zia thiam a herh. Ralhrang hna hi kan teihrim lai nain 2022 kum hi kan dothlennak a dih hrim lai tiah chim khawh a si lo caah hriamnam le papek in kan cawlcangh bantuk in ramkhel lei zong cawlcanghnak tuah thluahmah aherh cang. Credit: Salai Do Khar