Tuchun cu kan pasal ttha hna thawngpang nih a ka zawt.
==================
Ral atu balmi poh nih afak bik in kan tuar tawn mi cu ral kan tuk tti hawi nih kan pawng I an kan thih tak tik ah le hma apu mi afah tuk i zeiti vun thlopbul awk thalo dirhmun ah khin thin le lung vialte a kuai dih hnik tawn. Kan ralkap hna an pawng I ka vai ium ter I an ruak ka vai ifimhlawm ter, hma apu mi hna ka vun i fimtawl ter ah hin thin le lung nih a celh lo.
Lungfak ngaiin ramlak tikam ah keimah lawng saupi lam ka kal. Thla ka cam I khua ka ruat. 2021 April thla thok khan Chin miphun nih ralhrang hi a thar in kan doh hna. 2021 April in 2021 December thla riat chung ah CJDC nih kawl ralhrang 1029 an thah hna. Kanmah CJDC lei in minung 58 nih ram le miphun caah an nunnak an pek.
2022 kan hung lut I January thla chung ah Kalay Falam lam Hiangzing khuapawng Tidim peng ah ni 12 chung CJDC le SAC kar ah kahdoh nak fak ngai in a chuak. Mah cu tan ah cun Kawl ralhrang 80 leng an thah khawh hna. 2022 kum chung I kawl ralhrang kan thah khawh mi hna hi 2021 kum nak in atlawm hrimhrim lai lo.
Cun, 2023 chung ah fak bik in ikah nak cu Zinghmuh operation asi lai dah. Zinghmuh operation ah khan ralhrang tam taktak an thah khawh hna pin ah an column ning in an hrawh khawh. Thil le ri kuan le zen A phaisa in Dollar in Million 30 renglo man SAC lei nih sunghzawtlak nak an huah lai tiah tuak asi. Cu hnu ah Kankaw lam kahdoh nak ah ralhrang tam ngaite an thah khawh rih hna.
CNO hruainak in Var SAC ralhrang camp cu an lak, ral tampi an thah hna I anung in tampi an tlaih hna.
Cun Tidim peng ah SAC ralhrang nih an camp an zamtak. Matupi peng ah an Tactical commander(Beu-ha-hmu) tiang an thah khawh. Cun 2022 chung ah Chin State I an mihlathlai tu ah lutlai nganbik kan mah lei ah a rak ifon.
Nai ah khan SAC lei attang mi Hmuh Thang kha Hakha arak phan I ralhrang nih Hakha khuachung security fakpi in an lak timi kha kan theih. Mah thawng pang kan theih le cangka in zei bantuk cawlcangh nak dek SAC ralhrang nih hin timhlamh nak an nei ko lai ti kha rak ruahcia asi. Kan rak ruah ning bantuk in atu an vun cawlcang I Thantlang lei panh in ralhrang cu an rak pok.
Ralhrang cu pei kan doh fam cu. Kan khua, kan biakin, kan in le kan lo an hual lo. Kan mah zong kan nunnak dih tiang in kan kham hna, kan khua, kan ram kan ven.
A number in vun tuak ah cun kan mah nak in milu alet in a tam mi le hriamnam anei mi kha a thongthong in pei kan thah khawh hna cu. Vawlei tuanbia ah Chin miphun miraltha an si timi cu thisen le nunnak he ttial cuahmah asi. Kan ral kan thah khawh mi hna tuak ah cun Pathian nih zeitluk in dah an kan runven I lam akan hruai timi hi I fiangtuk in alang.
Pathian nih lam a kan hruai rih ko lai. Kan herhbau mi miphun runven nak hriamnam zong hi a za ati tik ah Pathian nih a kan pek hrimhrim ko lai. Ngaihchiat phung asi, lungkuai phung asi, lungfah phung asi.Kan lung tu cu adong lai lo. Abik in kan ralkap hna caah fakpi in thlacam le kutsamh hi kan zapi nih kan tuah khawh mi ralhrang doh asi. Atu bantuk can ah Kan ralkap hna le kan dirtti ko tinak ah kan ralkap akan hruaitu hna he kan hmanthlak te hi ka rak tar. By Salai Bawi Lian Mang