Tulio vawlei nih an ibuaipi bikmi thil pakhat cu

Nihin “Z” sullam…Tulio vawlei nih an ibuaipi bikmi thil pakhat cu.
=======
Hmelchunhnak ah “Z” an ṭialmi nihkhin zei sullam dah a ngeih ti khi si. “Z” phunphai ai rak isuai i hmelchunhnak a rak hmangtu pawl cu, tuanhlan deuh theih tawk ah cun, ai dawhcah ah ruahmi cu an rak si rua lo. Ka palh sual kho ko. Misual hawi-emlo pawl nih ihmelchunhnak ah an rak hman tawnmi siseh law ka lawhter. (Nain Russian pawl an ihman ning tu lam cu ai dang ko lai)

Naite in khan “Z” symbol cu a von laar ṭhan. Russia ralkap pawl nih an motor, an tank le an vanlawng tbk ah an isuai lulh. February 19 ni hrawng thawk khan cu tin “Z” symbol hman an thawk lulh cu a si, an ti. Russia ralkap pawl nih Ukraine ram lei an panhnak hmunkip ah an iṭial lawng khi si lo.

Russia ram khualipi minthang le khua pical a rak si vemi St. Petersburg khualai zongah “Z” symbol pi cu an taar.
Lai awchuah cun, “Ruus” ti dingmi Russia miphun pawl cu hlan tuk in tuanbia ngei miphun, England, Germany kan timi tehna nak hmanh in an ram a lianngan tuk i siangpahrang ṭha tein a rak ngei balmi miphun lianngan taktak an rak si ve.

Nihin ni zongah cun, vawleicung i a kau bik vawlei ngeitu ram cu Russia an si tho rih. Russia khawh in Canada an si. Canada khawh in China, China khawh in US an si. Hlan USSR rak timi ram cu a rak lianngan taktak. Cu pi cu 1991 si rua ka ti, ah, aa rak icheu dih i Russia nih kau cem a tin, atu Ukraine kan timi nihkhin a kau cem chang a tin.
Nain, Russia le Ukraine tahchun ahcun, Russia caah Ukraine cu Kawlram caah Chin State tluk hrawnghrang lawng khi si rih.

Russia timi khi mah tluk cun a nganmi a si ve. Ukraine ram khualipi Keiv khi Rusia pawl nih kanmah ta an ti sual cun an palh lo, ti si. Nain, Ukraine pawl nih an ta si lo an ti ve cun, an palh ve lo ti si. Zeicahtiah, hlan an tuanbia tein ai rak seengtlai tuk cangmi miphun an si. Keiv cu hlante in khuapi minthang a rak si i Russia siangpahrang nih anmah uknak cabuai an va hunnak, an naupa siangpahrang an rak ṭuanternak khualipi phun khi a rak si.

Nihin ni ah Judah miphun pawl cu Israel ram chungah tam cem khua an sak kho cang. Israel ramleeng ah Judah miphun tam cem khua an saknak ram cu US si lo. Canada zong si lo. Ukraine ram ah a si. Ukraine president Zelensky timi capo saihthiam minta pate khi Judah miphun a si. An prime minister zong Judah miphun thotho a si.

Tikah, Judah miphun pahnih nih an ukmi Ukraine ram kong ah Khrihfa ram ai timi Western pawl nih an hna an tunpiak deuh ngai ko hna. A ngai ti ah cun, Ukranian le Russian ahkhin Russian pawl hmanh khi an idawh deuh, an vun a mil deuh. Cu pinah, Russian khrihfa pawl khi ai democratic tukmi Ukraine Khrihfa nak hmanh in an tak deuh kho ko.

Nain, Russian phun pawl cu an hmuk tuk hna i, kei lam nihcun, ka uar tuk hna lo. Ukraine pawl zong khi Russian phun mi hmuk phun lawngte an si dih ko cu. Ukraine ram chungah Judah miphun cazin cu thong sawmli renglo deuh hrawng an um, ti si. Nain, Ukraine ram chung i Israel miphun si khawhnak a ngei khotu milu belte sing hnih paoh cu an tling lai tiah an ti. An pipu hrihhram van zawt chinchin cun, sing li hmanh an luan kho, ti si.

Ukraine zong cu Eastern Orthodox, Russian zong cu tho an si. Biaknak ah an lu bik khi Russia ram lu bik nih a rak tlaih, khalh tawn hna. Nain, Ukraine ram an biaknak lutlai nih Russia huham cun naite khan a chuak. An Khrihfa sinak ai khat nain, an iṭhen cang, ti khawh si.

Russia ram khi nihin ni ah cun vawlei cung i biakin a karh biknak ram pakhat a si ve. An Orthodox lutlai Kirill nihcun minute 14 kar ah kan ram chungah hin biakinn pakhat sak kan liim a rak ti phah. Cu Kirill nihcun (Maha Maktaduai) patawite Putin khi a rak dawt ngai. Nain, Putin nih Khrihfa kan zumhnak a pom tak maw tak lo hohmanh nih biafiang an chim kho lo.

Putin pa cu communist biaknak ngeilo a rak si. A nu belte a zumhnak ṭhawng ngaimi Khrihfa cu a rak si ko. Putin nih a ṭaang ah ai oih tawnmi vailamtah ṭhi khi a nu nih a rak pekmi a si tiah an ti. “Z” symbol khi chanthar culture umtuning cu Sehtan hmelchunhnak ah muvi tehna ahcun an hman lengmang. Rithai-sii chun, biaknak pialsual, lainawng pawl hmanmi symbol deuh a si tawn.

Tutan ah Putin nih Ukraine a luh hnawhnak i a hmanmi symbol “Z” a si tikah mi vialte an khuaruah a har.
Media ngan pipi nih cu kong ah heh tiah an dawi, an hlat. Mi tam deuh ruahnak ah cun, anmah Russian holh i “Za Pobedy (for victory)” tinak si lai tiah an ruah bik. Nain, thilmak pakhat a um hoi.

Russian pawl i an ca.. alphabet ahkhin “Z” a um lo ti si. Cyrillic Russian an ti i cu cafang pawl cu a dihlak ah 33 an si. English alphabet cu 26 si; A in ai thawk i Z ah a dong. Nain, Russian tu ah cun si lo. A bantuk phun a bingtalet aa le bii in ai thawk i a bingtalet R in a dong. “Z” an nei loh.

“Z” neilo pawl nih Ukraine tuknak ah “Z” an hman. Misualpa min ah Vladimir Putin a si. A dohtu pa min ah Volodymyr Zelenskyy a si. Russia nih Vladimir an timi khi Ukaraine nih Volodymyr ti in an ṭial ve. Ai min ai khat bak! Lai cun “Valadamir Putin le Valadamir Zalensaki an iphomh” ti ding khi si. Sau bak lo mei. Na umhar an’ phenh pah khin thil theih deuh seh ti kan duh bia si cu. Credit: Salai C Alexander